រដ្ឋាភិបាលកាត់ដីឧទ្យានជាតិបុទុមសាគរ១៦៨ហិកតា ជួលឲ្យយក្រុមហ៊ុនឯកជនសាងសង់រោងចក្រអគ្គិសនីធ្យូងថ្ម
រដ្ឋាភិបាលកម្ពុជាបានសម្រេចធ្វើអនុបយោគទ្រព្យសម្បត្តិសាធារណៈរបស់រដ្ឋលើដីទំហំជាង១៦៨ហិចតា ស្ថិតនៅក្នុងឧទ្យានជាតិបុទុមសាគរ ខេត្តកោះកុង ដើម្បីជួលឲ្យក្រុមហ៊ុន រ៉ូយ៉ាល់ គ្រុប របស់លោកឧកញ៉ា គិត ម៉េង សាងសង់ជារោងចក្រផលិតថាមពលអគ្គិសនីធ្យូងថ្ម ដែលមានអនុភាព ៧០០មេហ្គាវ៉ាត់។ ពីចំណែកអង្គការសង្គមស៊ីវិលវិញ ចង់ឃើញរដ្ឋាភិបាលបង្ហាញពីរបាយការណ៍សិក្សាលើផលប៉ះពាល់ផ្នែកសង្គម និងបរិស្ថាន មុនមានការសម្រេច។
ចុះផ្សាយនៅថ្ងៃ៖
តើអ្វីជាការប្រើប្រាស់ដោយចីរភាព? តើតំបន់ធម្មជាតិ បឹង ទន្លេ សមុទ្រ ប៉ុន្មានទើបកំណត់ថា គ្រប់សម្រាប់ការអភិវឌ្ឍន៍? ទាំងនេះ គឺជាសំណួរតែមិនទាន់មានចម្លើយរបស់នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព ក្រោយពីរដ្ឋាភិបាលកម្ពុជាបានសម្រេចធ្វើអនុបយោគទ្រព្យសម្បត្តិសាធារណៈរបស់រដ្ឋលើដីទំហំជាង ១៦៨.៨០ ហិចតា ស្ថិតនៅក្នុងឧទ្យានជាតិបុទុមសាគរ ខេត្តកោះកុង ជួលអោយក្រុមហ៊ុន រ៉ូយ៉ាល់គ្រុប របស់លោកឧកញ៉ា គិត ម៉េង សាងសង់រោងចក្រផលិតថាមពលអគ្គិសនីធ្យូងថ្ម ដែលមានអនុភាព ៧០០ មេហ្គាវ៉ាត់។
តាមរយៈទំព័រហ្វេសប៊ុករបស់ខ្លួន លោកស្រី ចក់ សុភាព បានលើកជាសំណួរទៀតថា តើអភិវឌ្ឍន៍ដើម្បីអ្នកណា? តើអ្នកណានឹងប៉ះពាល់ពីរាល់ផលជះទាំងនោះ? តើពលរដ្ឋ សហគមន៍ នឹងអាចចូលរួមក្នុងដំណើរការសម្រេចចិត្តដូចនេះដោយរបៀបណា? បន្ថែមលើនេះ លោក អៀង វុទ្ធី នាយកប្រតិបត្តិអង្គការសមធម៌កម្ពុជា និងលោក សាំង សែនករុណា អ្នកនាំពាក្យសមាគមការពារសិទ្ធិមនុស្សអាដហុក ក៏បានលើកឡើងពីការព្រួយបារម្ភរបស់ពួកគេ ពីគម្រោងអភិវឌ្ឍន៍ខាងលើនេះដែរ។ សម្រាប់មន្ត្រីអង្គការសង្គមស៊ីវិលទាំងពីរខាងលើនេះ ចង់ឃើញរដ្ឋាភិបាលកម្ពុជា បង្ហាញពីរបាយការណ៍សិក្សាលើផលប៉ះពាល់ទាំងផ្នែកសង្គម និងបរិស្ថាន ជាមុនសិន មុនមានការសម្រេចជួលដីឧទ្យានជាតិ ទៅអោយក្រុមហ៊ុនឯកជនបែបនេះ។
យ៉ាងណាក៏ដោយ លោក នេត្រ ភក្ត្រា រដ្ឋលេខាធិការនិងជាអ្នកនាំពាក្យក្រសួងបរិស្ថានបានអះអាងថា រដ្ឋាភិបាលកម្ពុជា បានធ្វើការសិក្សានិងវាយតម្លៃរួចហើយ មុននឹងសម្រេចលើគម្រោងមួយនេះ។ បើតាមលោក នេត្រ ភក្ត្រា មានប្រជាពលរដ្ឋចំនួន៥៨គ្រួសារដែលរងផលប៉ះពាល់ពីគម្រោងនេះ បានទទួលការការដោះស្រាយពីខាងភាគីក្រុមហ៊ុនរួចហើយ។
គួរជំរាបជូនថា យោងតាមអនុក្រឹត្យរបស់រដ្ឋាភិបាលកម្ពុជា ចុះថ្ងៃទី ០៦ សីហា រដ្ឋាភិបាលកម្ពុជា បានសម្រេចធ្វើអនុបយោគដីទំហំ១៦៨.៨០ហិកតា ស្ថិតនៅក្នុងឧទ្យានជាតិបុទុមសាគរ ស្ថិតក្នុងភូមិថ្មស និងភូមិចម្លងគោ ឃុំថ្មស ស្រុកបទុមសាគរ ខេត្តកោះកុង ពីទ្រព្យសម្បត្តិសាធារណៈរបស់រដ្ឋមកជាទ្រព្យសម្បត្តិឯកជនរបស់រដ្ឋ ក្រោមលក្ខខណ្ឌជួលអោយក្រុមហ៊ុន រ៉ូយ៉ាល់ គ្រុប ខូ អិលធីឌី សម្រាប់គម្រោងអភិវឌ្ឍន៍រោងចក្រអគ្គិសនីដុតធ្យូងថ្មដែលមានអានុភាព ៧០០មេហ្គាវ៉ាត់។ គម្រោងនេះ មានទុនវិនិយោគសរុប ១៣៤៤.២០ លានដុល្លារ ក្នុងនោះ មានទុនផ្ទាល់៣០ភាគរយ និង៧០ភាគរយ ជាទុនដែលបានមកពីកម្ចីធនាគារ។ ដោយឡែក រយៈពេលនៃការជួលវិញ គឺមានរយៈពេល៣៨ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ