គណបក្សប្រជាធិបតេយ្យមូលដ្ឋានស្នើនាយករដ្ឋមន្រ្តីឱ្យពិនិត្យមើលឱ្យបានដិតដល់រឿងអភិវឌ្ឍកោះនរា
គណបក្សប្រជាធិបតេយ្យមូលដ្ឋានបានទាមទារឱ្យស្នើសុំដល់លោកនាយករដ្ឋមន្រ្តីហ៊ុន សែន ត្រួតពិនិត្យឱ្យបានដិតដល់ចំពោះការអភិវឌ្ឍកោះនរា។ ការស្នើសុំនេះ គឺបន្ទាប់ពីគណបក្សក្រៅរដ្ឋសភាមួយនេះសង្កេតឃើញថា ការអភិវឌ្ឍកោះនរាកំពុងធ្វើឡើងខុសពីគម្រោងអាចបង្កជាផលប៉ះពាល់ច្រើន។ គណបក្សនេះ ក៏បានទាមទារឱ្យក្រសួងបរិស្ថានចុះវាយតម្លៃពីផលប៉ះពាល់នេះផងដែរ។ ជាការឆ្លើយតប ក្រសួងបរិស្ថានបានគូសបញ្ជាក់ថា កំពុងតែធ្វើកិច្ចការនេះហើយ។
ចុះផ្សាយនៅថ្ងៃ៖
ស្តាប់ - ០២:០៨
តាមរយៈទំព័រហ្វេសប៊ុករបស់ខ្លួនកាលពីថ្ងៃអង្គារ គណបក្សប្រជាធិបតេយ្យមូលដ្ឋានបានសម្តែងនូវការព្រួយបារម្ភយ៉ាងខ្លាំងទាក់ទងនឹងការអភិវឌ្ឍកោះនរា។ ការអភិវឌ្ឍកោះនរា ដែលគណបក្សនេះបានសង្កេតឃើញជាក់ស្តែងថា នឹងឈានទៅលុបទន្លេមេគង្គក្រោមប្រមាណជិតពាក់កណ្តាល ដើម្បីបម្រើផលប្រយោជន៍ឯកជនដែលផ្ទុយនឹងច្បាប់ ក៏ដូចជាខុសឆ្ងាយពីផ្ទាំងបិទប្រកាសព័ត៌មានអំពីការអភិវឌ្ឍកោះនរា។ បើតាមគណបក្សប្រជាធិបតេយ្យមូលដ្ឋាន ការអភិវឌ្ឈរបៀបនេះ អាចនឹងបង្កផលប៉ះពាល់ធ្ងន់ធ្ងរដល់បរិស្ថាន ជាពិសេស ការរារាំងផ្លូវមច្ឆាជាតិ បង្កទឹកជំនន់ និងការបាក់ច្រាំងទន្លេនាពេលអនាគត។
ហេតុដូច្នេះហើយ គណបក្សប្រជាធិបតេយ្យមូលដ្ឋាន បានស្នើសុំដល់លោកនាយករដ្ឋមន្រ្តីហ៊ុន សែន ប្រមុខរដ្ឋាភិបាលកម្ពុជាឱ្យយកចិត្តទុកដាក់ពិនិត្យចំពោះការអភិវឌ្ឍនេះឱ្យបានដិតដល់ ចៀសវាងបន្សល់ទុកមរតកបំផ្លាញទន្លេមេគង្គក្រោមដល់កូនខ្មែរជំនាន់ក្រោយ។ ជាមួយគ្នានេះ គណបក្សក្រៅរដ្ឋសភាមួយនេះ ក៏បានទាមទារឱ្យក្រសួងបរិស្ថានបញ្ជូនក្រុមការងារបច្ចេកទេសចុះទៅវាយតម្លៃជាបន្ទាន់ពីផលប៉ះពាល់ដែលអាចកើតចេញពីគម្រោងអភិវឌ្ឍកោះនរានេះ។
ឆ្លើយតបនឹងការទាមទារនេះ លោកនេត្រ ភក្ត្រា អ្នកនាំពាក្យក្រសួងបរិស្ថានបានអះអាងប្រាប់វិទ្យុបារាំងអន្តរជាតិនៅព្រឹកថ្ងៃពុធនេះថា ក្រសួងបរិស្ថានកំពុងដំណើរការសិក្សា និងវាយតម្លៃពីផលប៉ះពាល់នៃគម្រោងអភិវឌ្ឍកោះនរានេះ។ លោកបានគូសបញ្ជាក់បន្ថែមទៀតថា រាល់គម្រោងវិនិយោគអភិវឌ្ឍទាំងអស់ត្រូវមានការវាយតម្លៃពីហេតុប៉ះពាល់បរិស្ថាន ដើម្បីសិក្សាពីផលប៉ះពាល់ និងវិធានការកាត់បន្ថយជាអតិបរមាលើផលប៉ះពាល់នោះ។
សូមបញ្ជាក់ថា កោះនរាកំពុងត្រូវបានធ្វើការអភិវឌ្ឍជាក្រុងរណបថ្មីភ្ជាប់ទៅកាន់ស្រុកកៀនស្វាយ ខេត្តកណ្តាល។ ក្រុងរណបកោះនរានេះ ត្រូវបានអភិវឌ្ឍឡើងដោយក្រុមហ៊ុនវិនិយោគទុនក្រៅប្រទេស(OCIC)របស់លោកឧកញ៉ា ពុង ឃាវសែ។ តាមគម្រោង ក្រុមហ៊ុនវិនិយោគទុនក្រៅប្រទេស(OCIC)នឹងសាងសង់ស្ពានបេតុងខ្សែកាបថ្មីតម្លៃ៥០លានដុល្លារ អាមេរិក ដើម្បីសម្រួលដល់ការធ្វើដំណើរពីតំបន់កោះពេជ្រទៅកាន់គម្រោងអភិវឌ្ឍកោះនរា។ តាមប្រភពព័ត៌មានខ្លះគម្រោងអភិវឌ្ឍក្រុងរណបកោះនរា អាចនឹងចំណាយទឹកប្រាក់ដល់ទៅប្រមាណជាជិត២ពាន់លានដុល្លារអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ