កម្ពុជា-វៀតណាម បោះពុម្ពផែនទីព្រំដែនខ្នាត១លើ២៥ពាន់ ខណៈអ្នករិះគន់ថាជាផែនទីសម្ងាត់
ផែនទីព្រំដែនថ្មីខ្នាត១/២៥ ០០០ ត្រូវបានមន្ត្រីកិច្ចការព្រំដែនកម្ពុជាទៅទទួលយកផ្ទាល់ដៃពីមន្ត្រីកិច្ចការព្រំដែនវៀតណាមនៅច្រកទ្វារព្រំដែនអន្តរជាតិម៉ុកបាយ ខេត្តតៃនិញ ប្រទេសវៀតណាម កាលពីថ្ងៃទី១ខែសីហាឆ្នាំ២០២០នេះ។ សម្រាប់មន្ត្រីជាន់ខ្ពស់កិច្ចការព្រំដែនកម្ពុជាបានហៅផែនទីថ្មីនេះថាជាផែនទី«សម័យទំនើប» ប៉ុន្តែមន្ត្រីជំនាញព្រំដែនរបស់អតីតគណបក្សប្រឆាំងបានហៅផែនទីថ្មីខ្នាត១/២៥ ០០០នេះថាជា«ផែនទីសម្ងាត់ដែលគូសវាសដោយវៀតណាម»ឲ្យកម្ពុជាប្រើប្រាស់។
ចុះផ្សាយនៅថ្ងៃ៖
ស្តាប់ - ០២:២៧
ការប្រគល់ និងទទួលយកផែនទីខ្នាត១/២៥ ០០០ សម្រាប់កំណត់ព្រំដែនកម្ពុជា និងវៀតណាមនេះ ត្រូវបានធ្វើឡើងនៅចំពោះមុខ គណៈប្រតិភូកម្ពុជាដឹកនាំដោយ លោក វ៉ា គឹមហុង និងគណៈប្រតិភូវៀតណាមដឹកនាំដោយ លោក ឡេ ហួយទ្រុង អនុរដ្ឋមន្រ្តី ក្រសួងការបរទេស និងជាប្រធានគណៈកម្មការចម្រុះខណ្ឌសីមា និងបោះបង្គោលព្រំដែនគោកភាគីវៀតណាម។
លោកស្រី កុយ ពិសី អនុប្រធាន លេខាធិការដ្ឋានអចិន្រ្តៃយ៍នៃអាជ្ញាធរជាតិទទួលបន្ទុកកិច្ចការព្រំដែកម្ពុជា និង លោក ហ៊្វូង ថេឡុង អនុប្រធានគណៈកម្មការព្រំដែនរដ្ឋនៃក្រសួងការបរទេសវៀតណាមគឺជាអ្នកធ្វើការត្រួតពិនិត្យផ្ទៀងផ្ទាត់ និងឯកភាពទទួលយក សៀវភៅផែនទីឋានលេខាព្រំដែន ដែលបានចងក្រងរួច ចំនួន ៥០០ច្បាប់ដើម។ ក្នុងនោះភាសាខ្មែរ-វៀតណាមចំនួន២៥០ច្បាប់ និងភាសាវៀតណាម-ខ្មែរចំនួន ២៥០ច្បាប់ ដែលបានចងជាអាល់ប៊ុម (album) ត្រូវតាមបទដ្ឋានបច្ចេកទេស ដើម្បីទុកប្រើប្រាស់ក្នុងប្រទេសរៀងៗខ្លួន។ នេះបើតាមហ្វេសប៊ុករបស់លោកស្រី កុយ ពិសី។
បើតាមមន្ត្រីជាន់ខ្ពស់កិច្ចការព្រំដែនដដែលនេះ ផែនទីឋានលេខាព្រំដែនកម្ពុជា-វៀតណាម មាត្រដ្ឋាន ១/២៥ ០០០ នេះ បានបង្ហាញពេញលេញលទ្ធផល ខណ្ឌសីមា និងបោះបង្គោលព្រំដែន ប្រមាណជា៨៤% ដែលប្រទេសទាំងពីសម្រេចបាន។ ផែនទីនេះ ជាផែនទីទំនើបសម័យឌីជីថល ៤.0 ដែលបង្ហាញយ៉ាងច្បាស់លាស់ខ្សែព្រំដែន បង្គោលព្រំដែន រួមនិងស្ថានភាពភូមមិសាស្រ្តនៅ លើដីជាក់ស្តែងបានយ៉ាងជាក់លាក់ ងាយស្រួលក្នុងការ ប្រើប្រាស់ មិនដូចផែនទីបោនខ្នាត ១/១00 ០០០ នោះទេ។
ប៉ុន្តែលោក អ៊ុំ សំអាន មន្ត្រីជំនាញ ព្រំដែនរបស់អតីតគណបក្សសង្រ្គោះជាតិ បានហៅផែនថ្មីខ្នាត១/២៥ ០០០នេះថាជា«ផែនទីសម្ងាត់ដែលគូសវាសដោយវៀតណាម»ឲ្យកម្ពុជា។ អ្នករិះគន់ព្រំដែនដែលធ្លាប់ជាប់ពន្ធនាគាររូបនេះ បានជំរុញឲ្យរដ្ឋាភិបាលកម្ពុជាបង្ហាញផែនទីខ្នាត១/២៥ ០០០នេះជាសាធារណៈដើម្បីឲ្យកូនខ្មែរបានមើលនិងបានដឹង ព្រមទាំងធ្វើការផ្ទៀងផ្ទាត់ផែនទីថ្មីនេះជាមួយផែនទីបោន ខ្នាត ១/១០០ ០០០ របស់បារាំង ថាតើមានភាពខុសគ្នាឬយ៉ាងណា?
យ៉ាងណាក៏ដោយ លោកស្រី កុយ ពិសី គូសបញ្ជាក់ថា ផែនទីខ្នាត ១/២៥ ០០០នេះ គឺមិនមែនគូសដោយវៀតណាមនោះទេ គឺគូសដោយភាគីទាំងពីរ ហើយបោះពុម្ភដោយក្រុមហ៊ុននៅប្រទេសដាណឺម៉ាក តាមសំណើរបស់កម្ពុជានិងវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ