អាជ្ញាធរនៅខេត្តជាប់ព្រំដែនពង្រឹងការធ្វើចត្តាឡីស័ក ក្រោយរកឃើញពលករខ្មែរមកពីថៃវិជ្ជមានវីរុសកូវីដ១៩
ខេត្តនៅជាប់ព្រំដែនកម្ពុជាថៃ ពង្រឹងវិធានការធ្វើចត្តាឡីស័ក ហ្មត់ចត់ចំពោះពលករខ្មែរ ដែលត្រឡប់មកពីប្រទេសថៃ ក្រោយពីរកឃើញពលករខ្មែរចំនួន ១២នាក់មានវិជ្ជមានកូវីដ១៩ នៅថ្ងៃទី០១ ខែមករា ដើមឆ្នាំ២០២១នេះ។ នៅចំពោះមុខការពង្រឹងការធ្វើចត្តាឡីស័កសម្រាប់ពលករខ្មែរនេះ ខេត្តទាំងនោះមានរៀបចំមណ្ឌលសម្រាប់ធ្វើចត្តាឡីស័កគ្រប់គ្រាន់ ដោយមានការជួយសម្រួលថវិកា ការរស់នៅប្រចាំថ្ងៃ ចំពោះពលករដែលបានធ្វើចត្តាឡីស័ក។
ចុះផ្សាយនៅថ្ងៃ៖
ស្តាប់ - ០២:៣៧
គិតត្រឹមថ្ងៃទី០១ ខែមករា ដើមឆ្នាំ២០២១នេះ ក្នុងចំណោមពលករខ្មែរមកពីប្រទេសថៃចំនួន ៦៩នាក់ដែលកំពុងធ្វើចត្តាឡីស័ក ក្នុងមណ្ឌលចត្តាឡីស័ក នៅខេត្តប៉ៃលិន គឺមានពលករខ្មែរជាស្រី្តចំនួន ១០នាក់ ដែលមានវីរុសកូវីដ១៩។ លោកស្រីបាន ស្រីមុំ អភិបាលនៃគណៈអភិបាលខេត្តប៉ៃលិន បានអះអាងប្រាប់វិទ្យុបារាំងអន្តរជាតិ RFI នៅថ្ងៃនេះថា ក្នុងការដាក់ឱ្យធ្វើចត្តាឡីស័កចំពោះពលករដែលទើបត្រឡប់មកពីប្រទេសថៃ។ ខេត្តបានរៀបចំទីតាំងសម្រាប់មណ្ឌលធ្វើចត្តាឡីស័កគ្រប់គ្រាន់ហើយ ចំពោះមណ្ឌលធ្វើចត្តាឡីស័កត្រៀម ខណៈដែលនឹងមានពលករមកជាបន្តរបន្ទាប់ទៀតនោះ ក៏បានត្រៀមរួចរាល់ហើយដែរ។
ជាមួយគ្នានេះ ចំពោះកញ្ចប់ថវិកាដែលរដ្ឋាភិបាលកម្ពុជាបានទម្លាក់ទៅខេត្តជាប់ព្រំដែនខ្មែរ-ថៃ កាលពីពេលកន្លងមក សម្រាប់ការធ្វើចត្តាឡីស័កនោះ។ នៅចំពោះមុខខេត្តប៉ៃលិនមិនទាន់មានការខ្វះខាតនៅឡើយទេ ហើយក្រៅពីថវិការដ្ឋឧបត្ថម្ភ ខេត្តប៉ៃលិនក៏មានការជួយបរិច្ចាកពីសប្បុរសជនក្នុងខេត្តផងដែរ។
ស្របគ្នានេះ ខេត្តប៉ៃលិន បានអំពាវនាវឱ្យពលករខ្មែរដែលរស់នៅ ធ្វើការក្នុងប្រទេសថៃទាំងអស់ ប្រសិនជាមានបំណងត្រឡប់មកស្រុកកំណើតវិញ សូមកុំឱ្យមានការភ័យខ្លាចចំពោះ ការធ្វើចត្តាឡីស័កឱ្យសោះ។ សូមកុំជឿតាមការផ្សព្វផ្សាយព័ត៌មានមិនពិតមួយចំនួន ដែលថា មានការចាប់ខ្លួនអីនោះឱ្យសោះ។ ការធ្វើចត្តាឡីស័កនេះ គឺមានកន្លែងសម្រាកក្នុងសណ្ឋាគារទំនើបមួយក្នុងខេត្តប៉ៃលិន តែលោកស្រីអភិបាលខេត្តមិនបញ្ជាក់ឈ្មោះសណ្ឋាគារនោះទេ ហើយបន្តថា កន្លែងធ្វើចត្តាឡីស័កនោះ មានអារហារហូបចុកគ្រប់គ្រាន់ មិនមានការលំបាកអ្វីនោះឡើយ។
ចំពោះខេត្តបាត់ដំបងវិញ តាមរយៈលោកសឿម ប៊ុនរិទ្ធិ អ្នកនាំពាក្យសាលាខេត្តបាត់ដំបង មិនទាន់មានការឆ្លើយតបយ៉ាងណាទេនៅថ្ងៃនេះ ដោយទូរស័ព្ទចូលជាច្រើនដង តែមិនមានអ្នកទទួល។
សូមរម្លឹកថា ក្រសួងសុខាភិបាលនៅថ្ងៃនេះ បានរកឃើញពលករខ្មែរមកពីថៃជាស្រី្ត ចំនួន១២នាក់ ដែលមានវិជ្ជមានវីរុសកូវីដ១៩ ក្នុងចំណោមនោះមាន ពលករខ្មែរជាស្រី្ត ២នាក់មានទីលំនៅក្នុងខេត្តបាត់ដំបង និង១០នាក់ទៀតនៅខេត្តប៉ៃលិន។ ក្រោយពីលទ្ធផលធ្វើតេស្តវត្ថុសំណាករបស់ពលករទាងនោះ បានផ្តល់ដោយវិទ្យាស្ថានប៉ាស្ទ័រកម្ពុជារាជធានីភ្នំពេញ ហើយបច្ចុប្បន្នអ្នកជំងឺត្រូវបាន ដាក់ឱ្យសម្រាកព្យាបាលនៅមន្ទីរពេទ្យបង្អែកខេត្តបាត់ដំបង និងខេត្តប៉ៃលិន។ សរុបអ្នកឆ្លងជំងឺកូវីដ១៩ មានចំនួន ៣៧៨នាក់ ក្នុងនោះអ្នកព្យាបាលជាសះស្បើយចំនួន ៣៦២នាក់ និងអ្នកកំពុងសម្រាកនៅមន្ទីរពេទ្យចំនួន ១៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ