ការនាំអង្ករទៅអឺរ៉ុប៖ បណ្ដឹងកម្ពុជានៅតុលាការអឺរ៉ុបបានជោគជ័យមួយជំហាន
តុលាការអឺរ៉ុបបានច្រានចោលសំណើរបស់គណៈកម្មការអឺរ៉ុប (EC) ដែលទាមទារឲ្យទាត់ចោលបណ្តឹងរបស់សហព័ន្ធស្រូវអង្ករកម្ពុជា ដែលធ្វើឡើងដើម្បីប្រឆាំងនឹងសេចក្តីសម្រេចរបស់សហភាពអឺរ៉ុបដែលតម្រូវឲ្យប្រទេសកម្ពុជាបង់ពន្ធគយលើការនាំចេញអង្ករទៅលក់នៅទីផ្សារប្រទេសលោកសេរី។ ថ្លែងប្រាប់វិទ្យុបារាំងអន្ដរជាតិ RFI នៅថ្ងៃអាទិត្យទី០៤តុលានេះ សហព័ន្ធស្រូវអង្ករកម្ពុជា សង្ឃឹមថា សហភាពអឺរ៉ុបនឹងដកចេញនូវសេចក្តីសម្រេចរបស់អឺរ៉ុប ដែលអាចឲ្យកម្ពុជានាំអង្ករទៅអឺរ៉ុបដោយរួចពន្ធដូចពីមុនវិញ។
ចុះផ្សាយនៅថ្ងៃ៖
សហព័ន្ធស្រូវអង្ករកម្ពុជា នៅថ្ងៃអាទិត្យទី០៤តុលានេះ បានសម្ដែងក្ដីសង្ឃឹមលើបណ្ដឹងរបស់ខ្លួនទៅកាន់តុលាការអឺរ៉ុប នៅក្នុងសំណុំរឿងនាំអង្ករខ្មែរទៅលើនៅអឺរ៉ុប។ សេចក្ដីសង្ឃឹមនេះលេចឡើងបន្ទាប់ពីតុលាការស៊ីវិលអឺរ៉ុប កាលពីថ្ងៃទី១០កញ្ញា២០២០ បានទាត់ចោលបណ្តឹងរបស់គណៈកម្មការអឺរ៉ុប ពោលរក្សាទុកបណ្តឹងរបស់សហព័ន្ធស្រូវអង្ករកម្ពុជាឲ្យនៅមានសុពលភាពដដែល។ នេះបើតាមលោក ហ៊ុន ឡាក់ ប្រធានក្រុមប្រឹក្សាភិបាលនៃសហព័ន្ធស្រូវអង្ករកម្ពុជា។
សូមរំឭកថា ការសម្រេចរបស់តុលាការអឺរ៉ុបនាពេលនេះ ធ្វើឡើងពីរឆ្នាំបន្ទាប់ពីសហព័ន្ធស្រូវអង្ករកម្ពុជាបានពាក្យបណ្តឹងមួយទៅកាន់តុលាការស៊ីវិលអឺរ៉ុប នៅខែមេសាឆ្នាំ២០១៩ ជំទាស់ទៅនឹងការសម្រេចរបស់គណៈកម្មការអឺរ៉ុប (EC) ដែលតម្រូវឲ្យប្រទេសកម្ពុជាត្រូវតែបង់ពន្ធគយលើការនាំអង្កររបស់កម្ពុជាទៅលក់នៅលើទីផ្សារប្រទេសលោកសេរីតំបន់អឺរ៉ុបដែលមានជិត៣០ប្រទេស។ ជាពាក្យបណ្ដឹងដែល ត្រូវបានគណៈកម្មការអឺរ៉ុបដាក់បណ្តឹងតបវិញភ្លាមៗ។
ចំពោះសេចក្ដីសម្រេចរបស់តុលាការអឺរ៉ុបចុងក្រោយនេះ លោក ហ៊ុន ឡាក់ ប្រធានក្រុមប្រឹក្សាភិបាលនៃសហព័ន្ធស្រូវអង្ករកម្ពុជា ចាត់ទុកថា វាជាជោគជ័យមួយជំហានរបស់កម្ពុជា ហើយលោកសង្ឃឹមថា នៅជំហានខាងមុខបន្តបន្ទាប់ទៀត សហភាពអឺរ៉ុបនឹងដកចេញនូវសេចក្តីសម្រេចរបស់ខ្លួនពីមុន ដែលនឹងអាចឲ្យកម្ពុជានាំអង្ករចេញទៅលក់នៅអឺរ៉ុបដោយរួចពន្ធដូចពីមុនឡើងវិញ។
យ៉ាងណាក៏ដោយនៅក្នុងដំណាក់កាលបច្ចុប្បន្នដែលបណ្តឹងរបស់ភាគីទាំងពីរនៅមិនទាន់ត្រូវបានតុលាការស៊ីវិលអឺរ៉ុបចេញសាលក្រមជាចុងក្រោយនោះ ការនាំអង្កររបស់កម្ពុជាចេញទៅទីផ្សារអឺរ៉ុបគឺត្រូវបង់ពន្ធជាបន្តបន្ទាប់ ដោយក្នុងមួយតោនត្រូវបង់ពន្ធចំនួន១៧៥អឺរ៉ូ ឬស្មើនឹង២០១ដុល្លារ នៅឆ្នាំទី១នៃសេចក្តីសម្រេចរបស់គណៈកម្មការអឺរ៉ុបចូលជាធរមាន។ ប៉ុន្តែការបង់ពន្ធគយនេះ នឹងត្រូវថយចុះជាបន្តបន្ទាប់ ពោលឆ្នាំទី២ គឺត្រូវបង់ពន្ធចំនួន១៥០អឺរ៉ូ ហើយនៅឆ្នាំទី៣ ត្រូវបង់ពន្ធតែ១២៥អឺរ៉ូតែប៉ុណ្ណោះ៕។
ការដែលគណៈកម្មការអឺរ៉ុប តម្រូវឲ្យកម្ពុជាបង់ពន្ធលើការនាំអង្ករទៅលក់នៅប្រទេសជាសមាជិករបស់ខ្លួននោះ ដោយសំអាងថា កម្ពុជាមិនបានបំពេញនូវតម្រូវការដូចមានចែងក្នុងមាត្រា ២៦៣ នៃសន្ធិសញ្ញាស្តីពីមុខងាររបស់សហភាពអឺរ៉ុប (TFEU)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ