ប្រមុខការទូតកម្ពុជា៖ហុងគ្រី គឺជាមិត្តដ៏ជិតស្និតមួយទៀតដែលជួយគាំទ្រកម្ពុជានៅក្នុងបញ្ហាEBA
លោកភីធើ ស៊ីចាតូ (Péter Szijjártó) រដ្ឋមន្រ្តីការបរទេស និងពាណិជ្ជកម្មនៃប្រទេសហុងគ្រីបានមកដល់ប្រទេសកម្ពុជានៅព្រឹកថ្ងៃអង្គារនេះ ដើម្បីបំពេញទស្សនកិច្ចដ៏កម្រនៅកម្ពុជា។ នៅព្រឹកនេះ លោកភីធើ ស៊ីចាតូ (Péter Szijjártó)បានជួបប្រជុំការងារទ្វេភាគីជាមួយលោកប្រាក់ សុខុន រដ្ឋមន្រ្តីការបរទេសកម្ពុជា។ សម្រាប់កម្ពុជា លោកប្រាក់ សុខុន បានគូសបញ្ជាក់ថា ហុងគ្រី គឺជាមិត្តដ៏ជិតស្និតមួយទៀតដែលបានជួយគាំទ្រកម្ពុជា ដើម្បីស្វែងរកយុត្តិធម៌នៅក្នុងបញ្ហាប្រព័ន្ធអនុគ្រោះពន្ធEBA។
ចុះផ្សាយនៅថ្ងៃ៖
ស្តាប់ - ០២:២១
«ហុងគ្រី គឺជាមិត្តដ៏ជិតស្និទ្ធមួយរបស់កម្ពុជា»។ នេះ គឺជាការគូសបញ្ជាក់របស់រដ្ឋមន្ត្រីក្រសួងការបរទេសកម្ពុជាលោកប្រាក់ សុខុន នៅក្នុងសន្និសីទសារព័ត៌មានក្រោយបញ្ចប់ជំនួបជាមួយរដ្ឋមន្រ្តីការបរទេស និងពាណិជ្ជកម្មនៃប្រទេសហុងគ្រី។ ការចាត់ទុកបែបនេះ បើតាមលោកប្រាក់ សុខុន គឺដោយសារតែប្រទេសហុងគ្រីបានផ្តល់នូវជំនួយ និងការគាំទ្រមកដល់កម្ពុជា នៅពេលដែលកម្ពុជាកំពុងត្រូវការជំនួយជាចាំបាច់ បន្ទាប់ពីងើបផុតពីភ្លើងសង្រ្គាមនៃរបបខ្មែរក្រហម។ ក្នុងនោះ កងទ័ពមួកខៀវហុងគ្រីក៏បានបញ្ជូនមកកម្ពុជាក្រោមឆត្រ័របស់អាជ្ញាធរបណ្តោះអាសន្នរបស់អង្គការសហប្រជាជាតិនៅកម្ពុជាហៅកាត់ថា UNTAC ថែមទៀត។
បន្ថែមពីលើបញ្ហានេះ លោករដ្ឋមន្រ្តីការបរទេសកម្ពុជាក៏លើកឡើងពីទឹកចិត្តរបស់ហុងគ្រីដែលមានចំពោះកម្ពុជានៅក្នុងបញ្ហាប្រព័ន្ធអនុគ្រោះEBAផងដែរ។ តាមលោកប្រាក់ សុខុន ជំហររបស់ហុងគ្រីលើការដកប្រព័ន្ធអនុគ្រោះពន្ធ EBA គឺជាឧទាហរណ៍មួយទៀតដែលសរបញ្ជាក់អំពីមិត្តដែលយល់ពីស្ថានភាពរបស់កម្ពុជា ហើយក្លាហានក្នុងការគាំទ្រកម្ពុជាឱ្យទទួលបានយុត្តិធម៌ ដើម្បីឆ្ពោះទៅរកលទ្ធិប្រជាធិបតេយ្យប្រកបដោយសន្តិភាព និងការអភិវឌ្ឍប្រកបដោយចីរភាព។
សូមបញ្ជាក់ថា នៅក្នុងភាពចម្រូងចម្រាសនៃបញ្ហាប្រព័ន្ធអនុគ្រោះពន្ធEBAរវាងកម្ពុជា និងសហភាពអឺរ៉ុប ថ្នាក់ដឹកនាំកំពូលរបស់ប្រទេសហុងគ្រីបានបង្ហាញជំហរឈរនៅខាងកម្ពុជា។ កាលពីពាក់កណ្តាលឆ្នាំ២០១៩កន្លងទៅ លោកនាយករដ្ឋមន្រ្តីហ៊ុន សែន បានទៅបំពេញទស្សនកិច្ចដោយផ្ទាល់នៅក្នុងប្រទេសហុងគ្រី។ នៅទីនោះ បញ្ហាប្រព័ន្ធអនុគ្រោះពន្ធEBAរបស់សហភាពអឺរ៉ុបនេះ ត្រូវបានថ្នាក់ដឹកនាំកំពូលនៃប្រទេសទាំងពីរលើកទៅពិភាក្សាគ្នាយ៉ាងល្អិតល្អន់។
ប៉ុន្តែបើទោះជាមានការជួយគាំទ្រពីប្រទេសហុងគ្រីដែលជាសមាជិកមួយនៃសហភាពអឺរ៉ុបក៏ដោយ ក៏ចុងក្រោយគណៈកម្មការអឺរ៉ុបនៅតែសម្រេចដកផ្នែកខ្លះនៃប្រព័ន្ធអនុគ្រោះពន្ធEBAពីកម្ពុជាដោយចាប់អនុវត្តជាផ្លូវការកាលពីថ្ងៃទី១២ ខែសីហាកន្លងទៅ។ ការសម្រេចនេះ គឺប៉ះពាល់ដល់ទំនិញនាំចេញរបស់កម្ពុជាទៅកាន់ទីផ្សារសហភាពអឺរ៉ុបប្រមាណ២០% ប៉ុន្តែកម្ពុជានៅតែអាចបន្តនាំចេញទំនិញទាំងនេះបាន តែក្នុងលក្ខខណ្ឌត្រូវបង់ពន្ធ។ ចំណែក ទំនិញរបស់កម្ពុជា៨០%ទៀត គឺនៅតែអាចបន្តនាំចេញទៅអឺរ៉ុបដោយមិនបង់ពន្ធដដែល។ ទំនិញដែលប៉ះពាល់ដោយសារបាត់ផ្នែកខ្លះនៃEBAនេះ គឺមាន៤០មុខ ភាគច្រើនជាសម្លៀកបំពាក់ ស្បែកជើង និងផលិតផលធ្វើដំណើរដែលនាំទៅអឺរ៉ុបក្នុងតម្លៃ១ពាន់លានអឺរ៉ូជារៀងរាល់ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ