ខួប៨ឆ្នាំការសោយទិវង្គេតសម្តេចសីហនុ៖អ្នកដឹកនាំនយោបាយធំៗសុទ្ធតែសម្តែងការដឹងគុណពីវីរភាពរបស់ព្រះអង្គ
ថ្ងៃទី១៥ ខែតុលានេះ គឺជាគម្រប់ខួប៨ឆ្នាំនៃការយាងចូលព្រះទិវង្គតនៃព្រះករុណា ព្រះបាទ សម្តេច នរោត្តម សីហនុ ព្រះមហាវីរក្សត្រ ព្រះបរមរតនកោដ្ឋ។ នៅថ្ងៃនេះក៏ដូចជារៀងរាល់ឆ្នាំដែរ គឺថ្នាក់ដឹកនាំស្ថាប័នតូចធំបានថ្វាយកម្រងផ្កា និងគោរពព្រះវិញ្ញាណក្ខន្ធព្រះអង្គនៅមណ្ឌលតម្កល់ព្រះបរមរូប នៅសួនច្បារវិមានឯករាជ្យ។ ជាមួយគ្នានេះ ថ្នាក់ដឹកនាំរដ្ឋាភិបាលកម្ពុជា និងមេដឹកនាំអតីតគណបក្សសង្រ្គោះជាតិក៏បានសម្តែងការគោរព និងដឹងគុណពីវីរភាពរបស់ព្រះអង្គចំពោះជាតិ និងប្រជាពលរដ្ឋកម្ពុជា។
ចុះផ្សាយនៅថ្ងៃ៖
ស្តាប់ - ០២:៣៧
នៅថ្ងៃខួប៨ឆ្នាំនៃការយាងចូលព្រះទិវង្គតនៃព្រះករុណា ព្រះបាទ សម្តេច នរោត្តម សីហនុនេះ លោកនាយករដ្ឋមន្រ្តីហ៊ុន សែន ប្រមុខរដ្ឋាភិបាលកម្ពុជាតាមរយៈទំព័រហ្វេសប៊ុក បានលើកឡើងថា ប្រជារាស្រ្តខ្មែរទូទាំងប្រទេស ព្រមទាំងមន្ត្រីរាជការ កងកម្លាំងប្រដាប់អាវុធគ្រប់ជាន់ថ្នាក់ បានសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះព្រះអង្គដែលព្រះអង្គបានលះបង់ និងបូជាព្រះកាយពលដ៏ធំធេងបំផុតចំពោះជាតិមាតុភូមិកម្ពុជា។
ចំពោះ លោកឧបនាយករដ្ឋមន្រ្តីស ខេង ដែលជារដ្ឋមន្រ្តីក្រសួងមហាផ្ទៃវិញ លោកបានដឹកនាំគណៈប្រតិភូក្រសួងមហាផ្ទៃថ្វាយកម្រងផ្កា និងគោរពព្រះវិញ្ញាណក្ខន្ធព្រះករុណាព្រះបាទសម្ដេចព្រះ នរោត្តម សីហនុ ព្រះបរមរតនកោដ្ឋ ដោយផ្ទាល់នៅមណ្ឌលតម្កល់ព្រះបរមរូប ស្ថិតនៅសួនច្បារវិមានឯករាជ្យ រាជធានីភ្នំពេញ។ បន្ថែមលើនេះ លោកស ខេង ក៏បានសម្តែងនូវការដឹងគុណចំពោះព្រះអង្គ ជាពិសេស គឺការទាមទារបានមកវិញនូវឯករាជ្យពីបារាំងជូនជាតិ និង ប្រជាពលរដ្ឋកម្ពុជា។
ដោយឡែក លោកកឹម សុខា ដែលជាប្រធានអតីតគណបក្សសង្រ្គោះជាតិ និងកំពុងជាប់រឿងក្តីក្តាំនៅតុលាការផងនោះ ក៏បានសម្តែងនូវការគោរពចំពោះព្រះបរមវិញ្ញាណក្ខន្ធ ព្រះមហាវីរក្សត្រ ព្រះបរមរតនកោដ្ឋតាមរយៈទំព័រហ្វេសប៊ុករបស់លោកផងដែរនៅថ្ងៃព្រហស្បតិ៍នេះ។ លោកកឹម សុខា មិនបាននិយាយអ្វីច្រើននោះទេ ក្រៅពីសម្តែងនូវការគោរពនេះ។
សូមជម្រាបជូនថា ព្រះករុណា ព្រះបាទ សម្ដេច ព្រះនរោត្ដម សីហនុ ព្រះមហាវីរក្សត្រ ព្រះបរមរតនកោដ្ឋ ទ្រង់យាងសោយព្រះទិវង្គតនៅថ្ងៃចន្ទ ទី១៥ ខែតុលា ឆ្នាំ២០១២ នៅទីក្រុងប៉េកាំង ប្រទេសចិន ក្នុងព្រះជន្មាយុ៩០ព្រះវស្សា។ ការយាងសោយទិវង្គតរបស់ព្រះអង្គបានក្លាយជាទុក្ខសោកសៅយ៉ាងខ្លាំងដល់ប្រជារាស្រ្តខ្មែរទាំងមូល។ ប្រជារាស្រ្តខ្មែរតែងចងចាំមិនភ្លេចនូវព្រះរាជស្នាព្រះហស្ថដ៏មានតម្លៃបំផុតជាប្រវត្តិសាស្រ្តរបស់ព្រះអង្គចំពោះជាតិមាតុភូមិកម្ពុជានោះ គឺ ព្រះរាជបូជនីយកិច្ចទាមទារឯករាជ្យជូនប្រជាជាតិខ្មែរពី អាណានិគមបារាំង រហូតទទួលបានជោគជ័យនូវឯករាជ្យទាំងស្រុង នៅថ្ងៃទី៩ វិច្ឆិកា ឆ្នាំ១៩៥៣ និង ការដឹកនាំប្រទេសមានការរីកចម្រើនខ្លាំងក្នុងសម័យសង្គមរាស្ត្រនិយម។
ជាការតបស្នងចំពោះពលីកម្មរបស់ព្រះអង្គ រាជរដ្ឋាភិបាលបានសម្រេចកំណត់យកថ្ងៃទី១៥ ខែតុលា ជាថ្ងៃកាន់បុណ្យជាតិ និងជាថ្ងៃកាន់មរណទុក្ខនៃការយាងសោយព្រះទិវង្គតរបស់ព្រះអង្គ ដោយព្រះរាជវង្សានុវង្ស ថ្នាក់ដឹកនាំ មន្រ្តីរាជការគ្រប់លំដាប់ថ្នាក់ គ្រប់ក្រសួង ស្ថាប័ន និងប្រជារាស្រ្តទូទាំងប្រទេសតែងប្រារព្ធពិធីគោរពព្រះវិញ្ញាណក្ខន្ធនៅមណ្ឌលតម្កល់ព្រះបរមរូបស្ថិតនៅសួនច្បារវិមានឯករាជ្យ និងនៅតាមក្រសួង ស្ថាប័ន អង្គភាព វត្តអារាម និងមណ្ឌលសាសនានានានៅទូទាំងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ