អង់គ្លេសនិងអៀឡង់ខាងជើងបន្តផ្តល់ប្រព័ន្ធអនុគ្រោះពន្ធលើគ្រប់មុខទំនិញទាំងអស់ដល់កម្ពុជា
ក្រសួងការបរទេសកម្ពុជាបានប្រកាសថា ប្រទេសអង់គ្លេសនិងអៀឡង់ខាងជើង នឹងផ្តល់ប្រព័ន្ធអនុគ្រោះពន្ធលើគ្រប់មុខទំនិញទាំងអស់លើកលែងតែសព្វាវុធដល់កម្ពុជា ចាប់ពីដើមឆ្នាំ២០២១ខាងមុខនេះ។ ពីចំណែកកម្ពុជាវិញ បានសម្តែងការត្រេកអរ និងបានចាត់ទុកថា ការសម្រេចចិត្តនេះ គឺជាដំណឹងល្អសម្រាប់កម្មករកម្ពុជា នៅពេលដែលពួកគេកំពុងទទួលរងផលប៉ះពាល់ពីមហន្តរាយនៃជំងឺកូវីដ-១៩។
ចុះផ្សាយនៅថ្ងៃ៖
ស្តាប់ - ០២:១៦
ដំណឹងនេះ ត្រូវបានប្រកាសឡើង បន្ទាប់ពីមានជំនួបមួយរវាងប្រមុខការទូតកម្ពុជាលោក ប្រាក់ សុខុន និងលោកស្រី Tina Redshaw ឯកអគ្គរាជទូតអង់គ្លេសនិងអៀឡង់ខាងជើងប្រចាំនៅកម្ពុជា កាលពីថ្ងៃទី ១៦ ធ្នូ ឆ្នាំ ២០២០ នេះ។ តាមរយៈជំនួបនេះ លោកស្រីឯកអគ្គរាជទូតអង់គ្លេសបានប្រាប់សមភាគីកម្ពុជាថា រដ្ឋមន្ត្រីទាំងអស់របស់អង់គ្លេស បានឯកភាពគ្នាថា នឹងមិនបន្តអនុវត្តការព្យួរមួយផ្នែកនៃប្រព័ន្ធអនុគ្រោះពន្ធរបស់សហភាពអឺរ៉ុបក្នុងក្របខ័ណ្ឌប្រព័ន្ធអនុគ្រោះពន្ធលើគ្រប់មុខទំនិញទាំងអស់លើកលែងតែសព្វាវុធ (EBA) មកលើកម្ពុជាទៀតនោះទេ។ មូលហេតុ គឺដោយសារថា អង់គ្លេសបានមើលឃើញពីផលប៉ះពាល់នៃជំងឺកូវីដ-១៩ មកលើក្រុមមនុស្សងាយរងគ្រោះជាច្រើននៃសង្គមកម្ពុជា ដែលក្នុងនោះរួមមានទាំងកម្មកររោងចក្រផងដែរ។ បើតាមលោកស្រីឯកអគ្គរាជទូតអង់គ្លេសរូបនេះ ចាប់ពីថ្ងៃទី ០១ ខែមករា ឆ្នាំ ២០២១ ខាងមុខនេះតទៅ អង់គ្លេសនឹងអនុវត្តនូវគោលនយោបាយពាណិជ្ជកម្មឯករាជ្យមួយ។
សូមបញ្ជាក់ថា អង់គ្លេសនឹងចាកចេញពីសមាជិកសហភាពអឺរ៉ុប នៅចុងឆ្នាំ២០២០នេះ។ សហភាពអឺរ៉ុប តាមរយៈគណៈកម្មការអឺរ៉ុប កាលខែសីហា ឆ្នាំ២០២០កន្លងទៅ បានសម្រេចព្យួរផ្នែកខ្លះនៃប្រព័ន្ធអនុគ្រោះពន្ធ EBA ពីកម្ពុជា ដោយសារតែកម្ពុជាមានការរំលោភសិទ្ធិមនុស្សធ្ងន់ធ្ងរ និងជាលក្ខណៈប្រព័ន្ធ។ ប៉ុន្តែទោះជាយ៉ាងនេះក្តី មិនមែនមានន័យថា អង់គ្លេសនឹងមិនខ្វល់ខ្វាយពីបញ្ហាសិទ្ធិមនុស្ស និងសិទ្ធិសេរីភាពផ្សេងៗនៅកម្ពុជានោះទេ។ អង់គ្លេសកំពុងរិះរកវិធីដើម្បីបង្កើតកិច្ចសន្ទនាជាទៀងទាត់ជាមួយអាជ្ញាធរមានសមត្ថកិច្ចកម្ពុជា លើបញ្ហាផ្សេងៗពាក់ព័ន្ធនិងវិស័យសិទ្ធិមនុស្ស និងសេរីភាពជាមូលដ្ឋាន។ នេះបើតាមសេចក្តីប្រកាសព័ត៌មានរបស់ក្រសួងការបរទេសកម្ពុជា ចេញផ្សាយកាលពីថ្ងៃទី ១៧ ធ្នូ។
ពីចំណែកកម្ពុជាវិញ តាមរយៈលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា បានសម្តែងការកើតសរសើរយ៉ាងខ្លាំងចំពោះការសម្រេចចិត្តរបស់អង់គ្លេស និងបានចាត់ទុកថា ជាការជំរុញ និងលើកទឹកចិត្តដល់រដ្ឋាភិបាលកម្ពុជា ហើយថា ការសម្រេចចិត្តនេះ គឺពិតជាដំណឹងល្អសម្រាប់កម្មករកម្ពុជា នៅពេលដែលពួកគេកំពុងទទួលរងផលប៉ះពាល់ពីមហន្តរាយនៃជំងឺកូវីដ-១៩។ ទន្ទឹមគ្នានេះ ប្រមុខការទូតកម្ពុជា បានប្តេជ្ញាចិត្តយ៉ាងមុតមាំក្នុងការកសាងទំនាក់ទំនងដែលផ្តល់ផលប្រយោជន៍ទៅវិញទៅមកជាមួយចក្រភពអង់គ្លេសទាំងលើវិស័យទ្វេភាគី និងពហុភាគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ