អ្នកនាំពាក្យអឺរ៉ុប៖អឺរ៉ុបចង់ឃើញសវនាការលោកកឹម សុខានឹងត្រូវបន្តឆាប់ៗ និងសង្ឃឹមលោកមានសេរីភាពពេញលេញ
អ្នកនាំពាក្យសហភាពអឺរ៉ុប បានលើកឡើងថា សហភាពអឺរ៉ុបចង់ឱ្យតុលាការកម្ពុជាបន្តសវនាការលោកកឹម សុខា ក្នុងពេលឆាប់ៗនេះ បន្ទាប់ពីផ្អាកប្រមាណរយៈពេល៥ខែកន្លងទៅដោយសារតែបញ្ហាជំងឺកូវីដ ១៩។ ក្រុមមេធាវីលោកកឹម សុខា ក៏ចង់ឱ្យតុលាការបន្តសវនាការលោកកឹម សុខាឱ្យឆាប់ផងដែរ។ ប៉ុន្តែ តាមរយៈក្រុមមេធាវីដដែល សាលាដំបូងរាជធានីភ្នំពេញបានបដិសេធដោយហេតុផលថា ការពារការរីករាលដាលនៃជំងឺកូវីដ ១៩។
ចុះផ្សាយនៅថ្ងៃ៖
ស្តាប់ - ០២:២៦
«យើងរំពឹងថា សវនាការរបស់លោកកឹម សុខា នឹងត្រូវបន្តក្នុងពេលឆាប់ៗខាងមុខនេះ»។ នេះ គឺជាលើកឡើងរបស់អ្នកនាំពាក្យសហភាពអឺរ៉ុបប្រាប់សារព័ត៌មានAsia Times កាលពីថ្ងៃទី២៨ ខែសីហា។ តាមរយៈសារព័ត៌មានដដែល អ្នកនាំពាក្យសហភាពអឺរ៉ុបក៏សង្ឃឹមថា លោកកឹម សុខា នឹងអាចត្រូវដោះលែងឱ្យមានសេរីភាពទាំងស្រុង ហើយនឹងដើរនាទីបានពេញលេញនៅក្នុងជីវិតនយោបាយរបស់លោកនៅក្នុងប្រទេសកម្ពុជា។
ក្រុមមេធាវីការពារក្តីលោកកឹម សុខា ក៏ចង់ឱ្យតុលាការបន្តសវនាការលោកកឹម សុខាបានឆាប់ផងដែរ។ លោកចាន់ ចេន សហមេធាវីម្នាក់របស់លោកកឹម សុខា បានអះអាងប្រាប់វិទ្យុបារាំងអន្តរជាតិនៅព្រឹកថ្ងៃចន្ទនេះថា តាមច្បាប់ កូនក្តីរបស់លោក គឺត្រូវទទួលបានការកាត់ក្តីដែលឆាប់រហ័ស និងយុត្តិធម៌។ ម្យ៉ាងទៀត បើបន្តពន្យារពេលសវនាការកាត់ក្តី គឺវានឹងនាំឱ្យខាតប្រយោជន៍របស់លោកកឹម សុខា។ តាមលោកមេធាវីចាន់ ចេន ក្រុមមេធាវីធ្លាប់បានដាក់លិខិតផ្លូវការ និងស្នើសុំផ្ទាល់មាត់ផងដែរដល់ចៅក្រមសាលាដំបូងរាជធានីភ្នំពេញ ដើម្បីឱ្យបន្តសវនាការលោកកឹម សុខា។ ប៉ុន្តែចៅក្រមបានបដិសេធ ដោយលើកហេតុផលពីបញ្ហាជំងឺកូវីដ ១៩នៅបន្តរាត្បាត។
សវនាការលោកកឹម សុខា ត្រូវបានផ្អាកជាបណ្តោះអាសន្នចាប់តាំងពីថ្ងៃទី ២៥ មីនាមក ដោយសារតែការព្រួយបារម្ភពីការឆ្លងរីករាលដាលនៃជំងឺកូវីដ១៩នៅក្នុងប្រទេសកម្ពុជា។ បន្ទាប់ពីសវនាការត្រូវបានផ្អាក លោកកឹម សុខា ប្រធានអតីតគណបក្សសង្រ្គោះជាតិបានធ្វើដំណើរកម្សាន្ត និងជួបជាមួយពលរដ្ឋនៅក្នុងខេត្តចំនួន៧។ ក្រោយមក រូបលោកត្រូវបានតុលាការក្រុងភ្នំពេញចេញលិខិតដាស់តឿនឱ្យគោរពឱ្យបានម៉ឺងម៉ាត់នូវកាតព្វកិច្ចត្រួតពិនិត្យតាមផ្លូវតុលាការ។ ប៉ុន្តែ នៅពេលថ្មីៗនេះ លោកកឹម សុខា ក៏បានបន្តចុះទៅខេត្តពីរទៀត គឺខេត្តត្បូងឃ្មុំ និងខេត្តកំពង់ចាម។
បន្ថែមពីការចុះទៅកម្សាន្តតាមខេត្ត លោកកឹម សុខា ក៏បានទទួលជួបជាមួយបណ្តាទូតបរទេសនានានៅក្នុងប្រទេសកម្ពុជាផងដែរក្នុងអំឡុងពេលរង់ចាំបន្តសវនាការក្នុងសំណុំរឿងសន្ទិដ្ឋិភាពជាមួយបរទេស។ នៅក្នុងខែសីហានេះ លោកកឹម សុខា បានជួបជាមួយឯកអគ្គរដ្ឋទូតអាមេរិក សហភាពអឺរ៉ុប ជប៉ុន អូស្រ្តាលី និងភារធារីនៃស្ថានទូតអាល្លីម៉ង់។ ក្នុងជំនួបទាំងអស់នេះ លោកកឹម សុខា តែងតែលើកឡើងពីបញ្ហាសេដ្ឋកិច្ច ជីវភាពរស់នៅ សុខភាព ការចូលរួមឆ្លើយតបនិងទប់ស្កាត់ជំងឺកូវីដ-១៩ សិទ្ធិមនុស្ស លទ្ធិប្រជាធិបតេយ្យ និងនីតិរដ្ឋក្នុងកិច្ចខិតខំប្រឹងប្រែងអន្តរជាតិ និងការទូត។ នេះបើតាមការបញ្ជាក់ឱ្យដឹងរបស់លោកមុត ចន្ថា ដែលជានាយកខុន្ធកាល័យលោកកឹម សុខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ