ការនាំចេញពីកម្ពុជាទៅអង់គ្លេសនឹងមានកំណើន ឬថយចុះ ត្រូវពឹងលើសេដ្ឋកិច្ចអង់គ្លេស
ក្រសួងពាណិជ្ជកម្មនៅថ្ងៃទី២៤ ខែធ្នូ ឆ្នាំ២០២០ បានអំពាវនាវឱ្យផលិតករ និងអ្នកនាំចេញទាំងអស់នៅកម្ពុជា រៀបចំនីតិវិធីនៃការស្នើសុំ និងការចេញវិញ្ញាបនបត្របញ្ជាក់ដើមកំណើតទំនិញគ្រប់ទម្រង់ តាមប្រព័ន្ធស្វ័យប្រវត្តកម្ម។ ការអំពាវនាវនេះ បានធ្វើឡើងក្រោយពីការចេញផ្សាយអំពីទំហំពាណិជ្ជកម្មទ្វេភាគីរវាងកម្ពុជា និងអង់គ្លេសដែលបានធ្លាក់ចុះជាង ១៧% គិតត្រឹមរយៈពេល១១ខែនៃឆ្នាំ២០១៩ និង១១ខែនៃឆ្នាំ២០២០។
ចុះផ្សាយនៅថ្ងៃ៖
ស្តាប់ - ០២:២៤
លោកកាំង ម៉ូនីកា អគ្គលេខាធិការរងនៃសមាគមរោងចក្រកាត់ដេរនៅកម្ពុជា(GMAC) បានប្រាប់វិទ្យុបារាំងអន្តរជាតិ RFI នៅថ្ងៃទី២៥ ខែធ្នូនេះថា សេចក្តីជូនដំណឺងនេះ គឺក្រសួងពាណិជ្ជកម្ម ចង់ទាក់ទាញចំណាប់អារម្មណ៍បន្ថែមពីផលិតករ និងអ្នកនាំចេញទាំងអស់។ ក្នុងការត្រៀមខ្លួនបំពេញលក្ខខ័ណ្ឌ ដើម្បីផ្តល់ភស្តុតាងបញ្ជាក់អំពីប្រភពដើមនៃទំនិញដែលបានផលិត និងនាំចេញពីប្រទេសកម្ពុជាដោយក្រសួងពាណិជ្ជកម្ម។ ការបញ្ជាក់ដោយចេញវិញ្ញាបនបត្របញ្ជាក់ដើមកំណើតមុខទំនិញគ្រប់ទម្រង់នេះ នាំឱ្យគយនៅប្រទេសអង់គ្លេសផ្តល់ការអនុគ្រោះលើកលែងពន្ធដល់ទំនិញទាំងនោះ ហើយក៏ជាការចៀសវាងនូវការនាំចូលពីប្រទេសផ្សេងៗ ដែលយកលេសថា នាំចេញពីប្រទេសកម្ពុជា។
ជាមួយគ្នានេះ ការនាំចេញទំនិញចម្បងៗ ពីកម្ពុជាទៅកាន់ប្រទេសអង់គ្លេសកន្លងមកមានដូចជា សំលៀកបំពាក់ និង ស្បែកជើង ក្នុងចំណោមផលិតផលប្រើប្រាស់ផ្សេងៗទៀត ដែលរួមមាន កង់ កាបូប និងផលិតធ្វើដំណើរជាដើម។ ការនាំចេញទៅប្រទេសអង់គ្លេស សម្រាប់ដើមឆ្នាំ២០២១នេះ លោកម៉ូនីកាមើលឃើញថា អាចនឹងល្អប្រសើរបាន គឺពឹងអាស្រ័យលើសេដ្ឋកិច្ចរបស់ប្រទេសអង់គ្លេស បើមានការបញ្ជារទិញច្រើន ទើបមានការនាំចេញខ្ពស់ដែរ ព្រោះកន្លងមក អង់គ្លេសក៏បានទទួលរងពីវិបត្តិកូវីដ១៩ដែរ។ នៅចំពោះមុខ អ្វីដែលកម្ពុជាគួរតែផ្តោត គឺការប្រកួតប្រជែងផ្ទៃក្នុង ដោយរាប់បញ្ចូលទាំងតម្លៃពលកម្ម កម្រិតផលិតភាពការងារ តម្លៃគ្រប់គ្រងឥវ៉ាន់ តម្លៃអគ្គីសនី និងការផ្គត់ផ្គង់វត្ថុធាតុដើម។ ជាមួយគ្នានេះ បើការបញ្ជារទិញវត្ថុធាតុដើមមិនឆ្លើយតបតម្រូវការភ្លាមៗទេ នោះការផលិតក៏មិនទាន់ តាមតម្រូវការទីផ្សារដែរ។ ហើយចំណុចទាំងនេះ កម្ពុជាត្រូវតែយកចិត្តទុកដាក់ និងគ្រប់គ្រងឱ្យបាន នេះបើតាមលោកកាំង ម៉ូនីកា។
គួររម្លឹកដែរថា កម្ពុជាទទួលបានការអនុគ្រោះពន្ធ EBA នេះ តាំងពីអង់គ្លេសឋិតនៅជាសមាជិក របស់សហភាពអឺរ៉ុបមកម្ល៉េះ គឺមានរយៈពេលយូរមកហើយ។ ទើបតែក្នុងខែសីហាកន្លងមក ក្រោមការអនុគ្រោះពន្ធ EBA របស់សហភាពអឺរ៉ុប ទើបតម្រូវឱ្យមានការដកនូវមុខទំនិញខ្លះចេញ ហើយចាប់ពីដើមឆ្នាំ២០២១ទៅ អង់គ្លេសនឹងអនុវត្តគោលនយោបាយពាណិជ្ចកម្មឯករាជ្យរបស់ខ្លួន ដោយផ្តល់ឱ្យកម្ពុជានាំចេញគ្រប់ផលិតផលលើកលែងតែអាវុធជាតិផ្ទុះប៉ុណ្ណោះ។
កន្លងមកយោងតាមទិន្នន័យក្រសួងពាណិជ្ជកម្ម ទំហំពាណិជ្ជកម្មទ្វេភាគីរវាងកម្ពុជា និងអង់គ្លេស បានធ្លាក់ចុះចំនួនជាង ១៧% ដោយគិតត្រឹម១១ខែ ឆ្នាំ២០២០ ធៀបនឹង១១ខែ ឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ