ណាសាបញ្ជូនយានថ្មីមួយទៀតទៅរុករកជីវិតលើភពអង្គារ
ចុះផ្សាយនៅថ្ងៃ៖
ស្តាប់ - ០៨:៥៤
នៅសប្តាហ៍នេះ សេង ឌីណា សូមលើកឡើង អំពីបេសកកម្មរបស់ណាសា ក្នុងការបញ្ជូនយានរ៉ូវ័រថ្មីមួយទៀត ឈ្មោះថា Perseverance ឲ្យទៅស្វែងរកជីវិតលើភពអង្គារ ក៏ដូចជា ដើម្បីត្រៀមរៀបចំបេសកកម្មបញ្ជូនមនុស្សឲ្យទៅចុះចតលើភពអង្គារ នៅថ្ងៃអនាគត។
គិតមកទល់នឹងពេលនេះ មានយានគ្មានមនុស្សបើក (រ៉ូវ័រ) ចំនួន ៤រួចមកហើយ ដែលណាសាធ្លាប់បានបញ្ជូនដោយជោគជ័យ ទៅកាន់ភពព្រះអង្គារ គឺ Sojourner បាញ់បង្ហោះ នៅឆ្នាំ១៩៩៦, Opportunity និង Spirit នៅឆ្នាំ២០០៣ និង Curiosity នៅឆ្នាំ២០១១។
យានទី៥ គឺយានឈ្មោះ Perseverance ដែលណាសាគ្រោងបាញ់បង្ហោះ នៅថ្ងៃទី៣០កក្កដាខាងមុខនេះ គឺជាយានទំនើបជាងយានមុនៗ ហើយបេសកកម្មរបស់វាក៏មានលក្ខណៈពិសេសខុសពីបេសកកម្មមុនៗផងដែរ។
លក្ខណៈពិសេសទីមួយ គឺការស្វែងរកតម្រ៉ុយនៃជីវិត នៅលើភពព្រះអង្គារ។ ជាការពិតណាស់ថា ជីវិត ឬតម្រ៉ុយជីវិតដែលគេស្វែងរកតាមរយៈ Perseverance នេះ គឺត្រឹមជាទម្រង់ជីវិតសាមញ្ញ ដូចជា ប្រភេទបាក់តេរី តែប៉ុណ្ណោះ មិនមែនជាទម្រង់ជីវិតជឿនលឿនដូចជានៅលើផែនដីរបស់យើងនោះទេ។ ក៏ប៉ុន្តែ បើទោះបីត្រឹមជាទម្រង់ជីវិតជាបាក់តេរីនេះក៏ដោយ ប្រសិនបើគេពិតជាអាចរកឃើញមែន វាគឺជាចំណុចរបត់ដ៏សំខាន់មួយនៃការយល់ដឹងរបស់យើងចំពោះជីវិតក្រៅភព។
លក្ខណៈពិសេសមួយទៀតនៃបេសកកម្មរបស់យាន Perseverance គឺការត្រួសត្រាយផ្លូវ សម្រាប់បេសកកម្មបញ្ជូនមនុស្សទៅចុះចតលើភពព្រះអង្គារ ទៅថ្ងៃអនាគត។
នៅលើយាន Perseverance នេះ គេមានបំពាក់ឧបករណ៍ដ៏ទំនើបមួយ ដែលគេហៅតាមអក្សរកាត់ថា « MOXIE » ហើយដែលមុខងាររបស់វា គឺធ្វើពិសោធន៍មើល អំពីលទ្ធភាពក្នុងការទាញយកឧស្ម័នកាបូនិចនៅក្នុងបរិយាកាសនៃភពព្រះអង្គារ មកបំប្លែងទៅជាអុកស៊ីសែន ដែលនេះគឺជាគន្លឹះដ៏សំខាន់ នៃគម្រោងបញ្ជូនមនុស្សទៅភពព្រះអង្គារ ពីព្រោះថា នៅក្នុងបរិយាកាសរបស់ភពព្រះអង្គារ គឺមានឧស្ម័នកាបូនិចរហូតដល់ទៅជាង ៩០% បើគេអាចបំប្លែងឧស្ម័នកាបូនិចនេះទៅជាអុកស៊ីសែនបាន មានន័យថា គេនឹងអាចផលិតអុកស៊ីសែន សម្រាប់ដកដង្ហើម និងអាចផលិតឥន្ធនៈបាននៅលើដីព្រះអង្គារដោយផ្ទាល់ ដោយមិនចាំបាច់ដឹកពីភពផែនដីនេះទៅ។
លក្ខណៈពិសេសមួយទៀត របស់យាន Perseverance ហើយជាបេសកកម្មរឹតតែសំខាន់ទៅទៀត គឺការប្រមូលសំណាកជាដី ឬថ្ម ពីភពព្រះអង្គារ រួចហើយបញ្ជូនសំណាកទាំងនោះឲ្យត្រឡប់មកភពផែនដីវិញ ដើម្បីសិក្សាលម្អិត។
គិតមកទល់នឹងពេលនេះ រាល់ការសិក្សា និងពិសោធន៍ទាំងប៉ុន្មាន ដែលគេធ្វើនៅលើភពព្រះអង្គារ គឺត្រូវធ្វើឡើង ដោយឧបករណ៍ពិសោធន៍ ដែលគេបំពាក់នៅលើយាន ហើយថ្វីដ្បិតតែឧបករណ៍ទាំងនោះមានបច្ចេកវិទ្យាទំនើប ក៏ប៉ុន្តែ ពិសោធន៍ខ្លះ វាមានលក្ខណៈស្មុគស្មាញខ្លាំង ដែលគេចាំបាច់ត្រូវធ្វើដោយមន្ទីរពិសោធន៍ធំៗ នៅលើភពផែនដីរបស់យើងដោយផ្ទាល់។
ហេតុដូច្នេះហើយបានជានៅលើយាន Perseverance គេមានបំពាក់ឧបករណ៍សម្រាប់ធ្វើពិសោធន៍ផ្ទាល់លើដីភពព្រះអង្គារផង និងមានបំពាក់ផងដែរនូវឧបករណ៍ស្វ័យប្រវត្តិ ដែលអាចខួងយកសំណាកដាក់ក្នុងបំពង់ពិសេស ដើម្បីបញ្ជូនមកផែនដី នៅក្នុងបេសកកម្ម Mars Sample Return ដែលធ្វើឡើងរួមគ្នា រវាងទីភ្នាក់ងារណាសា និងទីភ្នាក់ងារអវកាសអឺរ៉ុប។
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាសា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ