អ្នកសេដ្ឋកិច្ច៖ កសិកម្មជាវិស័យអាទិភាពជួយស្តារសេដ្ឋកិច្ចកម្ពុជាក្នុងបរិបទកូវីដ១៩
ស្ថិតក្នុងបរិបទកូវីដ១៩ ការព្យាករណ៍កំណើនសេដ្ឋកិច្ច ពីធនាគារពិភពលោកបានសំអាងថាកំណើនសេដ្ឋកិច្ចកម្ពុជា ក្នុងឆ្នាំ២០២០ ធ្លាក់ចុះត្រឹមដក២% ប៉ុន្តែនឹងងើបមកវិញនៅឆ្នាំ២០២១ ចំនួនជិត៤%។ ដើម្បីស្តារសេដ្ឋកិច្ចកម្ពុជាឲ្យងើបឡើងវិញ អ្នកជំនាញផ្នែកសេដ្ឋកិច្ចថា កម្ពុជាគួរតែផ្តើមពីវិស័យកសិកម្មមុនគេ ក្នុងចំណោមវិស័យមួយចំនួនដែលជួយលើកស្ទួយសេដ្ឋកិច្ចកម្ពុជា។ ព្រោះកម្ពុជា ដីកសិកម្មមានជីវជាតិ ហើយប្រជាពលរដ្ឋភាគច្រើនប្រមាណពី៦៥ទៅ៧៥ភាគរយ កំពុងប្រកបរបរកសិកម្ម ។
ចុះផ្សាយនៅថ្ងៃ៖
ស្តាប់ - ០២:៤៦
អ្នកជំនាញផ្នែកសេដ្ឋកិច្ច លោកបណ្ឌិតឆេង គឹមឡុង មើលឃើញថា ដើម្បីស្តារសេដ្ឋកិច្ចកម្ពុជាឡើងវិញ ខណៈដែលកំពុងជួបវិបត្តិកូវីដ១៩ដូចនេះ វិស័យកសិកម្ម គឺជាវិស័យសំខាន់មួយមុនគេ ក្នុងចំណោមវិស័យចម្បងៗ ជាច្រើនទៀត ដែលអាចជួយស្តារសេដ្ឋកិច្ចកម្ពុជាបាន ព្រោះកម្ពុជាមានសក្តានុពលផ្នែកកសិកម្ម ដោយសារដីកសិកម្មមានជីវជាតិ អាចដាំដំណាំច្រើន និងគ្រប់ប្រភេទបានដូចជាដំណាំស្រូវ បន្លែ និងមានកត្តាអនុគ្រោះសំខាន់មួយទៀត គឺប្រព័ន្ធធារាសាស្រ្ត។ ថ្វីបើប្រព័ន្ធធារាសាស្រ្តកម្ពុជានេះមិនទាន់រីកចម្រើនពិតមែន តែកម្ពុជាអាចស្តារ និងពង្រីកឡើងវិញ ដើម្បីចែកចាយផ្គត់ផ្គង់ទឹក ក្នុងការបំរើឱ្យវិស័យកសិកម្ម។ ជាមួយគ្នានេះដែរ ប្រជាពលរដ្ឋកម្ពុជា នៅតាមទីជនបទភាគច្រើនប្រមាណពី ៦៥ទៅ៧៥% ក៏កំពុងប្រកបរបរកសិកម្ម។ និងថា គឺមានតែរបរកសិកម្មនេះទេ ដែលអាចបំរើការផ្តត់ផ្គង់តម្រូវការម្ហូបអារហារប្រើប្រាស់ប្រចាំគ្រួសារ ក៏ដូចជាការប្រើក្នុងឧស្សហកម្មទេសចរណ៍ខ្នាតតូច និងមធ្យមជាដើម។
ទន្ទឹមនឹងនេះ កម្ពុជាក៏គួរតែផ្តោះប្តូរទំនាក់ទំនងបច្ចេកវិទ្យាជាមួយ-ចិន ជប៉ុន កូរ៉េ និងអាស៊ានជាដើម ក្នុងការទាញយកប្រយោជន៍ពីបច្ចេកវិទ្យា តាមបណ្តាប្រទេសជឿនលឿនមធ្យមនិងខ្លាំងទាំងនេះ ដើម្បីពង្រឹងវិស័យកសិកម្ម និងកសិឧស្សាហកម្ម។ ក្រៅពីនេះ វិនិយោគអន្តរជាតិ ក៏ជាចំនុចបន្ទាប់ ដែលអាចជួយស្តារសេដ្ឋកិច្ចកម្ពុជាឡើងវិញដែរ ដូចជាការភ្ជាប់ការវិនិយោគអន្តរជាតិ តាមរយៈវិស័យឯកជន និងឯកជន ដោយក្នុងនោះរដ្ឋជួយជំរុញឯកជន ដោយបង្កើននូវវិធានការ និងយុទ្ធសាស្រ្ត ជួយសម្រួលបែបបទ លិខិតបទដ្ឋានគត្តិយុទ្ធ និងកាត់បន្ថយការចំណាយក្រៅផ្លូវការ ដើម្បីលើកទឹកចិត្តដល់វិស័យឯកជនឲ្យដាក់ទុនវិនិយោគនៅកម្ពុជា។
ចំពោះក្រសួងសេដ្ឋកិច្ចវិញ តាមរយៈអ្នកនាំពាក្យលោកមាស សុខសេនសាន អះអាងប្រាប់វិទ្យុបារាំងអន្ដរជាតិ RFI ថា ក្រសួងនឹងអនុវត្តទៅតាមវិធានការរបស់រាជរដ្ឋាភិបាល ក្នុងការស្តារសេដ្ឋកិច្ចជាតិឡើងវិញ តាមរយៈយន្តការដែលមានស្រាប់ដដែល រួមមានការជួយដល់ប្រជាពលរដ្ឋក្រីក្រ ការផ្តល់ថវិកាជួយដល់សហគ្រានធុនតូច និងមធ្យម សហគ្រាស ធនាគារអភិវឌ្ឍន៍កសិកម្មជនបទ និងកសិកម្ម ការអនុគ្រោះពន្ធ និងការបើកប្រាក់ពលកម្មឱ្យកម្មករជាដើម។ ជារួមលទ្ធផល ឃើញថាមានស្ថានភាពដំណើរការធម្មតាជាប្រក្រតី គឺលើកលែងតែបញ្ហាពីខាងក្រៅមានដូចជាទេសចរណ៍ ប៉ុន្តែក្រសួងក៏កំពុងបន្តដោះស្រាយជាបណ្តើរៗ។ នេះបើតាមអ្នកនាំពាក្យក្រសួងសេដ្ឋកិច្ច លោក មាស សុខសេនសាន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ