លោក សម រង្ស៊ី ថាអាជ្ញាធរកលេសពីបញ្ហាព្រំដែន ដើម្បីចាប់ខ្លួនលោក រ៉ុង ឈុន
លោក សម រង្ស៊ី អតីតប្រធាននៃគណបក្សប្រឆាំង នៅថ្ងៃនេះ បានហៅការចាប់ខ្លួនលោក រ៉ុង ឈុន ប្រធានសហភាពសហជីពកម្ពុជា ថាជាលេស និងអះអាងថារឿង ដែលសំខាន់មិនមែនជារឿងព្រំដែនទេ តែជាបញ្ហាជីវភាពរស់នៅរបស់ប្រជាពលរដ្ឋ។ អ្នកនាំពាក្យក្រសួងយុត្តិធម៌ថា លោក រ៉ុង ឈុន បានប្រព្រឹត្តបទល្មើសជាក់ស្តែងតាមរយៈសកម្មភាពផ្សព្វផ្សាយលើ ហ្វេសប៊ុក ផ្ទាល់ខ្លួនអំពីព័ត៌មានមិនពិតទាក់ទងនឹងករណីព្រំដែន។
ចុះផ្សាយនៅថ្ងៃ៖
ក្រៅពីការអះអាងថាអាជ្ញាធរកលេសពីបញ្ហាព្រំដែន ដើម្បីចាប់ខ្លួនលោក រ៉ុង ឈុន, លោក សម រង្ស៊ី តាមរយៈវីដេអូនៅក្នុងបណ្តាញសង្គម ក៏បានអំពាវនាវឲ្យមានការចូលរួម ដើម្បីទាមទារឲ្យមានការដោះលែងលោក រ៉ុង ឈុនជាបន្ទាន់ និងឥតលក្ខខណ្ឌ។
កាលពីថ្ងៃទី១ ខែសីហា លោក រ៉ុង ឈុន ត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួន ជាបណ្តោះអាសន្ននៅពន្ធនាគារព្រៃស នៅក្រោមបទចោទញុះញង់ឱ្យមានការប្រព្រឹត្តបទឧក្រិដ្ឋជាអាទិ៍។
លោក សំ សុខគង់ មេធាវីការពារក្តីឱ្យលោក រ៉ុង ឈុន បានអះអាងប្រាប់វិទ្យុបារាំងអន្តរជាតិនៅថ្ងៃទី០២ ខែសីហានេះ ថា តាមរយៈអង្គហេតុ ភស្តុតាង តុលាការគួរតែផ្តល់យុត្តិធម៌ដល់កូនក្តីរបស់លោក ឬលើកលែងការចោទប្រកាន់ ដោយសារតែអង្គហេតុគឺមិនស្ថិតនៅក្នុងន័យ ដែលមានបញ្ញត្តិ នៅក្នុងមាត្រា៤៩៤ និងមាត្រ៤៩៥ទេ។ លោកបន្ថែមថា ដោយសារតែដំណាក់កាលនេះ ជាដំណាក់កាលស៊ើបអង្កេតនៅឡើយ ដូច្នេះក្រុមមេធាវីការពារក្តីនឹងព្យាយាមរកភស្តុតាង ក៏ដូចជាវិភាគលើអង្គហេតុ និងច្បាប់ ដើម្បីសុំឲ្យតុលាការទម្លាក់ការចោទប្រកាន់។
ប្រធានសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី ដែលបានចូលរួមតវ៉ាទាមទារឲ្យមានការដោះលែងលោក រ៉ុង ឈុន នៅព្រឹកថ្ងៃទី០២ ខែសីហានេះ បានអះអាងប្រាប់វិទ្យុបារាំងអន្តរជាតិថា លោក រ៉ុង ឈុន គ្រាន់តែជាអ្នកនាំសារពីប្រជាពលរដ្ឋ ដែលកំពុងជួបបញ្ហា ជម្រាបដល់រដ្ឋាភិបាល ដូច្នេះគាត់មិនមែនជាអ្នកញុះញង់ ឬធ្វើឲ្យមានចលាចលនៅក្នុងសង្គមទេ។ លោកស្រី បញ្ជាក់ថា បើតុលាការឯករាជ គួរតែរកយុត្តិធម៌ជូនលោក រ៉ុង ឈុន។
លោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌ នៅថ្ងៃទី២ ខែសីហានេះ បានអះអាងថា ជនណាដែលផ្សព្វផ្សាយព័ត៌មានមិនពិតករណីព្រំដែន គឺជាអំពើញុះញង់បង្កឲ្យមានភាពវិកវរធ្ងន់ធ្ងរដល់សន្តិសុខសង្គម តាមមាត្រា ៤៩៥ នៃក្រមព្រហ្មទណ្ឌ។ លោក គឹម សន្តិភាព បញ្ជាក់ថា លោក រ៉ុង ឈុន បានប្រព្រឹត្តបទល្មើសជាក់ស្តែងតាមរយៈសកម្មភាពផ្សព្វផ្សាយលើ ហ្វេសប៊ុក (Facebook page) ផ្ទាល់ខ្លួនអំពីព័ត៌មានមិនពិតទាក់ទងនឹងករណីព្រំដែនដូចអ្វីដែលមានក្នុងសេចក្តីថ្លែងការណ៍របស់គណៈកម្មាធិការចម្រុះកិច្ចការព្រំដែន ហេតុនេះការអនុវត្តវិធានការច្បាប់លើសកម្មភាពល្មើសច្បាប់នេះមិនមានអ្វីចម្លែកនោះទេ។
គួរជំរាបជូនថា លោក រ៉ុង ឈុន គឺជាអតីតសមាជិកគណៈកម្មាធិការជាតិរៀបចំការបោះឆ្នោត គ.ជ.ប និងជាអតីតប្រធានសមាគមគ្រូបង្រៀនកម្ពុជាឯករាជ្យ។ លោកត្រូវបានអាជ្ញាធរកម្ពុជាចាប់ខ្លួន កាលពីវេលាម៉ោងជិត១០យប់ ថ្ងៃទី ៣១ កក្កដា ក្រោមការចោទប្រកាន់ថា បានបំភ្លៃរឿងព្រំដែនកម្ពុជា-វៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ