យុវតីម្នាក់ត្រូវបានបញ្ជូនទៅកាន់តុលាការពីបទ «ញុះញង់បង្កអោយមានភាពវឹកវរធ្ងន់ធ្ងរដល់សន្តិសុខសង្គម»
អាជ្ញាធររដ្ឋាភិបាលកម្ពុជា កាលពីរសៀលថ្ងៃទី ០៧ សីហា ម្សិលមិញនេះ បានឃាត់ខ្លួនយុវជន៣នាក់ក្នុងនោះមានយុវតីម្នាក់ បន្ទាប់ពីពួកគេបានចូលរួមនៅក្នុងសកម្មភាពតវ៉ាអោយមានការដោះលែងលោក រ៉ុង ឈុន កាលពីដើមសប្តាហ៍នេះ។ ក្រោយពីការឃាត់ខ្លួនអស់រយៈពេលជិត៣ម៉ោង យុវជនជាបងប្អូនភ្លោះពីរនាក់ឈ្មោះ ជុំ ហួត និងជុំ ហួរ ត្រូវបានអាជ្ញាធរដោះលែងមកវិញ ខណៈយុវតីម្នាក់ ឈ្មោះ ស កន្និកា ត្រូវបានបញ្ជូនខ្លួនទៅកាន់តុលាការពីបទ «ញុះញង់បង្កអោយមានភាពវឹកវរធ្ងន់ធ្ងរដល់សន្តិសុខសង្គម»។
ចុះផ្សាយនៅថ្ងៃ៖
ស្តាប់ - ០២:២៩
បើតាមអ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន បានអោយដឹងថា កញ្ញា ស កន្និកា ត្រូវបានអាជ្ញាធរបញ្ជូនខ្លួនទៅកាន់តុលាការក្រុងភ្នំពេញ កាលពីល្ងាចថ្ងៃទី ០៧ សីហា ក្រោមការចោទប្រកាន់ពីបទ «ញុះញង់បង្កអោយមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា ៤៩៥ នៃក្រមព្រហ្មទណ្ឌកម្ពុជា។ កញ្ញា ស កន្និកា ត្រូវបានកងកម្លាំងស្នងការដ្ឋាននគរបាលជាតិចាប់ខ្លួន តាមដីកាចោទប្រកាន់របស់តុលាការក្រុងភ្នំពេញ ក្រោយពីបានចូលរួមនៅក្នុងសកម្មភាពតវ៉ាអោយមានការដោះលែង លោក រ៉ុង ឈុន អតីតប្រធានសមាគមគ្រូបង្រៀនកម្ពុជាឯករាជ្យ កាលពីដើមសប្តាហ៍នេះ។
កញ្ញា ស កន្និកា ដែលគេស្គាល់ថា ជាសកម្មជននៃអតីតគណបក្សសង្គ្រោះជាតិ ត្រូវបានកងកម្លាំងអគ្គស្នងការដ្ឋាននគរបាលជាតិឃាត់ខ្លួនជាមួយបងប្អូនភ្លោះពីរនាក់ឈ្មោះ ជុំ ហួត និង ជុំ ហួរ កាលពីរសៀល ថ្ងៃទី ០៧ សីហា នៅមុខភោជនីយដ្ឋានទន្លេបាសាក់២ បន្ទាប់ពីពួកគេបានចេញមកពីចូលរួមសិក្ខាសាលាមួយ។ យ៉ាងណាមិញ បងប្អូនភ្លោះពីរនាក់ឈ្មោះ ជុំ ហួត និង ជុំ ហួរ ត្រូវបានអាជ្ញាធរដោះលែងមកវិញ ក្រោយពីការសាកសួរអស់រយៈពេល៣ម៉ោង និងក្រោយពីការធ្វើកិច្ចសន្យាបញ្ឈប់ការចូលរួមសកម្មភាព ឬ ចលនាតវ៉ានានា។ ផ្ទុយពីនេះ កញ្ញា ស កន្និកា បន្ទាប់ពីបាត់ដំណឹងសូន្យឈឹងនោះ ត្រូវបានសមត្ថកិច្ចបញ្ជូនខ្លួនទៅកាន់តុលាការសាលាដំបូងរាជធានីភ្នំពេញនៅល្ងាចថ្ងៃដដែលនោះ។ នេះបើតាមការអោយដឹងពីលោក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាលជាតិ។
គួរជំរាបជូនដែរថា កាលពីថ្ងៃទី ០៥ សីហា អាជ្ញាធររដ្ឋាភិបាលកម្ពុជា ក៏បានឃាត់ខ្លួនមនុស្ស៤នាក់ ដែលគេស្គាល់ថា ជាអតីតសកម្មជនគណបក្សប្រឆាំង ខណៈដែលពួកគេបានចូលរួមនៅក្នុងសកម្មភាពតវ៉ាទាមទារអោយមានការដោះលែង លោក រ៉ុង ឈុន។ ស្នងការនគរបាលក្រុងភ្នំពេញអះអាងថា សកម្មជន ពីរនាក់ក្នុងចំណោម៤នាក់នោះ ត្រូវឃាត់ខ្លួនក្នុងបទល្មើស «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខជាតិ» ដោយទទួលផែនការយ៉ាងច្បាស់លាស់ពីថ្នាក់ដឹកនាំរបស់ពួកគេ ទាំងខាងក្នុងទាំងខាងក្រៅ ឱ្យប្រមូលផ្តុំកម្លាំងនៅតាមសង្កាត់ នីមួយៗចំនួន៣នាក់ ដើម្បីតវ៉ាសុំឱ្យដោះលែងលោក រ៉ុង ឈុន។ ប៉ុន្តែក្រោយមក សកម្មជនពីរនាក់ គឺលោក អ៊ុក សំអូន និងអ្នកស្រី ឈិន សុវណ្ណា ត្រូវបានអនុញ្ញាតឲ្យត្រឡប់ទៅផ្ទះវិញបន្ទាប់ពីធ្វើការអប់រំ។ ចំណែកលោក ទុំ វុទ្ធី ដែលគេស្គាល់ថា ជាអតីតសមាជិកគណៈកម្មការប្រតិបត្តិខេត្តស្វាយរៀងនៃអតីតគណបក្សសង្គ្រោះជាតិ និងឈ្មោះ ឈួ ផេង ត្រូវបានសមត្ថកិច្ចបញ្ជូនខ្លួនទៅតុលាការពីបទ «ញុះញង់បង្កអោយមានភាពវឹកវរធ្ងន់ធ្ងរដល់សន្តិសុខសង្គម» តាមមាត្រា ៤៩៥ នៃក្រមព្រហ្មទណ្ឌកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ