គណៈកម្មាធិការព្រំដែនកម្ពុជារកមិនឃើញមានការបាត់ដីពលលរដ្ឋទៅឱ្យវៀតណាមនៅក្នុងខេត្តត្បូងឃ្មុំនោះទេ
គណៈកម្មាធិការកិច្ចការចម្រុះព្រំដែនកម្ពុជានៅព្រឹកថ្ងៃសៅរ៍នេះ បានដឹកនាំគណៈប្រតិភូ និង អ្នកសារព័ត៌មានមួយចំនួនទៅត្រួតពិនិត្យ និងជួបជាមួយប្រជាពលរដ្ឋនៅក្នុងភូមិត្រពាំងថ្លុង ស្រុកពញ្ញាក្រែក ខេត្តត្បូងឃ្មុំ ដើម្បីសាកសួរពីការបាត់ដីទៅឱ្យភាគីវៀតណាមបន្ទាប់ពីបោះបង្គោលព្រំដែនរួចរាល់។ ជាលទ្ធផល គណៈកម្មការធិការកិច្ចចម្រុះព្រំដែនកម្ពុជារកឃើញមិនឡើយថា មានការបាត់ដីរបស់ប្រជាពលរដ្ឋនៅទីនោះចូលទៅខាងប្រទេសវៀតណាម។
ចុះផ្សាយនៅថ្ងៃ៖
ស្តាប់ - ០២:២៦
ការរកមិនឃើញបាត់ដីរបស់គណៈកម្មាធិការកិច្ចការចម្រុះព្រំដែនកម្ពុជានេះ គឺដោយយោងតាមទៅចម្លើយរបស់ពលរដ្ឋនៅភូមិត្រពាំងថ្លុង នៅជិតទីតាំងបង្គោលព្រំដែនលេខ១១៧ នៅស្រុកពញ្ញាក្រែក ខេត្តត្បូងឃ្មុំដែលប្រតិភូគណៈកម្មាធិការកិច្ចការចម្រុះព្រំដែនកម្ពុជាចុះទៅជួបសួរនាំដោយផ្ទាល់។ លោកស្រីកុយ ពិសី អនុប្រធានគណៈកម្មាធិការកិច្ចការចម្រុះព្រំដែនកម្ពុជាបានអះអាងថា គ្រប់ចម្លើយសុទ្ឋតែឆ្លើយថា អត់មានបាត់ដីទៅវៀតណាមទេ ហើយអ្វីដែលពលរដ្ឋខ្លះចូលរួមជាមួយក្រុមអ្នកឃ្លាំមើលបញ្ហាព្រំដែនកន្លងទៅ គឺដោយសារក្រុមនោះបានសន្យាថា នឹងជួយតវ៉ាសុំដីដែលកម្ពុជាទទួលបានបន្ទាប់ពីការបញ្ចប់ការងារខណ្ឌសីមានិងបោះបង្គោលព្រំដែននៅតំបន់នោះ ឱ្យពួកគាត់បានអាស្រ័យផលទៅថ្ងៃមុខតែប៉ុណ្ណោះ។
កន្លងមក ក្រុមអ្នកនយោបាយ និងអ្នកឃ្លាំមើលបញ្ហាព្រំដែនមួយចំនួនបានរិះគន់ និងវាយប្រហារមកលើរដ្ឋាភិបាលកម្ពុជាថា បានធ្វើឱ្យបាត់ដីប្រជាពលរដ្ឋនៅក្នុងខេត្តត្បូងឃ្មុំចូលទៅខាងវៀតណាម បន្ទាប់ពីបោះបង្គោលព្រំដែនរួចរាល់នៅក្នុងតំបន់នោះ។ ពួកគេថែមទាំងបានលើកឡើងថា អ្នកភូមិប្រមាណជាង១០០គ្រួសារបានបាត់ដីធ្លីរបស់ពួកគេចូលទៅប្រទេសវៀតណាម។ ដើម្បីដោះស្រាយបញ្ហានេះ លោកនាយករដ្ឋមន្រ្តីហ៊ុន សែន កាលពីថ្ងៃទី២៥ ខែសីហា បានបញ្ជាឱ្យលោកវ៉ា គឹមហុង ប្រធានគណៈកម្មាធិការកិច្ចការចម្រុះព្រំដែនកម្ពុជាចុះទៅត្រួតពិនិត្យ និងសួរនាំប្រជាពលរដ្ឋដែលអះអាងថាបាត់ដីនោះដោយផ្ទាល់ ដើម្បីបញ្ជាក់ពីការពិតដល់សាធារណជន។ ជាលទ្ធផល គឺមិនដូចការលើកឡើងនោះទេ។
គួរជម្រាបជូនថា ទីតាំងដែលក្រុមគណ
ៈកម្មាធិការកិច្ចការព្រំដែនកម្ពុជាចុះត្រួតពិនិត្យ និងជួបជាមួយប្រជាពលរដ្ឋដោយផ្ទាល់នេះ គឺជាទីតាំងតែមួយដែលលោករ៉ុង ឈុន ប្រធានសហភាពសហជីពកម្ពុជា និង លោកសួង សោភ័ណ្ឌ ប្រធានគណបក្សខ្មែរឈ្នះបានចុះទៅពិនិត្យមើល និងសួរនាំប្រជាពលរដ្ឋដូចគ្នា។ ប៉ុន្តែ ក្រោយមក ពួកគេទាំងពីរត្រូវបានចាប់ខ្លួនដាក់ពន្ធនាគារជាបន្តបន្ទាប់។ លោករ៉ុង ឈុន ត្រូវបានចាប់ខ្លួន និងឃុំខ្លួនមុន ដោយចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
ចំណែក លោកសួង សោភ័ណ្ឌ ត្រូវបានចាប់ខ្លួន និង ឃុំខ្លួននាពេលបន្ទាប់ ដោយសារបានចូលរួមតវ៉ាទាមទារឱ្យដោះលែងលោករ៉ុង ឈុន និងបានចុះទៅតំបន់ព្រំដែននោះ ដើម្បីស្វែងរកការពិតជុំវិញការចាប់ខ្លួនលោករ៉ុង ឈុន។ មិនខុសគ្នាដែរ លោកសួង សោភ័ណ្ឌ ត្រូវបានចោទប្រកាន់ពាក់ព័ន្ធនឹងការបំភ្លៃការពិតរឿងព្រំដែនកម្ពុជា-វៀតណាម។ ក្រៅពីពួកគេទាំងពីរនេះ ក្រុមយុវជនជាង១០នាក់ត្រូវបានចាប់ខ្លួន និងរងអំពើហិង្សាជាបន្តបន្ទាប់ ខណៈពួកគេនាំគ្នាតវ៉ាករណីចាប់ខ្លួនអ្នករិះគន់បញ្ហាព្រំដែន។ ក្នុងនោះមានមនុស្ស៦នាក់ត្រូវបានឃុំខ្លួនជាបណ្តោះអាសន្ននៅពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ