អ្នកឃ្លាំមើលសង្គម៖ដីដែលវៀតណាមនឹងផ្តល់ឱ្យជាង២ពាន់ហិកតា កម្ពុជាត្រូវបង្ហាញឱ្យច្បាស់ដើម្បីបំបាត់ការសង្ស័យ
អ្នកឃ្លាំមើលបញ្ហាសង្គមនៅកម្ពុជា បានអំពាវនាវឱ្យរដ្ឋាភិបាលកម្ពុជាបង្ហាញឱ្យបានច្បាស់លាស់ពីផ្ទៃដីដែលវៀតណាមគ្រោងនឹងប្រគល់ដល់កម្ពុជាចំនួនជាង២ពាន់ហិកតា បន្ទាប់ពីបានដោះដូរគ្នា។ ការធ្វើបែបនេះ គឺដើម្បីបំបាត់ការសង្ស័យរបស់ប្រជាពលរដ្ឋចំពោះបញ្ហាទឹកដីនេះ។ ការអំពាវនាវរបស់អ្នកឃ្លាំមើលបញ្ហាសង្គម គឺបន្ទាប់ពីប្រមុខរដ្ឋាភិបាលកម្ពុជាបានប្រកាសឱ្យដឹងកាលពីចុងសប្តាហ៍មុនថា កម្ពុជានឹងទទួលបានផ្ទៃដីជាង២ពាន់ហិកតាពីប្រទេសវៀតណាម។
ចុះផ្សាយនៅថ្ងៃ៖
ស្តាប់ - ០២:២៦
លោកបណ្ឌិតមាស នី អ្នកសិក្សាស្រាវជ្រាវ ដើម្បីការអភិវឌ្ឍសង្គម បានសម្តែងនូវការអបអរសាទរដែលកម្ពុជានឹងទទួលបានផ្ទៃដីជាង២ពាន់ហិកតាពីប្រទេសវៀតណាម។ ប៉ុន្តែជាមួយការអបអរសាទរនេះ លោកបានគូសបញ្ជាក់ប្រាប់វិទ្យុអន្តរជាតិនៅព្រឹកថ្ងៃព្រហស្បតិ៍នេះថា រដ្ឋាភិបាលកម្ពុជាត្រូវធ្វើរឿងនេះឱ្យច្បាស់លាស់។ ច្បាស់លាស់ គឺបង្ហាញឱ្យប្រជាពលរដ្ឋបានដឹងពីរបៀបនៃការដោះដូរដីគ្នា ហើយដោះដូរនៅម្តុំណា និង ហេតុអ្វីបានជាវៀតណាមសុខចិត្តប្រគល់ដីទាំងនេះដល់កម្ពុជា។ សម្រាប់លោកបណ្ឌិតមាស នី បញ្ហានេះ គឺជារឿងសំខាន់ដែលរដ្ឋាភិបាលកម្ពុជាត្រូវធ្វើវាឱ្យមានតម្លាភាព ដើម្បីបំបាត់ការសង្ស័យរបស់ប្រជាពលរដ្ឋ និង កុំមានភាពចម្រូងចម្រាសគ្នាតទៅទៀត។
ប៉ុន្តែ លោកបណ្ឌិតគិន ភា ដែលជាអ្នកជំនាញផ្នែកវិទ្យាសាស្រ្តនយោបាយវិញ លោកយល់ថា បញ្ហាដីជាង២ពាន់ហិកតានេះ ជារឿងធំដែលមិនអាចលើកមកជជែកវែកញែកជាសាធារណៈបានទេ។ ផ្ទុយទៅវិញ គឺត្រូវធ្វើឡើងដោយប្រុងប្រយ័ត្ន និងមិនអាចនិយាយបានថា កម្ពុជា ឬវៀតណាមជាអ្នកខាតនៅក្នុងការដោះដូរគ្នានេះឡើយ។ បើតាមលោកបណ្ឌិតគិន ភា រដ្ឋាភិបាលប្រហែលជាមិនអាចបង្ហាញលម្អិតពីនីតិវិធី និងបច្ចេកទេសនៃការចរចាដោះដូរដីជាមួយវៀតណាមនេះបានទេ។ ប៉ុន្តែ នៅពេលខាងមុខ ដីទាំងនេះនឹងត្រូវបានបង្ហាញឱ្យដឹងថា នៅម្តុំណាហើយ ពីព្រោះដីជាង២ពាន់ហិកតានេះបើតាមលោកបណ្ឌិតគិន ភា គឺមិនអាចយកមកទុកក្នុងហៅប៉ាវបានឡើយ។
ពាក់ព័ន្ធនឹងបញ្ហានេះ លោកស្រីកុយ ពិសី អនុប្រធានគណៈកម្មាធិការកិច្ចការចម្រុះព្រំដែនកម្ពុជាមិនផ្តល់ការអត្ថាធិប្បាយលម្អិតឡើយដោយគ្រាន់តែបញ្ជាក់ថា កំពុងធ្វើកិច្ចការងារនេះ ហើយថា នឹងបង្ហាញឱ្យដឹងនៅពេលដែលគណៈកម្មាធិការកិច្ចការចម្រុះព្រំដែនកម្ពុជាបញ្ចប់ការងាររបស់ខ្លួន។
សូមបញ្ជាក់ថា កាលពីថ្ងៃទី១៦ ខែសីហា លោកនាយកដ្ឋមន្រ្តីហ៊ុន សែន បានប្រកាសឱ្យដឹងថា វៀតណាមនឹងប្រគល់ដីជាង២ពាន់ហិកតាដល់កម្ពុជា បន្ទាប់ពីមានការដោះដូរគ្នាកន្លងមក។ លោកនាយករដ្ឋមន្រ្តីបានអះអាងថា ដីទាំងនេះនឹងត្រូវប្រគល់ឲ្យខេត្ត ដើម្បីធ្វើជាដីសង្គមកិច្ចសម្រាប់ប្រគល់ឱ្យកងទ័ព និងនគរបាលការពារព្រំដែន។ ជាមួយគ្នានេះ លោកប្រមុខរដ្ឋាភិបាលកម្ពុជាក៏បានគូសបញ្ជាក់ថា ការសម្រេចដោះដីជាមួយវៀតណាមនេះ គឺដោយសារតែតាមផែនទីដែលគូរដោយបារាំង គឺភូមិមួយចំនួនរបស់វៀតណាមស្ថិតនៅទឹកដីកម្ពុជា ឯភូមិមួយចំនួនរបស់កម្ពុជាស្ថិតនៅលើទឹកវៀតណាម។ ដូច្នេះហើយ ជម្រើសដែលល្អ គឺមានតែដោះដូរគ្នាដើម្បីឈានទៅបោះបង្គោលព្រំដែនរវាងប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ