អាជ្ញាធរខ្មែរបដិសេធមិនស៊ើបអង្កេតលើករណីចាប់ពង្រត់សកម្មជនថៃម្នាក់នៅរាជធានីភ្នំពេញ
អាជ្ញាធរកម្ពុជា នៅថ្ងៃសុក្រទី០៥ខែមិថុនា បានបដិសេធចំពោះសំណើរបស់អង្គការការពារសិទ្ធិមនុស្សអន្ដរជាតិ ដែលស្នើឲ្យបើកការស៊ើបអង្កេតលើករណីចាប់ពង្រត់សកម្មជនប្រជាធិបតេយ្យថៃ។ សកម្មជនប្រជាធិបតេយ្យថៃ លោក វ៉ាន់ឆាលឺម សាត់ស័ក្តិសិទ្ធ អាយុ៣៧ឆ្នាំ ត្រូវបានអង្គការសិទ្ធិមនុស្សអន្ដរជាតិអះអាងថា ត្រូវគេចាប់ពង្រត់នាថ្ងៃព្រហស្បតិ៍ ទី០៤មិថុនា ក្នុងពេលដែលកំពុងទិញអាហារនៅទល់មុខអគារខុនដូដែលលោកស្នាក់នៅក្នុងខណ្ឌជ្រោយចង្វារ រាជធានីភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
សំណើរបស់អង្គការសិទ្ធិមនុស្សអន្ដរជាតិ ឲ្យអាជ្ញាធរកម្ពុជាបើកការស៊ើបអង្កេតលើករណីចាប់ពង្រត់សកម្មជនប្រជាធិបតេយ្យថៃនៅទីក្រុងភ្នំពេញ ពុំមានការឆ្លើយតបជាវិជ្ជមានទេ។ លោក ឆាយ គឹមឃឿន អគ្គស្នងការរងនគរបាលជាតិកម្ពុជា បានគូសបញ្ជាក់ប្រាប់ទីភ្នាក់ងារសារព័ត៌មាន AFP នៅថ្ងៃសុក្រ ទី០៥ខែមិថុនាថា លោកពុំបានដឹងពីរឿងនេះឡើយ ដូច្នេះហើយ តើឲ្យលោកបើកការស៊ើបអង្កេតផ្អែកលើអ្វី?
សូមជម្រាបជូនថា អង្គការឃ្លាំមើលសិទ្ធិមនុស្ស Human Rights Watch នៅថ្ងៃសុក្រទី០៥មិថុនា បានរាយការណ៍អំពីករណីចាប់ពង្រត់សកម្មជនប្រជាធិបតេយ្យថៃម្នាក់ ឈ្មោះ វ៉ាន់ឆាលឺម សាត់ស័ក្តិសិទ្ធ ដោយមានរូបភាពពីកាមេរ៉ាសុវត្ថិភាពភ្ជាប់ជាមួយផង។ បើតាមអង្គការសិទ្ធិមនុស្សនេះ លោក វ៉ាន់ឆាលឺម សាត់ស័ក្តិសិទ្ធ អាយុ៣៧ឆ្នាំ ត្រូវគេចាប់ញាត់ទាំងកម្រោលទៅក្នុងរថយន្តពណ៌ខ្មៅមួយ នាល្ងាចថ្ងៃព្រហស្បតិ៍ទី០៤មិថុនា ក្នុងពេលដែលលោកវ៉ាន់ឆាលឺមកំពុងទិញអាហារនៅទល់មុខអគារខុនដូដែលលោកស្នាក់នៅក្នុងខណ្ឌជ្រោយចង្វារ រាជធានីភ្នំពេញ។
លោក Brad Adams នាយកប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស Human Rights Watch ទាមទារឲ្យអាជ្ញាធរកម្ពុជាបើកការស៊ើបអង្កេតជាបន្ទាន់ចំពោះករណីនេះ ធ្វើយ៉ាងណារកឲ្យឃើញនិងធានាឲ្យបាននូវសុវត្ថិភាពរបស់លោកវ៉ាន់ឆាលឺម។ ចំពោះការលើកឡើងនេះ លោក ខៀវ សុភ័គ អ្នកនាំពាក្យក្រសួងមហាផ្ទៃកម្ពុជាចាត់ទុកថា ជាការលើកឡើងដោយមិនមានប្រភពច្បាស់លាស់ ហើយអាចជាព័ត៌មានក្លែងក្លាយផងក៏មិនដឹង។
វ៉ាន់ឆាលឺម សាត់ស័ក្តិសិទ្ធ ត្រូវគេស្គាល់ថាជាសកម្មជនប្រជាធិបតេយ្យមួយរូប ដែលហ៊ានរិះគន់វាយប្រហារដោយចំៗទៅលើរដ្ឋាភិបាលថៃដឹកនាំដោយលោកនាយករដ្ឋមន្ដ្រី ប្រាយុទ្ធ ចាន់អូឆារ។ ក្រោយរដ្ឋប្រហារថ្ងៃទី២២ឧសភាឆ្នាំ២០១៤នៅប្រទេសថៃ លោកវ៉ាន់ឆាលឺមបានភៀសខ្លួនទៅកាន់ប្រទេសឡាវ និងក្រោយមកមកកាន់កម្ពុជា ដើម្បីគេចពីរឿងក្ដីក្ដាំចោទប្រកាន់ដោយរដ្ឋាភិបាលថៃ ទាក់ទងនឹងបទល្មើសប្រមាថព្រះមហាក្សត្រ និងបទឧក្រិដ្ឋតាមប្រព័ន្ធកុំព្យូទ័រ។
មួយថ្ងៃមុនពេលត្រូវចាប់ពង្រត់ ពោលគឺនៅថ្ងៃទី០៣ខែមិថុនា លោកវ៉ាន់ឆាលឺម បានបង្ហោះនូវវីដេអូដ៏ខ្លីមួយលើបណ្ដាញសង្គមហ្វេសប៊ុក ដែលមានខ្លឹមសារជេរប្រមាថនាយករដ្ឋមន្ដ្រីថៃ លោកប្រាយុទ្ធ ចាន់អូឆារ ថាជាមេដឹកនាំដែលល្ងង់ខ្លៅ បានតែនិយាយ តែដឹកនាំប្រទេសមិនកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ