អាជ្ញាធរខ្មែរជាប់ព្រំដែនថៃបង្កើនការរឹតបន្តឹងការឆ្លងកាត់ព្រំដែន ខណៈកូវីដ១៩ផ្ទុះខ្លាំងនៅខេត្តសាមុតសាខន
អាជ្ញាធរខ្មែរនៅជាប់ព្រំដែនប្រទេសថៃបានបង្កើនការរឹតបន្តឹងការចេញ-ចូលរបស់ពលរដ្ឋ នៅថ្ងៃចន្ទនេះ ខណៈដែលជំងឺកូវីដ១៩បានផ្ទុះឡើងចូលទៅសហគមន៍ក្នុងខេត្តសាមុតសាខន ដែលមានចម្ងាយប្រមាណ៣០០គីឡូម៉ែត្រពីកម្ពុជា។ ការរឹតបន្តឹងការឆ្លងកាត់ព្រំដែននេះ គឺបន្ទាប់ពីមានបទបញ្ជាជាបន្ទាន់មួយរបស់ប្រមុខរដ្ឋាភិបាលកម្ពុជា កាលពីម្សិលមិញឲ្យអាជ្ញាធរខ្មែរត្រៀមលក្ខណៈទទួលពលករខ្មែរដែលមកពីថៃវិញដើម្បីធ្វើចត្តាឡីស័ក្ត១៤ថ្ងៃ។
ចុះផ្សាយនៅថ្ងៃ៖
ស្តាប់ - ០១:៤៧
លោក លី សារី អ្នកនាំពាក្យសាលាខេត្តបន្ទាយមានជ័យ ប្រាប់វិទ្យុបារាំងអន្តរជាតិRFIនៅព្រឹកថ្ងៃចន្ទនេះថា បន្ទាប់ពីមានការផ្ទុះជំងឺកូវីដ១៩នៅខេត្តសាមុតសាខន អាជ្ញាធរព្រំដែនកម្ពុជានិងថៃ បាននិងកំពុងចាត់វិធានការរឹតបន្តឹងខ្លាំងលើការឆ្លងកាត់ព្រំដែនប្រទេសទាំងពីរ ដូចជា នៅច្រកម៉ាឡៃ បឹងត្រកួន និងច្រកទ្វារអន្តរជាតិប៉ោយប៉ែតជាដើម។
បើតាមអ្នកនាំពាក្យរូបនេះ ក្រៅពីច្រកទ្វារផ្លូវការសំខាន់ៗទាំង៣នេះ នៅតាមច្រករបៀងតូចៗ ក៏អាជ្ញាធរមានការរឹតបន្តឹងខ្លាំងដែរ ជាមួយនឹងការត្រៀមជាស្រេចនូវកន្លែងធ្វើចត្តាឡីស័ក្ត សម្រាប់ពលករដែលវិលត្រឡប់មកពីថៃវិញ។ តែលោកមិនអាចបញ្ជាក់បានទេពីចំនួនពលករខ្មែរដែលវិលមកពីថៃវិញនៅពេលនេះ បន្ទាប់ពីថៃផ្ទុះជំងឺកូវីដ១៩ឆ្លងចូលសហគមន៍ដែលបានរកជាង៥០០ករណីតែក្នុងមួយថ្ងៃនោះ។
ការរាលដាលកូវីដទៅក្នុងសហគមន៍នៅប្រទេសថៃពេលនេះ បានគំរាមកំហែងដល់ពលករបរទេសជាច្រើនដែលកំពុងធ្វើការនៅទីនោះ រាប់ទាំងពលករខ្មែរ និងភូមាផងដែរ។
នៅចំពោះមុខនេះ លោកនាយករដ្ឋមន្ត្រី ហ៊ុន សែន នៅថ្ងៃទី២០ធ្នូ បានបញ្ជាឲ្យកងពលតូចដឹកជញ្ជូនលេខ៩៩ បញ្ចេញរថយន្តយោធាចំនួន៤៥គ្រឿងឆ្ពោះទៅកាន់គោលដៅព្រំដែនចំនួនពីរ គឺទៅច្រកព្រំដែនអូរស្មាច់ ខេត្តឧត្តរមានជ័យចំនួន៣០គ្រឿង និងច្រកដូងខេត្តបាត់ដំបងចំនួន១៥គ្រឿង ដើម្បីត្រៀមដឹកពលករខ្មែរ ដែលត្រឡប់ពីប្រទេសថៃវិញ ដើម្បីធ្វើចត្តាឡីស័ក្ត១៤ថ្ងៃ។ តែជាមួយគ្នានោះ លោកប្រមុខរដ្ឋាភិបាលក៏បានអំពាវនាវផងដែរ កុំឲ្យពលករខ្មែរមានការតក់ស្លុត ហើយសម្រុកវិលមកកម្ពុជាវិញ ដោយធ្វើយ៉ាងណាបន្តស្នាក់នៅប្រទេសថៃតទៅទៀត និងធ្វើចត្តាឡីស័ក្តទៅតាមការរៀបចំរបស់អាជ្ញាធរថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ