កាត់បឹងតាមោក៖ បក្សប្រជាធិបតេយ្យមូលដ្ឋានថាស្ថាប័នរដ្ឋខ្វះគណនេយ្យភាពចំពោះម្ចាស់ឆ្នោត
តាមរយៈលិខិតរបស់ទីស្តីគណៈរដ្ឋមន្ត្រីបានឲ្យដឹងថារាជរដ្ឋាភិបាលបានកាត់ផ្ទៃបឹងតាមោកជាង២០០ហិកតាទៀត ទៅឲ្យឯកជនធ្វើជាកម្មសិទ្ធិ។ ការកាត់ដីបឹងតាមោក ត្រូវបានគណបក្សក្រៅសភា នៅថ្ងៃទី២៨ ខែធ្នូ រិះគន់ថា ស្ថាប័នពាក់ព័ន្ធខ្វះគណនេយ្យភាពចំពោះម្ចាស់ឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
យោងតាមលិខិតរបស់ទីស្តីការគណៈរដ្ឋមន្ត្រី ចុះថ្ងៃទី២៣ ខែធ្នូ ឆ្នាំ២០២០ រាជរដ្ឋាភិបាលបានសម្រេច ធ្វើប្រទានកម្មជូនលោក លន់ ហាក់ និងអ្នកស្រី ឈុន ចាន់ធី នូវផ្ទៃដីបឹងតាមោក ទំហំ២០ហិកតា ស្ថិតនៅសង្កាត់គោករកា ខណ្ឌព្រែព្នៅ រាជធានីភ្នំពេញ ហើយលោក លន់ ហាក់ និងអ្នកស្រី ឈុន ចាន់ធី ត្រូវប្រគល់ផ្ទៃដីកម្មសិទ្ធិទំហំជាង ១ ៥៧១ម៉ែត្រក្រឡា ស្ថិតនៅសង្កាត់ស្រះចក ខណ្ឌដូនពេញ ឲ្យទៅរដ្ឋាភិបាលវិញ។
បើតាមលិខិតដដែលនេះ ការដោះដូរ គឺដើម្បីសាងសង់អគារទីបញ្ជាការស្រាលទំហំ២១,៧ម៉ែត្រគុណនឹង៤២ម៉ែត្រ កម្ពស់៣ជាន់ នៅលើដីរបស់លោក លន់ ហាក់ និងអ្នកស្រីឈុន ចាន់ធី ជូនរដ្ឋបាលរាជធានីភ្នំពេញ។
លិខិតទី២ ចុះថ្ងៃទី២៤ ខែធ្នូ ដែលគណៈរដ្ឋមន្ត្រីផ្ញើទៅស្ថាប័នពាក់ព័ន្ធបានបញ្ជាក់ថា រាជរដ្ឋាភិបាលបានយល់ព្រមអនុញ្ញាតឲ្យឆ្វៀលដីទំហំ ជាង១៩៦ហិកតា ស្ថិតនៅក្នុងសង្កាត់ពញាពន់ ខណ្ឌព្រែកព្នៅ រាជធានីភ្នំពេញ ចេញពីផ្ទៃដីសរុបនៃបឹងតាមោក ដើម្បីធ្វើប្រទានកម្មជូនលោកស្រី អ៊ុយ បូវី និងលោកស្រី គង់ សុធី។
ក្នុង សជណ ទាំងពីររបស់ទីស្តីការគណៈរដ្ឋមន្ត្រី ដែលមានហត្ថលេខារដ្ឋលេខាធិការទីស្តីការគណៈរដ្ឋមន្ត្រី លោក កែន សត្ថា គឺមិនមានបញ្ជាក់ពីតួនាទីរបស់បុគ្គលទាំង៤នាក់ខាងលើ ដែលរាជរដ្ឋាភបាលកាត់ផ្ទៃបឹងតាមោកឲ្យជា កម្មសិទ្ធិនោះទេ។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន បានអះអាងប្រាប់វិទ្យុបារាំងអន្តរជាតិថា លោកមិនមានព័ត៌មានខាងលើនេះទេ ប៉ុន្តែថាការកាត់ដីណាមួយមិនមែនធ្វើដោយអត្តនោម័តិនោះទេ ពោលគឺជាការសម្រេចរបស់អន្តរក្រសួង។ លោកបន្ថែមថាការសម្រេចរបស់រដ្ឋាភិបាល គឺឆ្លើយតបនឹងតម្រូវការរបស់រដ្ឋាភិបាល ដើម្បីឆ្លើយតបនឹងតម្រូវការរបស់សាធារណៈ។
កាលពីខែមិថុនា ឆ្នាំ២០១៩កន្លងទៅ គណបក្សប្រជាធិបតេយ្យមូលដ្ឋានធ្លាប់បានដាក់សំណើសុំឲ្យរដ្ឋសភា បំភ្លឺទាក់ទងទៅនឹងគម្រោងអភិវឌ្ឍន៍បឹងតាមោក តែគម្រោងការច្បាស់លាស់ និងប្រកបដោយតម្លាភាពមិនទាន់មាននៅឡើយ។ បើតាមគណបក្សប្រជាធិបតេយ្យមូលដ្ឋាន នេះបង្ហាញថាទាំងរដ្ឋសភាដែលមានតំណាងរាស្រ្ត១២៥រូប រួមទាំងរដ្ឋបាលរាជធានីភ្នំពេញ និងរដ្ឋាភិបាលថ្នាក់ជាតិខ្វះនូវគណនេយ្យភាពចំពោះប្រជាពលរដ្ឋដែលជាម្ចាស់ឆ្នោត។
យោងតាមទិន្នន័យរបស់អង្គការសមាគមធាងត្នោតផ្ទៃបឹងតាមោក ឬបឹងកប់ស្រូវទំហំជាង ៥១១ហិកតា ត្រូវបានកាត់ ខណៈដែលបឹងនេះមានទំហំសរុបជាង ៣ ២៣៩ហិកតា។ បឹងតាមោក ឬបឹងកប់ស្រូវ គឺជាបឹងធម្មជាតិធំជាងគេនៅរាជធានីភ្នំពេញ ដែលមានទីតាំងនៅភាគខាងលិចឈៀងខាងជើងតាមបណ្តោយមហាវិថីឈ្នះឈ្នះ លាតសន្ធឹងលើខណ្ឌចំនួន ២ សង្កាត់ចំនួន ៦ និងភូមិចំនួន ២៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ