សល់១០០០ថ្ងៃទៀត៖កម្ពុជាបង្កើតការផ្សព្វផ្សាយពីស៊ីហ្គេមឆ្នាំ២០២៣ ដែលខ្លួនធ្វើជាម្ចាស់ផ្ទះ
ព្រឹត្តិការណ៍នៃការរាប់ថយក្រោយ ១០០០ថ្ងៃ ដំណើរឆ្ពោះទៅកាន់ស៊ីហ្គេម ឆ្នាំ២០២៣ ត្រូវបានរៀបចំឡើងកាលពីល្ងាចថ្ងៃម្សិលមិញ នៅពហុកីឡាដ្ឋានថ្មីក្នុងខណ្ឌជ្រោយចង្វារ។ នៅចំពោះមុខនេះ កម្ពុជាដែលជាម្ចាស់ផ្ទះរៀបចំប្រកួតកីឡាអាស៊ីអាគ្នេយ៍ឆ្នាំ២០២៣ កំពុងតែខិតខំបង្កើនការផ្សព្វផ្សាយរបស់ខ្លួនដើម្បីអនុវត្តផែនការមេ និងផែនទីបង្ហាញផ្លូវ ឆ្ពោះទៅរកភាពជោគជ័យក្នុងព្រឹត្តិការណ៍ជាប្រវត្តិសាស្ត្រមួយនេះ។
ចុះផ្សាយនៅថ្ងៃ៖
ស្តាប់ - ០១:៥១
ប្រធានគណៈកម្មាធិការជាតិរៀបចំព្រឹត្តិការណ៍ស៊ីហ្គេមលើកទី៣២ ឆ្នាំ២០២៣ ដែលហៅកាត់ថា CAMSOC លោក ទៀ បាញ់ បានថ្លែងថា រយៈពេល ១០០០ថ្ងៃ គឺជាពេលវេលាដ៏សំខាន់ក្នុងយុទ្ធនាការត្រៀមលក្ខណៈសម្បត្តិឲ្យបានគ្រប់ជ្រុងជ្រោយ ដោយត្រូវពង្រឹងស្មារតី សាមគ្គីភាពផ្ទៃក្នុង ការយោគយល់គ្នា និងភាពចុះសម្រុងប្រទាក់ក្រឡា រវាងគណៈកម្មការជំនាញ និងភាគីពាក់ព័ន្ធ ដោយជម្នះរាល់ឧបសគ្គរាំងស្ទះ ដល់ដំណើរការឆ្ពោះទៅស៊ីហ្គេម ឆ្នាំ២០២៣ ទាំងអស់គ្នា។
ក្នុងរយៈពេល១០០០ថ្ងៃនេះ ប្រធាន CAMSOC ក៏បានជំរុញឲ្យអាជ្ញាធររាជធានី-ខេត្ត ត្រូវខិតខំបង្កើនការផ្សព្វផ្សាយពីកីឡាស៊ីហ្គេមឲ្យជ្រួតជ្រាបដល់សាធារណៈជន ដែលកម្ពុជាធ្វើជាម្ចាស់ផ្ទះ ក្នុងប្រវត្តិសាស្ត្រនេះ ឲ្យបានទូលំទូលាយ ដោយប្រើប្រាស់ ស្លាកសញ្ញា (Logo) និងរូបសត្វតំណាង (Mascot) យ៉ាងហោចណាស់ មួយផ្ទាំងនៅតាមសួនសាធារណៈមួយកន្លែង។
ការជំរុញការផ្សព្វផ្សាយនេះ គឺធ្វើឡើង បន្ទាប់ពី គណៈកម្មាធិការ CAMSOC សម្រេចជ្រើសរើសស្លាកសញ្ញា (Logo) និងរូបសត្វតំណាង(Mascot) សម្រាប់ប្រើផ្លូវការក្នុងព្រឹត្តិការណ៍ស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣។
លោក ទៀ បាញ់ បានគូសបញ្ជាក់ថា Logo និង Mascot ដែលជាមរតករបស់ស៊ីហ្គេមនេះ គឺជាកម្មសិទ្ធិបញ្ញារបស់ CAMSOC ដែលមិនអាចមានបុគ្គលណា ឬក្រុមណា យកទៅប្រើដោយគ្មានការអនុញ្ញាតពី CAMSOC បានឡើយ ខណៈ Logo និង Mascot នេះត្រូវបានស្នើសុំក្រសួងពាណិជ្ជកម្មចុះបញ្ជីកម្មសិទ្ធិបញ្ញារួចហើយ។
សូមបញ្ជាក់ថា ការប្រកួតកីឡាស៊ីហ្គេមលើកទី៣២ដែលកម្ពុជាធ្វើជាម្ចាស់ផ្ទះនេះគឺនឹងចាប់ផ្តើមពីថ្ងៃទី០៥ ដល់ថ្ងៃទី១៧ ខែឧសភា ឆ្នាំ២០២៣ និងអាស៊ានប៉ារ៉ាហ្គេម លើកទី១២ ចាប់ពីថ្ងៃទី០១ ដល់ថ្ងៃទី១០ ខែមិថុនា ឆ្នាំ២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ