លោក អ៊ួច ឡេង និងសកម្មជនបរិស្ថាន៤នាក់ទៀតត្រូវបានដោះលែងវិញហើយនៅថ្ងៃនេះ
នៅទីបំផុត លោក អ៊ួច ឡេង និងសកម្មជនបរិស្ថានចំនួន៤នាក់ទៀត ត្រូវបានដោះលែងវិញហើយនៅព្រឹកថ្ងៃចន្ទនេះ បន្ទាប់ពីបានឃាត់ខ្លួនអស់រយៈពេល៧២ម៉ោង។ ការដោះលែងនេះគឺក្រោយពីតុលការបានធ្វើការសាកសួរ និងឲ្យពួកគេធ្វើកិច្ចសន្យាដូចកាលពីឆ្នាំមុនដែរ ពោលតម្រូវឲ្យលោក អ៊ួច ឡេង ត្រូវទៅចុះបញ្ជីអង្គការរបស់ខ្លួននៅក្រសួងមានសមត្ថកិច្ចជាមុនសិន មុននឹងធ្វើសកម្មភាព ហើយការចុះធ្វើសកម្មភាព គឺត្រូវមានការសហការពីមន្ត្រីបរិស្ថាន។
ចុះផ្សាយនៅថ្ងៃ៖
ស្តាប់ - ០២:០៨
អ្នកនាំពាក្យសមាគមការពារសិទ្ធិមនុស្សអាដហុក លោក សឹង សែនករុណា ដែលបានតាមដានយ៉ាងដិតដល់ករណីឃាត់ខ្លួន សកម្មជនបរិស្ថានទាំង៥នាក់នេះ ប្រាប់វិទ្យុបារាំងអន្តរជាតិRFIថា តំណាងអយ្យការមិនបានចោទប្រកាន់អ្នកទាំងនោះក្នុងបទល្មើសណាមួយទេ ពោលអនុញ្ញាតឲ្យពួកគេមានសេរីភាពពេញលេញ។ ប៉ុន្តែលោកថា សកម្មជនបរិស្ថាន រួមទាំង លោក អ៊ួច ឡេង គឺត្រូវបានតុលាការតម្រូវឲ្យចុះកិច្ចសន្យាជាមួយមន្ត្រីបរិស្ថាន និងតំណាងអយ្យការ ដោយត្រូវសហការគ្នា និងហាមមិនឲ្យចូលទៅតំបន់អភិរក្សដោយគ្មានការអនុញ្ញាត ហើយមិនត្រូវយកសម្ភារៈទៅថតរូបភាពនៅតំបន់ការពារ និងត្រូវទៅចុះបញ្ជីអង្គការជាមុនសិនមុននឹងធ្វើសកម្មភាព។
បើតាមមន្ត្រីសិទ្ធិមនុស្សរូបនេះ ការឃាត់ខ្លួនសកម្មជនទាំងនោះ អស់រយៈពេល៧២ម៉ោងជាលើកទី២នេះ គឺធ្វើឲ្យបាក់ទឹកចិត្តដល់យុវជនផ្សេងទៀត ដែលពួកគេស្រឡាញ់បរិស្ថាន ហើយធ្វើការល្បាតព្រៃដោយស្ម័គ្រចិត្តតែបែរជារងការស្តីបន្ទោសទៅវិញ។
យ៉ាងណាក៏ដោយ លោក នេត្រ ភក្ត្រា អ្នកនាំពាក្យក្រសួងបរិស្ថាន បានថ្លែងថា ការសម្រេចដោះលែងសកម្មជនទាំង៥នាក់នោះ គឺជាឆន្ទានុសិទ្ធិរបស់តុលាការ។
ប៉ុន្តែតាមរយៈសេចក្តីប្រកាសព័ត៌មានរបស់ខ្លួននៅថ្ងៃទី៧កុម្ភៈអ្នកនាំពាក្យក្រសួងបរិស្ថានបានហៅសកម្មជនបរិស្ថាន៥នាក់នោះថាក្រុមជនល្មើស និងថាបានធ្វើសកម្មភាពផ្សេងៗក្នុងតំបន់ការពារធម្មជាតិដោយគ្មានច្បាប់អនុញ្ញាតដើម្បីផលិតរូបភាពផ្សេងៗ និងធ្វើរបាយការណ៍ បង្ខូចកេរ្តិ៍ឈ្មោះកម្ពុជាដើម្បីស្វះស្វែងរកជំនួយដើម្បីក្រុមបក្ខពួកខ្លួន។
សូមបញ្ជាក់ថា ក្នុងរយៈពេលមិនដល់១ឆ្នាំផង លោក អ៊ូច ឡេង ប្រធានអង្គការកិច្ចការពិសេសសិទ្ធិមនុស្សកម្ពុជា និង ប្រជាសហគមន៍ព្រៃឡង់ ត្រូវបានឃាត់ខ្លួនជាលើកទី២។ កាលពីថ្ងៃទី១៣ ខែមីនា២០២០ លោក អ៊ូច ឡេង និងសកម្មជន៣នាក់ទៀតក៏ត្រូវបានសន្តិសុខក្រុមហ៊ុនស៊ីងបាយអូថេកឃាត់ខ្លួននៅគ្រាដែលពួកគេចុះស៊ើបអង្កេតអាជីវកម្មឈើក្នុងតំបន់ព្រៃឡង់ រួចបញ្ជួនទៅកាន់តុលាការនៅថ្ងៃទី១៥ខែមីនា។ មួយថ្ងៃក្រោយមក ពួកគេត្រូវបានដោះលែងវិញ ដោយធ្វើកិច្ចសន្យា តម្រូវឱ្យលោក អ៊ូច ឡេង ទៅចុះបញ្ជីអង្គការនៅក្រសួងជាមុនសិន មុននឹងធ្វើសកម្មភាពបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ