អភិបាលខេត្តកណ្តាល៖ វៀតណាមប្រែក្លាយពីតង់ទៅជាសំណង់រឹងមាំដល់១៦ទីតាំងនៅតំបន់មិនទាន់ឯកភាព
អភិបាលខេត្តកណ្ដាល លោក គង់ សោភ័ណ្ឌ ប្រាប់វិទ្យុបារាំងអន្តរជាតិនៅថ្ងៃសុក្រនេះថា ភាគីវៀតណាមបានប្រែក្លាយពីការបោះតង់ទៅជាសំណង់រឹងមាំឡើងដល់១៦ទីតាំងហើយ ក្នុងចំណោមទីតាំងចំនួន២៧នៅតាមបណ្ដោយព្រំដែនមិនទាន់ឯកភាពគ្នា។ ប៉ុន្តែបើតាមអភិបាលខេត្តរូបនេះ អាជ្ញាធរកម្ពុជាក៏បានធ្វើតវ៉ាតាមរយៈលិខិតឲ្យវៀតណាមរុះរើតង់នោះចេញដែរ តែមកទល់ពេលនេះគឺវៀតណាមនៅមិនទាន់រុះរើតង់ណាមួយនៅឡើយ ដោយគេអះអាងថាដល់តែចប់កូវីដ១៩ ទើបអាចរុះរើចេញបាន។
ចុះផ្សាយនៅថ្ងៃ៖
ឆ្លើយតបនឹងការបារម្ភដែលថា នៅពេលវៀតណាមបានប្រែក្លាយពីការបោះតង់ ទៅជាសំណង់រឹងមាំដែលពិបាកក្នុងទាមទារឲ្យរុះរើចេញនោះ លោក គង់ សោភ័ណ្ឌ អះអាងថា ផ្អែកតាមទិដ្ឋភាពផ្លូវច្បាប់គឺវៀតណាមមិនអាចធ្វើអ្វីបំពានបានទេ ខណៈដែលប្រទេសទាំងពីរមិនធ្លាប់មានការប្រទូសសារាយខាងកម្លាំងប្រដាប់អាវុធនៅតាមព្រំដែនម្តងណាឡើយ។ ម្យ៉ាងទៀតលោកយល់ថា ការដែលវៀតណាមនៅបន្តដាក់កម្លាំងប្រចាំការនៅទីតាំងដែលគេបោះតង់នោះ គឺជាការជួយការពារកម្ពុជាកុំឆ្លងជំងឺកូវីដ១៩ទៅវិញទេ។
កាលពីចុងខែសីហា ឆ្នាំ២០២០ ស្នងការនគរបាលខេត្តកណ្ដាល បានរាយការណ៍ថា វៀតណាម បានសាងសង់ជម្រករឹងមាំធ្វើពីឈើសសរថ្ម កម្ពស់៣ម៉ែត្រ ទំហំ៥ម៉ែត្រគុណនឹង៤ម៉ែត្រ ដំបូលប្រក់ស័ង្កសី ស្ថិតនៅចម្ងាយប្រមាណ១២០ម៉ែត្រ ពីខ្សែបន្ទាត់ព្រំដែនកម្ពុជា-វៀតណាមដែលមិនទាន់ឯកភាពគ្នា។
លោក វ៉ា គឹមហុង ទេសរដ្ឋមន្ដ្រីទទួលបន្ទុកកិច្ចការព្រំដែនកម្ពុជា តាមរយៈក្បាលមេក្រូរបស់វិទ្យុបារាំងអន្ដរជាតិ កាលពីខែឧសភា២០២០ លោកបានពន្យល់ថា តំបន់ដែលយោធាវៀតណាមចូលមកបោះតង់នៅក្នុងស្រុកចំនួនពីរនៃខេត្តកណ្ដាល កាលពីថ្ងៃទី២៦មេសាឆ្នាំ២០២០នោះ គឺជាតំបន់ស្មុគស្មាញទាំងលក្ខណៈបច្ចេកទេសនិងផ្លូវច្បាប់។
តែបើតាមលោកវ៉ា គឹមហុង បើទោះក្នុងចេតនាណាក៏ដោយ ភាគីវៀតណាមមិនគួរមកបោះតង់នៅលើតំបន់ដែលមិនទាន់ឯកភាពគ្នានេះទេ ដោយត្រូវរក្សាស្ថានភាពដើមឲ្យនៅដដែល ព្រោះតំបន់នោះ ភាគីទាំងពីរបានឯកភាពគ្នាថា នឹងស្នើសុំឲ្យប្រទេសបារាំងជួយចម្លងផែនទី UTM ពីខ្នាត១លើ១០០ពាន់ មកខ្នាត១លើ៥០ពាន់វិញដើម្បី បោះបង្គោលព្រំដែន។
បើតាមគណៈកម្មាធិការព្រំដែនកម្ពុជា ចាប់តាំងពីផ្ទុះជំងឺកូវីដ១៩មក វៀតណាមបានបោះតង់នៅតាមបណ្តោយព្រំដែនប្រទេសទាំងពីរ ទាំងតំបន់មិនទាន់ឯកភាពនិងតំបន់ឯកភាពគ្នារួច មានចំនួន២៥៦ទីតាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ