ក្រុមអ្នកគាំទ្រប្រើប្រាស់យុទ្ធនាការតាមហ្វេសប៊ុក និងផ្តុំការតវ៉ាផ្ទាល់ ដើម្បីទាមទារឱ្យដោះលែងលោករ៉ុង ឈុន
គិតមកដល់ថ្ងៃនេះ គឺថ្ងៃទី៤ហើយដែលលោករ៉ុង ឈុន ត្រូវបានអាជ្ញាធរកម្ពុជាចាប់ខ្លួនក្រោយនិយាយពាក់ព័ន្ធនឹងបញ្ហាព្រំដែនកម្ពុជា-វៀតណាម។ ការចាប់ខ្លួននេះ បង្កជាភាពចម្រូងចម្រាសយ៉ាងខ្លាំង។ ក្រុមអ្នកគាំទ្រ អ្នកនយោបាយ អ្នកវិភាគ អ្នកឃ្លាំមើល និងមន្រ្តីអង្គការសង្គមស៊ីវិលមួយចំនួនបានប្រើប្រាស់គណនី ឬ ទំព័រហ្វេសប៊ុកផ្ទាល់ខ្លួនទាមទារឱ្យអាជ្ញាធររដ្ឋាភិបាល ក៏ដូចជាតុលាការកម្ពុជាដោះលែងលោករ៉ុង ឈុន ឱ្យមានសេរីភាពឡើងវិញ។ ចំណែក អ្នកគាំទ្រមួយចំនួនទៀតបានប្រមូលផ្តុំគ្នានៅមុខតុលាការក្រុងភ្នំពេញក្នុងគោលបំណងទាមទារឱ្យដោះលែងដូចគ្នានេះ។
ចុះផ្សាយនៅថ្ងៃ៖
ស្តាប់ - ០២:៤០
យុទ្ធនាការទាមទារឱ្យដោះលែងនេះ ធ្វើឡើងចាប់តាំងពីអាជ្ញាធររដ្ឋាភិបាលកម្ពុជាបានចាប់ខ្លួនលោករ៉ុង ឈុន ភ្លាមៗមកម្លេះ។ ការប្រមូលផ្តុំតវ៉ាដោយផ្ទាល់ទាមទារឱ្យដោះលែងលោករ៉ុង ឈុននេះ បានចេញរូបរាងកាន់តែច្បាស់នៅពេលដែលអាជ្ញាធរបញ្ជូនលោករ៉ុង ឈុន ទៅកាន់តុលាការសាលារាជធានីភ្នំពេញ ដើម្បីសួរចម្លើយ និង ចោទប្រកាន់កាលពីថ្ងៃទី១ ខែសីហា។ ក្រុមអ្នកគាំទ្រក្នុងចំនួនមិនច្រើនប៉ុន្មាន បានទៅប្រមូលផ្តុំគ្នានៅពីមុខតុលាការ ដោយបានលើកបដាជាហូរហែរផង ដោយសរសេរជាភាសាខ្មែរ និងអង់គ្លេសទាមទារដោះលែងលោករ៉ុង ឈុន។ ក្រៅពីលើកបដាទាំងនេះ ក៏បានស្រែកទាមទារឱ្យដោះលែងលោករ៉ុង ឈុន តាមឧឃោសនស័ព្ទថែមទៀតផងដែរ។ មកដល់ថ្ងៃទី៣ ខែសីហានេះ ការធ្វើប្រមូលផ្តុំតវ៉ានៅតែបន្តធ្វើ។
បន្ថែមពីលើការជួបជុំគ្នាទាមទារដោយផ្ទាល់នេះ អ្នកគាំទ្រមួយចំនួន ជាពិសេស អ្នកនយោបាយ អ្នកវិភាគ អ្នកឃ្លាំមើល អ្នកតាមដាន ក៏ដូចជាមន្រ្តីអង្គការសង្គមស៊ីវីលខ្លះបានប្រើប្រាស់បណ្តាញសង្គមហ្វេសប៊ុកទាមទារឱ្យដោះលែងលោករ៉ុង ឈុន។ យុទ្ធនាការតាមបណ្តាញសង្គមនេះ គឺអ្នកខ្លះបានបន្ថែមរូបលោករ៉ុង ឈុន អមដោយឃ្លាជាភាសាខ្មែរ និងអង់គ្លេស«ដោះលែងរ៉ុង ឈុន»ភ្ជាប់ជាមួយរូបភាពចាស់លើគណនីហ្វេសប៊ុករបស់ខ្លួន។ ខ្លះទៀតមិនបានធ្វើដូច្នេះទេ គឺគ្រាន់តែសរសេរទាមទារឱ្យដោះលែងលោករ៉ុង ឈុន។ រីឯមួយចំនួនទៀត មិនបានទាមទារឱ្យដោះលែងលោករ៉ុង ឈុនចំៗនោះឡើយ ប៉ុន្តែសរសេរបែបផ្សេងវិញ។
ជាក់ស្តែង លោកបណ្ឌិតឡៅ ម៉ុងហៃ អ្នកវិភាគនយោបាយកម្ពុជាបានសរសេរលើទំព័រហ្វរសប៊ុកថា បើលោករ៉ុង ឈុន និយាយការពិត គឺមិនមានអីសម្រាប់ចោទថា គាត់ញុះញង់ និងចាប់ខ្លួនគាត់នោះទេ។ ចំណែក លោកពេជ្រ ស្រស់ ដែលជាប្រធានគណបក្សយុវជនកម្ពុជាវិញ លោកបានទាមទារឱ្យដោះលែងលោក រ៉ុង ឈុន ដើម្បីខ្មែរគ្រប់ភាគីរឹងមាំ និងបង្ហាញនូវភាពខ្លាំងខ្មែរតែមួយ។ លោកក៏បានចាត់ទុកការចាប់ខ្លួនលោករ៉ុង ឈុនថា ប្រៀបបានផ្តល់កាដូឱ្យប្រទេសវៀតណាម ហើយកាន់តែធ្វើឲ្យខ្មែរមានការប្រេះឆាផ្ទៃក្នុងបន្ថែមទៀត បើទោះបីជាលោក រ៉ុង ឈុន និយាយលើស ឬគ្មានមូលដ្ឋានច្បាស់លាស់ក៏ពិតមែន ប៉ុន្តែភាគីរដ្ឋាភិបាលអាចចេញសេចក្តីថ្លែងការណ៍បដិសេធបាន។
សូមបញ្ជាក់ថា លោករ៉ុង ឈុន តំណាងក្រុមប្រឹក្សាឃ្លាំមើលកម្ពុជា និងជាប្រធានសហភាពសហជីពកម្ពុជាត្រូវបានអាជ្ញាធរចាប់ខ្លួនកាលពីវេលាម៉ោងប្រមាណជាង ០៩យប់ នាថ្ងៃទី ៣១ កក្កដា ឆ្នាំ ២០២០។ ការចាប់ខ្លួននេះ ធ្វើឡើងបន្ទាប់ពីរូបលោកតាមរយៈវិទ្យុអាស៊ីសេរីបាននិយាយពាក់ព័ន្ធនឹងបញ្ហាព្រំដែនរវាកម្ពុជា និងវៀតណាមនៅក្នុងខេត្តត្បូងឃ្មុំ។ ក្រោយមក លោករ៉ុង ឈុន ត្រូវបានសាលាដំបូងរាជធានីភ្នំពេញចោទប្រកាន់ពីបទញុះញង់បង្កឱ្យមានភាពវិកវរធ្ងន់ធ្ងរដល់សន្តិសុខសង្គម និង បានឃុំខ្លួនបណ្តោះអាសន្ននៅក្នុងពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ