លោក ហ៊ុន សែន បញ្ជាឲ្យលោក វ៉ា គឹមហុង ចុះទៅខេត្តបន្ទាប់ពីពលរដ្ឋថា ពួកគេបាត់ដី ក្រោយការបោះបង្គោលព្រំដែនជាមួយវៀតណាម
បញ្ហាព្រំដែនមួយផ្នែកនៅក្នុងខេត្តត្បូងឃ្មុំត្រូវបាន លោកនាយករដ្ឋមន្ត្រី ហ៊ុន សែន ប្រាប់ឲ្យលោក វ៉ា គឹមហុង ចុះទៅពិនិត្យដោយផ្ទាល់ តើដូចអ្វីដែលពលរដ្ឋអះអាងទេ ថាពួកគេបានបាត់ដីក្រោយការបោះបង្គោលព្រំដែនជាមួយវៀតណាមមែនអត់។ បទបញ្ជានេះធ្វើឡើងនៅក្នុងកិច្ចប្រជុំប្រចាំឆមាសទី៤នៃឧត្តមក្រុមប្រឹក្សាពិគ្រោះនិងផ្តល់យោបល់ ជាមួយលោកនាយករដ្ឋមន្ត្រី ហ៊ុន សែន នៅព្រឹកអង្គារ៍នេះ។
ចុះផ្សាយនៅថ្ងៃ៖
ស្តាប់ - ០២:២៥
ដំណើរចុះទៅកាន់ព្រំដែនកម្ពុជាវៀតណាមក្នុងខេត្តត្បូងឃ្មុំពីសំណាក់លោក វ៉ា គឹមហុង ប្រធានអាជ្ញាធរជាតិទទួលបន្ទុកលើកិច្ចការព្រំដែនធ្វើឡើងតាមបន្ទាប់ពីមានសំណើររបស់លោកពេជ្រ ស្រស់ សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ ប្រតិភូមកពីគណបក្សយុវជន នៅចំពោះមុខលោកនាយករដ្ឋមន្ត្រី ហ៊ុន សែន នៅថ្ងៃអង្គារ៍នេះ។ ប៉ុន្តែដំណើរចុះទៅកាន់ព្រំដែនកម្ពុជាវៀតណាមត្បូងឃ្មុំពីសំណាក់លោក វ៉ា គឹមហុង ពេលណានោះ នៅមិនទាន់មានការកំណត់ជាផ្លូវការនៅឡើយទេ តែបើតាមលោកពេជ្រ ស្រស់ការងារនេះ នឹងធ្វើឡើងជាបន្ទាន់។
ថ្លែងប្រាប់វិទ្យុបារាំងអន្តរជាតិRFI លោក ពេជ្រ ស្រស់ បានគូសបញ្ជាក់ថា ដំណើរចុះទៅព្រំដែនកម្ពុជាត្បូងឃ្មុំពីមន្ត្រីជំនាញនេះគឺទៅទីតាំងតែមួយដែលលោក រ៉ុង ឈុន និងលោក សួង សុភ័ណ្ឌ ចុះទៅត្រួតពិនិត្យ។ បន្ទាប់ពីពិនិត្យលោកទាំងពីរលើកឡើងថា ការបោះបង្គោលព្រំដែននេះបានធ្វើឲ្យកម្ពុជាបាត់ដីទៅភាគីវៀតណាម។ ក្រោយការលើកឡើងនេះទាំងលោក រ៉ុង ឈុន និង សួង សុភ័ណ្ឌ រួមនឹងមនុស្សមួយចំនួនទៀតសរុបជិត១០នាក់ហើយត្រូវបានចាប់ខ្លួនក្នុងបទញុះញង់។
បើតាមលោក ពេជ្រ ស្រស់ ប្រមុខរដ្ឋាភិបាលលោក ហ៊ុន សែន ក៏អនុញ្ញាត្តឲ្យមានផងដែរការណែនាំឲ្យគណៈរដ្ឋមន្ត្រីបើកសិក្ខាសាលាពន្យល់សាធារណៈជនដែលចង់ដឹងពីបញ្ហាព្រំដែន។
មែនទែនទៅភាពចម្រូងចម្រាសលើបញ្ហាព្រំដែនបានកើតមានជាថ្មីបន្ទាប់ពី កម្ពុជា និងវៀតណាម បានប្រគល់ និងទទួល ផែនទីឋានលេខាព្រំដែនគោក ខ្នាត ១/២៥ ០០០ កាលពីថ្ងៃទី០១ ខែសីហា ឆ្នាំ២០២០។ បើតាមមន្ត្រីជាន់ខ្ពស់កិច្ចការព្រំដែនផែនទីខ្នាត ១/២៥ ០០០ នេះបានបង្ហាញពេញលេញលទ្ធផល ខណ្ឌសីមា និងបោះបង្គោលព្រំដែន ប្រមាណជា៨៤% ដែលប្រទេសទាំងពីសម្រេចបាន។ ផែនទីនេះ ជាផែនទីទំនើបសម័យឌីជីថល ៤.0 ដែលបង្ហាញយ៉ាងច្បាស់លាស់ខ្សែព្រំដែន បង្គោលព្រំដែន រួមនិងស្ថានភាពភូមមិសាស្រ្តនៅ លើដីជាក់ស្តែងបានយ៉ាងជាក់លាក់។
ប៉ុន្តែលោក អ៊ុំ សំអាន មន្ត្រីជំនាញ ព្រំដែនរបស់អតីតគណបក្សសង្រ្គោះជាតិ បានហៅផែនថ្មីខ្នាត១/២៥ ០០០នេះថាជា«ផែនទីសម្ងាត់ដែលគូសវាសដោយវៀតណាម»ឲ្យកម្ពុជា។ យ៉ាងណាក៏ដោយ លោកនាយករដ្ឋមន្ដ្រី ហ៊ុន សែន ធ្លាប់ព្រមានជាចំហរ ថានឹងចាប់ខ្លួនបន្ថែមទៀត រាល់អ្នកទាំងឡាយដែលហ៊ានចេញមុខរិះគន់រដ្ឋាភិបាលក្នុងបញ្ហាព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ