Human Right Watch៖ កម្ចីខា្នតតូចនៅកម្ពុជា កំពុងរងផលប៉ះពាល់ផ្នែកសេដ្ឋកិច្ចធ្ងន់ធ្ងរដោយសារជំងឺ Covid-19
អង្គការឃ្លាំមើលសិទិ្ធមនុស្សអន្តរជាតិ (Human Right Watch) លើកឡើងថា រដ្ឋាភិបាលកម្ពុជា និងធនាគារជាតិនៃកម្ពុជាគួរធ្វើអន្តរាគមន៍បញ្ឈប់ជាបន្ទាន់នូវការប្រមូលបំណុល និងការប្រាក់ចំពោះអ្នកខ្ចីប្រាក់កម្ចីខ្នាតតូច ពីគ្រឹះស្ថានមីក្រូហិរញ្ញវត្ថុទាំងឡាយ ខណៈដែលពួកគេកំពុងរងផលប៉ះពាល់ផ្នែកសេដ្ឋកិច្ចធ្ងន់ធ្ងរដោយសារជំងឺ Covid-19។ គ្រួសារដែលជំពាក់បំណុលគ្រឹះស្ថានមីក្រូហិរញ្ញវត្ថុ ត្រូវប្រឈមនឹងការលក់ដី និងផ្ទះសម្បែងដែលពួកគេធ្លាប់រស់នៅ ដើម្បីយកទៅសងម្ចាស់បំណុល។
ចុះផ្សាយនៅថ្ងៃ៖
ស្តាប់ - ០២:៣០
ក្នុងសេចក្តីថ្លែងការណ៍របស់ខ្លួននៅថ្ងៃទី១៤ ខែកក្កដា អង្គការ Human Right Watch បានមើលឃើញថា ការឆ្លើយតបរបស់រដ្ឋាភិបាលលើបញ្ហាបំណុល នាពេលកន្លងមក គឺមិនគ្រប់គ្រាន់ដើម្បីជួយដល់អ្នកខ្ចីប្រាក់ បញ្ចៀសពីការរំលោភសិទ្ធិមនុស្សពីសំណាក់ម្ចាស់បំណុលនៅឡើយទេ។
Human Right Watch បន្តលើកឡើងថា កម្ចីខ្នាតតូចរបស់ពលរដ្ឋកម្ពុជាពីស្ថាប័នមីក្រូហិរញ្ញវត្ថុ ជាមធ្យមមាន មានចំនួន ៣,៨០៤ដុល្លារអាមេរិកក្នុងម្នាក់ ដែលនេះគឺជាអត្រាខ្ពស់បំផុតនៅលើពិភពលោក ខណៈធនាគារជាតិនៃកម្ពុជា ដែលជាស្ថាប័នផ្តល់អាជ្ញាប័ណ្ណ និងគ្រប់គ្រងអ្នកផ្តល់កម្ចីខ្នាតតូច មិនដែលបានចេញបទបញ្ញត្តិតឹងរ៉ឹងណាមួយ ដើម្បីការពារអ្នកខ្ចីប្រាក់ពីការផ្តល់កម្ចីដែលគ្មានក្រមសីលធម៌នោះឡើយ។
លោក Phil Robertson នាយករងអង្គការឃ្លាំមើលសិទិ្ធមនុស្សអន្តរជាតិប្រចាំអាស៊ី បានលើកឡើងនៅក្នុងសេចក្តីថ្លែងការណ៍ថា ពលរដ្ឋកម្ពុជាជាច្រើនបារម្ភខ្លាចបាត់បង់ដីធ្លីផ្ទះសម្បែងរបស់ខ្លួនច្រើនជាងការខ្លាចឆ្លងវីរុសកូរ៉ូណាទៅទៀត ដោយសារពួកគេមិនអាចសងប្រាក់កម្ចីទៅម្ចាស់បំណុលបាន ហើយរដ្ឋាភិបាលមិនបានជួយដល់ពួកគេឱ្យបានពេញលេញនោះទេ។
បើតាម លោក Phil Robertson រដ្ឋាភិបាលកម្ពុជាគួរតែបញ្ជាឱ្យមានការផ្អាក ឬពន្យារពេលសងបំណុល និងអត្រាការប្រាក់របស់ពលរដ្ឋដែលរងគ្រោះដោយសារជំងឺរាតត្បាតកូវីដ១៩ជាបន្ទាន់ ហើយគប្បីចាត់វិធានការចំពោះរាល់ស្ថាប័នហិរញ្ញវត្ថុដែលមិនអនុវត្តតាម។
ទាក់ទងទៅរឿងនេះដែរ កាលពីថ្ងៃចន្ទដើមសប្តាហ៍នេះ សមាគមមីក្រូហិរញ្ញវត្ថុកម្ពុជា បានច្រានចោលនូវរបាយការណ៍របស់ក្រុមអង្គការសង្គមស៊ីវិលដែលរកឃើញថា កម្មកររោងចក្រមួយចំនួន«ធ្វើការងាររហូតជំពាក់បំណុលវ័ណ្ឌក» ខណៈរោងចក្រខ្លះ បានព្យួរការងារទាំងស្រុង ឬដោយផ្នែក ចន្លោះខែមីនា និងឧសភា ឆ្នាំ២០២០។ សមាគមមីក្រូហិរញ្ញវត្ថុកម្ពុជា បានហៅរបាយការណ៍នេះថា ជាការស្រាវជ្រាវមិនមានមូលដ្ឋានត្រឹមត្រូវ និងជាការរំខានដល់វិស័យមីក្រូហិរញ្ញវត្ថុដែលកំពុងតែមមាញឹកក្នុងការទប់ស្កាត់ និងកាត់បន្ថយផលប៉ះពាល់នៃជំងឺកូវីដ១៩។
ប្រតិកម្មឆ្លើយតបរបស់សមាគមមីក្រូហិរញ្ញវត្ថុកម្ពុជាពេលនេះគឺ២សប្តាហ៍ ក្រោយពីសម្ព័ន្ធសហជីពកម្ពុជា (CATU) មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) និងសម្ព័ន្ធខ្មែរជំរឿន និងការពារសិទ្ធិមនុស្ស (LICADHO) បានចេញផ្សាយនូវរបាយការណ៍មួយ កាលពីថ្ងៃទី៣០ ខែមិថុនា ឆ្នាំ២០២០ មានចំណងជើងថា៖ «ធ្វើការងាររហូតជំពាក់បំណុលវ័ណ្ឌក»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ