លោក ពេជ្រ ស្រស់ គ្រោងលើកយកបញ្ហាព្រំដែនឱ្យប្រមុខរដ្ឋាភិបាលកម្ពុជាបកស្រាយជាថ្មី
ប្រធានគណបក្សយុវជនកម្ពុជា លោក ពេជ្រ ស្រស់ បានអះអាងថា លោកគ្រោងនឹងលើកយកបញ្ហាព្រំដែនកម្ពុជា-វៀតណាម ដាក់ជូនលោកនាយករដ្ឋមន្ត្រី ហ៊ុន សែន ឱ្យបកស្រាយនៅក្នុងកិច្ចប្រជុំប្រចាំឆមាស ដែលគ្រោងធ្វើនៅថ្ងៃអង្គារដើមសប្តាហ៍ក្រោយនេះ។ បើតាមប្រធានគណបក្សយុវជនកម្ពុជារូបនេះ លោកចង់អោយមានការពន្យល់ឱ្យបានច្បាស់លាស់លើរឿងព្រំដែន ដើម្បីបញ្ចប់មន្ទិលសង្ស័យ និងយកខ្មែរគ្នាឯងធ្វើជាសត្រូវបន្តទៅទៀត។
ចុះផ្សាយនៅថ្ងៃ៖
ស្តាប់ - ០២:០៣
បើគ្មានការប្រែប្រួលទេ លោក ពេជ្រ ស្រស់ ប្រធានគណបក្សយុវជនកម្ពុជា បានអះអាងថា បញ្ហាព្រំដែន គឺជាបញ្ហាអាទិភាពទី១ ដែលលោកគ្រោងនឹងលើកយកទៅចោទសួរប្រមុខរដ្ឋាភិបាលកម្ពុជា លោក ហ៊ុន សែន នៅក្នុងកិច្ចប្រជុំប្រចាំឆមាសទី១ឆ្នាំ២០២០ នៃឧត្តមក្រុមប្រឹក្សាពិគ្រោះនិងផ្តល់យោបល់។ កិច្ចប្រជុំនេះ គ្រោងនឹងធ្វើឡើងនៅថ្ងៃអង្គារ ទី២៥ សីហា សប្តាហ៍ក្រោយនេះ។
បើតាមលោក ពេជ្រ ស្រស់ ការលើកឡើងពីបញ្ហាព្រំដែននេះ គឺបន្ទាប់ពីមានការចាប់ខ្លួនប្រធានសហជីពលោក រ៉ុង ឈុន និងប្រធានគណបក្សខ្មែរឈ្នះ លោក សួង សុភ័ណ្ឌ និងការចោទប្រកាន់ថា ការបោះបង្គោលព្រំដែនកម្ពុជា-វៀតណាម នៅខេត្តត្បូងឃ្មុំ បានធ្វើអោយកម្ពុជាបាត់ដីទៅភាគីវៀតណាម។ ដូច្នេះ លោក ពេជ្រ ស្រស់ ចង់ឱ្យមានការពន្យល់បន្ថែមទៀត ពីសំណាក់ប្រមុខរដ្ឋាភិបាលកម្ពុជាលោក ហ៊ុន សែន។ ក្រៅពីបញ្ហាព្រំដែន ប្រតិភូតំណាងគណបក្សយុវជនកម្ពុជាលោក ពេជ្រ ស្រស់ ដែលបានសរសេរនៅលើទំព័រហ្វេសប៊ុករបស់ខ្លួននៅថ្ងៃអាទិត្យនេះថា លោកក៏នៅមានរឿងជាច្រើនទៀត ដែលត្រូវលើកជូនលោកនាយករដ្ឋមន្ត្រី ហ៊ុន សែន ដើម្បីសុំកិច្ចអន្តរាគមន៍ឈានទៅរកការដោះស្រាយ។ ហើយលោកនឹងមានសំណួរជាច្រើន ដើម្បីត្រៀមជូនលោកនាយករដ្ឋមន្ត្រី ហ៊ុន សែន ផងដែរ។
គួរជម្រាបជូនថា នៅរៀងរាល់៦ខែម្តង លោកនាយករដ្ឋមន្ត្រី ហ៊ុន សែន តែងតែមានជំនួបជាមួយសមាជិកឧត្តមក្រុមប្រឹក្សាពិគ្រោះនិងផ្តល់យោបល់ ដើម្បីទទួលយកសំណូមពរ និងបញ្ហាប្រឈមរបស់ពួកគេ មកពិនិត្យនិងដោះស្រាយ។ បើទោះបីជា យន្តការថ្មីនេះត្រូវបានគេមើលឃើញថា ពុំសូវមានអំណាច និងទឹកមាត់ប្រៃក្តី ប៉ុន្តែ វាគឺជាយន្តការថ្មីតែមួយគត់ ដែលបើកផ្លូវឱ្យគណបក្សនយោបាយនៅក្រៅរដ្ឋាភិបាលលើកឡើងពីបញ្ហាប្រឈមនិងអសកម្មនៅក្នុងសង្គម ដាក់ជូនប្រមុខរដ្ឋាភិបាលកម្ពុជាពិនិត្យនិងដោះស្រាយ។
បើតាមលោក ពេជ្រ ស្រស់ ទាក់ទងនឹងបញ្ហាការបោះបង្គោលព្រំដែនកម្ពុជា-វៀតណាម នេះ លោកធ្លាប់បានអញ្ជើញប្រធានគណៈកម្មាធិការចម្រុះកិច្ចការព្រំដែនកម្ពុជា លោកទេសរដ្ឋមន្ត្រី វ៉ា គឹមហុង មកពន្យល់ម្តងរួចហើយ នៅចំពោះមុខឧត្តមក្រុមប្រឹក្សាពិគ្រោះនិងផ្តល់យោបល់។ ប៉ុន្តែការពន្យល់កាលណោះ គឺបានធ្វើឡើងនៅមុនពេលដែលប្រមុខរដ្ឋាភិបាលកម្ពុជាលោក ហ៊ុន សែន បានចុះហត្ថលេខាទទួលស្គាល់ការបោះបង្គោលព្រំដែនកម្ពុជា-វៀតណាម ចំនួន៨៤% កាលពីខែតុលា ឆ្នាំ ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ