នៅសប្តាហ៍នេះ សេង ឌីណា សូមលើកឡើង អំពីលទ្ធផលនៃការសិក្សាថ្មីៗរបស់អ្នកវិទ្យាសាស្រ្ត ដែលបានរកឃើញសារធាតុគីមីជាតម្រុយនៃជីវិត នៅលើភពសុក្រ។
នៅក្នុងប្រព័ន្ធព្រះអាទិត្យរបស់យើងនេះ នៅពេលណាគេនិយាយពីការស្វែងរកជីវិតក្រៅភព គេហាក់មិនសូវជាមានចំណាប់អារម្មណ៍ច្រើនប៉ុន្មាននោះទេ ទៅលើភពសុក្រ។ នេះក៏ដោយសារតែ តាមរយៈការសិក្សាជាច្រើនកាលពីពេលកន្លងមក គេដឹងថា ភពសុក្រនេះ ថ្វីដ្បិតតែមានលក្ខណៈស្រដៀងគ្នាច្រើននឹងភពផែនដី តែវាជាភពដែលមានសីតុណ្ហភាពក្តៅជាងគេបំផុតនៅក្នុងប្រព័ន្ធព្រះអាទិត្យ គឺមានសីតុណ្ហភាពរហូតដល់ទៅជាង ៤៦០អង្សារឯណោះ។ នៅក្នុងសីតុណ្ហភាពខ្ពស់កម្រិតនេះ សូម្បីតែលោហៈមួយចំនួន ដូចជា សង្កសី និងសំណ ជាដើម ក៏ត្រូវរលាយដែរ។ ដូច្នេះហើយបានជាគេគិតថា ជីវិតមិនអាចមានវត្តមាននៅលើភពសុក្របាន។
ក៏ប៉ុន្តែ ការសិក្សាលម្អិតរបស់ក្រុមអ្នកវិទ្យាសាស្ត្រអន្តរជាតិ កាលពីពេលថ្មីៗនេះ បានធ្វើឲ្យគ្រប់គ្នាមានការភ្ញាក់ផ្អើលយ៉ាងខ្លាំង ដោយសារតែគេបានរកឃើញថា នៅលើភពសុក្រ មានសារធាតុពិសេសម្យ៉ាង ដែលអាចជាតម្រុយនៃជីវិត ហើយសារធាតុនេះ គឺគេរកឃើញនៅក្នុងពពករបស់ភពសុក្រ។
សារធាតុដែលគេបានរកឃើញនៅលើពពករបស់ភពសុក្រនេះ មានឈ្មោះថា « ផូស្វ៊ីន » (Phosphine/PH3) ដែលត្រូវបានគេស្គាល់ថាជាសារធាតុគីមី ដែលមានប្រភពចេញពីអ្វីៗដែលមានជីវិត។ នៅលើផែនដី ផូស្វ៊ីនមានប្រភពចម្បងចេញពីសកម្មភាពរបស់មនុស្ស និងចេញពីប្រភេទមីក្រុបមួយចំនួន ហើយជាទូទៅ ផូស្វ៊ីននេះ គឺជាប្រភេទសារធាតុគីមីគោលដៅមួយ ដែលអ្នកវិទ្យាសាស្រ្តស្វែងរក នៅពេលដែលគេសិក្សារកវត្តមានជីវិតក្រៅភពផែនដី។
ជាការពិតណាស់ថា ការរកឃើញផូស្វ៊ីន មិនមែនមានន័យថាជាភស្តុតាងនៃជីវិតនៅលើភពសុក្រនោះទេ ហើយវានៅតែអាចជាប្រូបាប៊ីលីតេមួយ ដែលថា ផូស្វ៊ីនដែលគេរកឃើញភពសុក្រនេះ វាមិនមែនកើតចេញពីជីវិត ហើយអាចកើតចេញពីយន្តការគីមីទៅតាមលក្ខណៈធម្មជាតិ ដែលគេមិនធ្លាប់ឃើញនៅលើភពផែនដី ហើយដែលគេនៅមិនទាន់អាចយល់បាននៅឡើយ។
ក៏ប៉ុន្តែ ទោះជាយ៉ាងណា ការរកឃើញផូស្វីននៅពេលនេះ អាចនឹងធ្វើឲ្យអ្នកវិទ្យាសាស្រ្តងាកមកចាប់អារម្មណ៍លើភពសុក្រកាន់តែខ្លាំងជាងមុន។ ភពសុក្រមិនត្រឹមតែស្ថិតនៅក្បែរផែនដីនោះទេ ក៏ប៉ុន្តែ តាមរយៈទិន្នន័យដែលគេប្រមូលបានកាលពីពេលកន្លងមក អ្នកវិទ្យាសាស្រ្តជាទូទៅនាំគ្នាសង្ស័យថា មុននឹងត្រូវប្រែក្លាយជាទីគ្មានអំណោយផលដូចជាសព្វថ្ងៃនេះ កាលពីដើមដំបូងឡើយ ភពសុក្រប្រហែលជាមានទឹក និងបរិយាកាសស្រដៀងគ្នាច្រើននឹងភពផែនដីរបស់យើង។
ដូច្នេះ បើសិនជាភពសុក្រធ្លាប់ជាភពមានអំណោយផលដល់ជីវិត ធ្លាប់មានជីវិតនៅលើនោះ មុននឹងលក្ខខណ្ឌអាកាសធាតុត្រូវប្រែប្រួលបន្តិចម្តងៗរហូតដល់ស្ថានភាពបច្ចុប្បន្ន វាគឺជារឿងដែលអាចទៅរួច ដែលថា ជីវិតនៅលើភពសុក្រនោះ គឺអាចមានខ្លះ ដែលអាចសម្របខ្លួនទៅតាមការប្រែប្រួលអាកាសធាតុ ហើយអាចបន្តមានវត្តមាននៅទីនោះ។
មើលវីដេអូផ្សេងទៀត ស្តីពីវិទ្យាសាស្ត្រ និងចក្រវាល នៅលើយូធូបផ្លូវការរបស់ RFI ខេមរភាសា
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ