លោក ហ៊ុន សែន នៅ អ.ស.ប៖ ការដក EBA ផ្នែកខ្លះពីកម្ពុជា គឺជារឿងអយុត្តិធម៌ លម្អៀង និងមានចេតនានយោបាយ
នៅថ្ងៃទី២៦កញ្ញា ប្រមុខរដ្ឋាភិបាលកម្ពុជាក៏បានយកវេទិកាសន្និបាតអង្គការសហប្រជាជាតិលើកទី៧៥ ថ្លែងទៅកាន់ពិភពលោកអំពីបញ្ហា EBA រវាងកម្ពុជានិងសហភាពអឺរ៉ុប។ ក្នុងពេលដែលកម្ពុជាកំពុងរងផលប៉ះពាល់ដោយជំងឺកូវីដ១៩ លោក ហ៊ុន សែន ចាត់ទុកការដកប្រព័ន្ធអនុគ្រោះពន្ធ EBA មួយផ្នែកពីកម្ពុជា ថាជារឿងអយុត្តិធម៌។ និងថា វាគួរឲ្យសោកស្ដាយ ដែលជារឿយៗ កម្ពុជាត្រូវប្រឈមមុខនឹងស្តង់ដារទ្វេ ប្រកបដោយល្បិចកល និងការសម្រេចចិត្តដែលមានភាពលម្អៀង និងមានចេតនានយោបាយ។
ចុះផ្សាយនៅថ្ងៃ៖
ស្តាប់ - ០២:២១
បើទោះបីជាមានការដក EBA ដោយសហភាពអឺរ៉ុបក្តី លោកនាយករដ្ឋមន្ត្រីហ៊ុន សែន បានលើកឡើងថា កម្ពុជានៅតែបន្តប្ដេជ្ញាចិត្តយ៉ាងពេញទំហឹងដូច ដែលខ្លួនធ្លាប់បានធ្វើអស់រយៈពេល៤០ឆ្នាំកន្លងមក ក្នុងការការពារនូវអ្វី ដែលកម្ពុជាជឿជាក់ថាជាមាគ៌ាត្រឹមត្រូវ។ បើតាមលោកនាយករដ្ឋមន្ត្រីហ៊ុន សែន មាគ៌ាត្រឹមត្រូវ គឺការការពារអធិបតេយ្យភាពថែរក្សាសន្តិភាព ដែលកសាងបានយ៉ាងលំបាកលំបិន និងទទួលបាននូវការសាទរពេញទំហឹង ដោយប្រជាជាតិកម្ពុជាទាំងមូល និងកំពុងតែងើបឈរឡើងជាប្រជាជាតិមួយស្មើមុខមាត់ ស្មើរភាព និងស្មើសិទ្ធិ ជាមួយបណ្ដាប្រជាជាតិដទៃទៀតក្នុងតំបន់ និងសាកលលោក។
គួររំលឹកជូនថា សេចក្តីសម្រេចដកការលើកលែងពន្ធ២០%តាមប្រព័ន្ធអនុគ្រោះពន្ធEBAរបស់គណៈកម្មការអឺរ៉ុបបានចូលជាធរមាន កាលពីថ្ងៃទី១២ ខែសីហា ឆ្នាំ២០២០កន្លងទៅ។ ក្រោយការចូលជាធរមាននេះ ទំនិញរបស់កម្ពុជា៤០មុខ ភាគច្រើនជាសម្លៀកបំពាក់ ស្បែកជើង និងផលិតផលធ្វើដំណើរ ដែលនាំទៅអឺរ៉ុបក្នុងតម្លៃ១ពាន់លានអឺរ៉ូជារៀងរាល់ឆ្នាំ នឹងត្រូវបង់ប្រមាណ១០០លានដុល្លារអាមេរិក ដើម្បីអាចនាំចូលទៅកាន់ទីផ្សារសហភាពអឺរ៉ុបបាន។
តាមរយៈសេចក្តីថ្លែងការណ៍ដដែលនោះ លោកនាយករដ្ឋមន្ត្រីហ៊ុនសែនបានរំលឹកឡើងវិញ នូវរឿងរ៉ាវប្រវត្តិសាស្ត្រ នៅក្រោយពេលដែលកម្ពុជារួចផុតពីរបបប្រល័យពូជសាសន៍ខ្មែរក្រហម ហើយកម្ពុជាត្រូវរងទណ្ឌកម្មពីសហគមន៍អន្តរជាតិ។ សហគមន៍អន្តរជាតិ ដែលជាសមាជិកភាគច្រើននៃអង្គការសហប្រជាជាតិនាពេលនោះ ហើយដែលបច្ចុប្បន្នគឺជាអ្នកផ្សព្វផ្សាយឥតឈប់ឈរអំពីលទ្ធិប្រជាធិបតេយ្យ និងសិទ្ធិមនុស្ស។
លោក ហ៊ុន សែន បានបង្ហាញការសោកស្តាយ,ដោយសារតែ មហិច្ឆតានយោបាយ និងរបៀបវារៈឱកាសនិយម លាក់ពុតរបស់ប្រទេសមួយចំនួន កម្ពុជាត្រូវប្រឈមមុខនឹងស្តង់ដារទ្វេ ដែលប្រកបដោយល្បិចកល និងការសម្រេចចិត្ត ដែលមានភាពលម្អៀងនិងមានចេតនានយោបាយពោលគឺភាពអយុត្តិធម៌។
សូមជម្រាបជូនថាមហាសន្និបាតរបស់អង្គការសហប្រជាជាតិនៅឆ្នាំនេះ គឺជាព្រឹត្តិការណ៍ ដែលមិនធ្លាប់មាននៅក្នុងប្រវត្តិសាស្ត្ររបស់អង្គការសហប្រជាជាតិដោយ សារមហាសន្និបាតនេះ មិនគ្រាន់តែត្រូវបានរៀបចំឡើងជាលើកដំបូងតាមប្រព័ន្ធវីដេអូប៉ុណ្ណោះទេ ប៉ុន្តែប្រព្រឹត្តទៅក្នុងអំឡុងពេល ដែលពិភពលោកបាននិងកំពុងគ្របដណ្ដប់ដោយវិបត្តិកូវីដ១៩ និងបញ្ហារបស់ពិភពលោកមួយចំនួនទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ