អាជ្ញាធរថៃរកឃើញពលរដ្ឋខ្មែរឆ្លងជំងឺកូវីដ១៩ ជាង១០០នាក់
អាជ្ញាធរថៃ បានរកឃើញពលរដ្ឋខ្មែរបានឆ្លងជំងឺកូវីដ១៩ចំនួន១០៨នាក់ គិតត្រឹមថ្ងៃពុធទី០៦ខែមករាម្សិលមិញ។ នេះបើយោងតាមរបាយការណ៍ស្តីពីស្ថានភាពជំងឺកូវីដ១៩ ចេញផ្សាយជាប្រចាំថ្ងៃដោយក្រសួងសុខាភិបាលថៃ។ តែយ៉ាងណាមិញពលរដ្ឋខ្មែរទាំង១០៨នាក់នោះ នៅមិនទាន់មានការបញ្ជាក់អត្តសញ្ញាណថាជាពលករខ្មែរទាំងអស់ ឬជាអ្នកណាផ្សេងទៀត ពីរដ្ឋាភិបាលកម្ពុជានៅឡើយទេ។ ប៉ុន្តែអ្នកនាំពាក្យក្រសួងការបរទេសកម្ពុជា ថា ស្ថានទូតកម្ពុជានិងអាជ្ញាធរថៃ កំពុងធ្វើការលើបញ្ហានេះ។
ចុះផ្សាយនៅថ្ងៃ៖
ស្តាប់ - ០១:៤២
គេហទំព័រចេញផ្សាយរបាយការណ៍ស្តីពីស្ថានភាពជំងឺកូវីដ១៩ DDC របស់ក្រសួងសុខាភិបាលសាធារណៈថៃ បានបង្ហាញឲ្យដឹងថា មានពលរដ្ឋខ្មែរចំនួន១០៨នាក់ ត្រូវបានរកឃើញវិជ្ជមានជំងឺកូវីដ១៩ គិតត្រឹមការធ្វើបច្ចុប្បន្នភាពចុងក្រោយនៅយប់ថៃ្ងទី០៦មករា ម្សិលមិញ។
ក្រៅតែពីការឃើញរកវិជ្ជមានជំងឺកូវីដ១៩ទៅលើពលរដ្ឋខ្មែរដែលស្នាក់នៅប្រទេសថៃចំនួន១០៨នាក់នោះ មានប្រជាជនថៃចំនួន៥៤៤៧នាក់ ភូមា៦២៣នាក់ ឥណ្ឌា៨២នាក់ និងជនជាតិផ្សេងៗទៀតជាង១០០០នាក់ ក៏ត្រូវបានរកឃើញថាមានវិជ្ជមានជំងឺកូវីដ១៩ដែរ។ នេះបើតាមរបាយការណ៍របស់ DDC។
នៅចំពោះមុខបញ្ហានេះ លោក កុយ គួង អ្នកនាំពាក្យក្រសួងការបរទេសកម្ពុជា បានប្រាប់វិទ្យុបារាំងអន្តរជាតិ RFI នៅល្ងាចនេះ ថា ស្ថានទូតកម្ពុជាប្រចាំប្រទេសថៃកំពុងធ្វើការផ្ទៀងផ្ទាត់ករណីនេះជាមួយអាជ្ញាធរថៃ ហើយស្ថានទូតកំពុងតាមដាននិងយកចិត្តទុកដាក់បំផុតដល់ពលរដ្ឋខ្មែរ ក៏ដូចជាពលករខ្មែរទាំងអស់ដែលកំពុងស្ថិតនៅក្នុងប្រទេសថៃបច្ចុប្បន្ន។ ប្រសិនបើមានបញ្ហានេះមែន ពលករខ្មែរ ព្រមទាំងពលករបរទេសទាំងអស់នឹងទទួលបានការព្យាបាលដោយគ្មានការគិតថ្លៃដូចប្រជាជនថៃផងដែរ។ នេះជាការបញ្ជាក់របស់លោក កុយ គួង។
គិតមកទល់ថ្ងៃនេះ ករណីវិជ្ជមានជំងឺកូវី១៩នៅប្រទេសថៃ មានការកើនឡើងរហូតដល់ ៩៣៣១នាក់។ ការកើនឡើងនេះមានសន្ទុះខ្លាំងបន្ទាប់ពីករណីរកឃើញមានអ្នកវិជ្ជមានជំងឺកូវីដ១៩លើស្រ្តីម្នាក់នៅឯផ្សារបង្គារ ម៉ាហាឆៃ ខេត្តសាមុតសាខន កាលពីថ្ងៃទី១៧ធ្នូ ដែលអាជ្ញាធរថៃបានកំណត់ចង្អុលខ្ពស់ទៅលើពលករចំណាកស្រុកទៅធ្វើការនៅប្រទេសខ្លួន។
ក្រោយពីការផ្ទុះជាលក្ខណៈសហគមន៍នេះ មានពលករខ្មែរជាង៥០០០នាក់បានចូលមកកាន់ប្រទេសកម្ពុជាវិញ។ ហើយជាមួយគ្នានេះកម្ពុជាចាប់ផ្តើមរកឃើញពលករវិជ្ជមានកូវីដ១៩ ២ករណីនៅថ្ងៃទី៣១ធ្នូកន្លង និងមកដល់ថ្ងៃទី៧មករា ក្រសួងសុខាភិបាលកម្ពុជាមានរកឃើញពលករខ្មែរដែលត្រលប់មកពីថៃវិញ មានវិជ្ជមានកូវីដ១៩សរុបចំនួន២០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ