អតីតបក្សប្រឆាំងបង្កើតគណៈកម្មការឃ្លាំមើលបញ្ហាព្រំដែន និងជនអន្តោប្រវេសន៍ដែលកំពុងរស់នៅកម្ពុជា
អតីតគណបក្សសង្រ្គោះជាតិបានសម្រេចបង្កើតគណៈកម្មការមួយ ដើម្បីស្រាវជ្រាវ និងឃ្លាំមើលបញ្ហាព្រំដែន និងជនអន្តោប្រវេសន៍ដែលកំពុងរស់នៅក្នុងប្រទេសកម្ពុជា។ នេះបើតាមសេចក្តីសម្រេចរបស់អតីតបក្សប្រឆាំងកាលពីថ្ងៃទី១១ ខែកក្កដា។ អ្នកនាំពាក្យគណបក្សប្រជាជនកម្ពុជា បានចាត់ទុកការបង្កើតគណៈកម្មការនេះថា ជារឿងខុសច្បាប់ គ្មានការទទួលស្គាល់ និង គ្មានប្រសិទ្ធភាពអ្វីនោះទេ។
ចុះផ្សាយនៅថ្ងៃ៖
ស្តាប់ - ០២:១៨
គណៈកម្មការកិច្ចការព្រំដែន និងអន្តោប្រវេសន៍ដែលទើបង្កើតឡើងដោយអតីតគណបក្សសង្រ្គោះជាតិនេះ មានលោកអ៊ុំ សំអានដែលជាអតីតអ្នកតំណាងរាស្រ្តជាប្រធាន និងមានអនុប្រធាន និងសមាជិកចំនួន៥នាក់បន្ថែមទៀត។ អ្វីជាការកត់ចំណាំ គឺសមាជិកនៃគណៈកម្មការនេះជាអ្នកដែលតែងតែរិះគន់ វាយប្រហារមកលើរដ្ឋាភិបាលកម្ពុជាឥតឈប់ឈរមានដូចជា លោកប៉ាង សុខឿន និង លោកឆាំ ឆានី ជាដើម។ ក្រៅពីនេះ គណៈកម្មការនេះ ក៏មានទីប្រឹក្សាចំនួន៦នាក់ ដែលសុទ្ធសឹងតែជាអតីតអ្នកតំណាងរាស្រ្តរបស់អតីតគណបក្សសង្រ្គោះជាតិ។
បើតាមសេចក្តីសម្រេចកាលពីថ្ងៃទី១១ ខែកក្កដា ដែលមានលោកសម រង្ស៊ី ប្រធានស្តីទីអតីតបក្សប្រឆាំងចុះហត្ថលេខា គឺគណៈកម្មការនេះមានភារកិច្ច សិក្សាស្រាវជ្រាវ ប្រមូលព័ត៌មាន និងឃ្លាំមើលបញ្ហាព្រំដែននៃប្រទេសកម្ពុជា និង បញ្ហាជនអន្តោប្រវេសន៍ដែលរស់នៅក្នុងប្រទេសកម្ពុជា។ ជាមួយគ្នានេះ ក៏ចូលរួមផ្សព្វផ្សាយ និងលើកទឹកចិត្តដល់ប្រជាពលរដ្ឋខ្មែរ ជាពិសេសយុវជនឱ្យមានការយល់ដឹងពីបូរណភាពទឹកដី និងផលវិបាកនៃការហូរចូលជនអន្តោប្រវេសន៍ខុសច្បាប់មករស់នៅក្នុងប្រទេសកម្ពុជា។ ម្យ៉ាងទៀត គណៈកម្មការនេះ មានភារកិច្ចតស៊ូមតិ និង ចេញសេចក្តីថ្លែងការណ៍ក្នុងនាមគណបក្សចំពោះរាល់ការរំលោភបំពានបូរណភាពទឹកដី និងសកម្មភាពខុសច្បាប់របស់ជនអន្តោប្រវេសន៍។
អ្នកនាំពាក្យគណបក្សប្រជាជនកម្ពុជា លោកសុខ ឥសាន បានចាត់ទុកការបង្កើតគណៈកម្មការនេះថា ជារឿងខុសច្បាប់។ ខុសច្បាប់ ព្រោះត្រូវបានបង្កើតឡើងដោយគណបក្សដែលត្រូវបានរំលាយចោលស្របតាមច្បាប់ដោយតុលាការកំពូលកម្ពុជា។ លោកសុខ ឥសាន បានគូសបញ្ជាក់ថា គណៈកម្មការនេះនឹងមិនមានប្រសិទ្ធភាពអ្វីឡើយ ព្រោះគ្មានអ្នកណាទទួលស្គាល់។ សម្រាប់លោកសុខ ឥសាន ការស្រាវជ្រាវ និង និងការដោះស្រាយបញ្ហាព្រំដែន គឺជាកាតព្វកិច្ចតែមួយគត់របស់គណៈកម្មការកិច្ចការព្រំដែនដែលបង្កើតឡើងដោយរដ្ឋាភិបាលកម្ពុជា។
ជាការកត់សម្គាល់ ការបង្កើតគណៈកម្មការកិច្ចព្រំដែន និងអន្តោប្រវេសន៍របស់អតីតបក្សប្រឆាំងនាពេលនេះ ធ្វើឡើងស្របពេលកម្ពុជាកំពុងមានបញ្ហាព្រំដែនជាមួយវៀតណាមដោយវៀតណាមបានចូលមកបោះតង់តាមបណ្តោយព្រំដែនក្នុងខេត្តកណ្តាល និងការផ្តាំផ្ញើពីមេដឹកវៀតណាមឱ្យកម្ពុជាបង្កលក្ខណៈងាយស្រួលដល់ការរស់នៅរបស់ពលរដ្ឋវៀតណាមនៅកម្ពុជា ក៏ដូចជាការហូរចូលយ៉ាងគំហុករបស់ជនជាតិចិន។ ប៉ុន្តែ លោកសុខ ឥសាន អះអាងថា ចេតនារបស់អតីតបក្សប្រឆាំងដែលបង្កើតគណៈកម្មការនេះឡើង គឺគ្រាន់តែដើម្បីឃោសនានយោបាយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ