របាយការណ៍ស្ទង់មតិ៖ ក្រោយការបាត់បង់ចំណូល ពលករខ្មែរចាប់ផ្តើមមានបញ្ហាផ្លូវចិត្តនៅក្នុងបរិបទកូវីដ១៩
ពលករខ្មែរមកពីប្រទេសថៃ មួយចំនួនធំបានត្អួញត្អែរថា ពួកគេកំពុងរងនូវផលប៉ះពាល់ទាំងផ្នែកសុខភាពរាងកាយ និងសុខភាពផ្លូវចិត្ត ក៏ដោយសារការបាត់បង់ប្រាក់ចំណូលមួយផ្នែករបស់ពួកគេ។ បើតាមរបាយការណ៍ស្ទង់មតិមួយស្តីអំពី «ការវាយតម្លៃយ៉ាងឆាប់រហ័សទៅលើផលប៉ះពាល់សង្គមនិងសុខភាពនៃជំងឺកូវីដ១៩ ក្នុងចំណោមពលករដែលចូលមកកម្ពុជាវិញ» ចេញផ្សាយដោយអង្គការទេសន្តរប្រវេសន៍អន្តរជាតិ និងមូលនិធិសហប្រជាជាតិសម្រាប់ប្រជាជន កាលពីថ្ងៃទី១៨ធ្នូកន្លងទៅនេះ។
ចុះផ្សាយនៅថ្ងៃ៖
ស្តាប់ - ០២:០០
ក្រោយការត្រលប់មកកាន់កម្ពុជាវិញ ពលករចំណាកស្រុកទាំងនោះភាគច្រើនកំពុងជួបវិបត្តិហិរញ្ញវត្ថុ។ ដោយយោងតាមរបាយការណ៍ ដែលធ្វើការស្ទង់មតិពលករចំនួន១១០៨នាក់ បានបង្ហាញថា ពួកគេអាចរកប្រាក់់ចំណូលជាមធ្យមត្រឹម១៦៤ដុល្លារប៉ុណ្ណោះ ខុសពីការរកប្រាក់ចំណូលនៃឯប្រទេសថៃ ដែលអាចរកបានជាមធ្យម ២៩៤ដុល្លារក្នុងមួយខែ។ មិនតែប៉ុណ្ណោះ ពលករប្រមាណ៦៤៣នាក់ ក្នុងចំណោមពលករ១១០៨នាក់នោះ ក៏កំពុងជួបប្រទះនឹងភាពអត់ការងារធ្វើ ដែលនាំពួកគេគ្មានប្រភពចំណូលចូលគ្រួសារ និងជំពាក់បំណុលធនាគារទៀតផង។
ការណ៍នេះបានធ្វើឲ្យពលករដែលត្រលប់មកកម្ពុជាវិញទាំងនោះ បានបង្ហាញក្តីព្រួយបារម្ភអំពី ការរកចំណូលមិនបានគ្រប់គ្រាន់ ការប្រឈមនឹងភាពគ្មានការងារធ្វើ ការឆ្លងនូវជំងឺកូវីដ១៩ ការប៉ះពាល់ដល់បញ្ហាសុខភាព កង្វះអាហារប្រចាំថ្ងៃ ព្រមទាំងគ្មានលទ្ធភាពក្នុងការសងបំណុល។
បញ្ហាសុខភាព ពលករខ្មែរ១ភាគ៥ បង្ហាញថាពួកគេកំពុងជួបបញ្ហាសុខភាពផ្នែករាងកាយ ឯពលករ២ភាគ៥ បង្ហាញថាពួកគេកំពុងចាប់ផ្តើមមានបញ្ហាផ្លូវចិត្ត បើទោះបីរដ្ឋាភិបាលបាននិងកំពុងដោះស្រាយវិបត្តិកូវីដ១៩នេះក៏ដោយ ក៏ប៉ុន្តែបញ្ហាចំណូលជារឿងចាំបាច់សម្រាប់ផ្គត់ផ្គង់ក្នុងជីវភាពពួកគេ។
សូមជម្រាបជូនថា ក្នុងចំណោមប្រទេសដែលមានពលករខ្មែរចំណាកស្រុកទៅធ្វើការនោះ គឺប្រទេសថៃស្ថិតនៅលំដាប់ទី១ ដោយមានពលករខ្មែរប្រមាណជិត៤០ម៉ឺនកំពុងធ្វើការនៅទីនោះ។ ភាគច្រើននៃពលករទាំងនោះប្រកបរបរក្នុងវិស័យសំណង់ (៤០.៤%) វិស័យឧស្សាហកម្មរោងចក្រ (១៧.៤%) និងវិស័យកសិកម្ម (១៥.៦%)។ នេះបើតាមរបាយកាណ៍ផលប៉ះពាល់សង្គមនិងសុខភាពនៃជំងឺកូវីដ១៩ទៅលើពលករខ្មែរ។
តែបន្ទាប់ពីមានការផ្ទុះជំងឺឆ្លងកូវីដ១៩កាលពីខែមីនាមក ពលករខ្មែរចំនួនជាង១១ម៉ឺននាក់បានត្រលប់មកកម្ពុជា។ ជាមួយគ្នានេះ ពលករខ្មែរជាច្រើនទៀតក៏កំពុងត្រលប់មកវិញជាបន្តបន្ទាប់ ក្រោយការរាលដាលជំងឺកូវីដ១៩ចូលសហគមន៍នៅខេត្តសាមុតសាខន ប្រទេសថៃ នាពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ