អាជ្ញាធរខេត្តជាប់ព្រំដែនអះអាងពីការរឹតបន្តឹងការចេញចូល ក្រោយពីមានបទបញ្ជាថ្មីរបស់ប្រមុខរដ្ឋាភិបាល
អាជ្ញាធរខេត្តជាប់ព្រំដែនខ្មែរ-ថៃ និងវៀតណាម អះអាងថាកំពុងបន្តវិធានការយ៉ាងតឹងរឹង និងម៉ឹងម៉ាត់ ក្នុងការទប់ស្កាត់ការឆ្លងរាលដាលជំងឺកូវីដ១៩ បន្ទាប់ពីមានការចេញបញ្ជាភ្លាមៗ របស់ប្រមុខរដ្ឋាភិបាលកម្ពុជាលោក ហ៊ុន សែន នៅថ្ងៃចន្ទ នេះ។ ជាបទបញ្ជាថ្មីតាមរយៈសារជាសំឡេង ក្រោយពីរកឃើញថា ពលករខ្មែរមួយចំនួនដែលធ្វើដំណើរមកពីប្រទេសថៃ នៅតែមានចំនួនច្រើន ហើយអ្នកខ្លះបានគេចវេសពីការធ្វើចត្តាឡីស័ក។
ចុះផ្សាយនៅថ្ងៃ៖
ស្តាប់ - ០២:៤១
ឆ្លើយតបនឹងការចេញបទបញ្ជាក្តៅ របស់ប្រមុខរដ្ឋាភិបាលនេះ លោក លី សារី អ្នកនាំពាក្យសាលាខេត្តបន្ទាយមានជ័យ បានថ្លែងប្រាប់វិទ្យុបារាំងអន្តរជាតិ RFI ថា ហានិភ័យនៃការឆ្លងជំងឺកូវីដ១៩ ដែលមានការឆ្លងចេញពីខេត្តជាប់ព្រំដែនខ្មែរ-ថៃច្រើនជាងព្រំដែនខ្មែ-រវៀតណាមនោះ គឺដោយសារនៅពេលដែលប្រជាពលរដ្ឋមកដល់ភ្លាម ត្រូវបញ្ចូនបន្តទៅតាមខេត្តគោលដៅរៀងៗខ្លួន ដោយមិនបានឱ្យប្រជាពលរដ្ឋទាំងនោះ ធ្វើចត្តាឡីស័កនៅតាមច្រកព្រំដែន ដែលពួកគេមកដល់ភ្លាមៗនោះទេ។ មួយវិញទៀត មានប្រជាពលរដ្ឋមួយចំនួនព្យាយាមគេចវេស មិនព្រមធ្វើចត្តាឡីស័ក តាមការកំណត់ដែល ចំនុចនេះជាការលំបាកមួយ របស់ខេត្តជាប់ព្រំដែនដែរ ព្រោះមណ្ឌលចត្តាឡីស័ក មិនមានរបងគត់មត់នោះទេ បើទោះជាក្រុមត្រួតពិនិត្យប្រចាំការ២៤ម៉ោងក៏ដោយ។
ជាការគូសបញ្ជាក់បន្ថែមរបស់អ្នកនាំពាក្យខេត្តបន្ទាយមានជ័យថា ក្រោយការចេញនូវវិធានការនេះ ខេត្តមានការកោះប្រជុំជាមួយក្រសួងសុខាភិបាលភ្លាម ដើម្បីដោះស្រាយលើចំនុចចន្លោះប្រហោងទាំងនោះ។ ហើយក៏មានដែរ វិធានការអប់រំផ្សព្វផ្សាយ ដើម្បីឱ្យប្រជាពលរដ្ឋយល់ និងព្រមសហការ ធ្វើចត្តាឡីស័កឱ្យបានត្រឹមត្រូវតាមគោលការណ៍ណែនាំរបស់ក្រសួងសុខាភិបាល។
សូមបញ្ជាក់ថា ខេត្តបន្ទាយមានជ័យ មានអ្នកធ្វើចត្តាឡីស័កចំនួនជាង ៤ពាន់នាក់ហើយ ក្នុងនោះបានរកឃើញអ្នកជំងឺកូវីដ១៩ប្រមាណជាង២០នាក់ ដែលជាពលករឆ្លងដែនមកពីប្រទេសថៃ។ នេះបើតាម លោកលី សារី។
ជុំវិញវិធានការរឹតបន្តឹងនេះដែរ លោកលី សាវ៉េត អភិបាលរងខេត្តតាកែវវិញ បានថ្លែងថា ការដាក់ឱ្យអ្នកធ្វើដំណើរត្រឡប់មកពីប្រទេសថៃ វៀតណាមធ្វើចត្តាឡីស័ក គឺជាវិធានការចាំបាច់បំផុត។ ក្រៅពីនោះអាជ្ញាធរ បានចុះសាកសួរព័ត៌មានជាប្រចាំ ចំពោះគ្រួសារណា ដែលមានសមាជិកត្រឡប់មកពីប្រទេសជិតខាង ប្រសិនជាមានការសង្ស័យណាមួយ ត្រូវតម្រូវឱ្យធ្វើចត្តាឡីស័ក នៅមណ្ឌលចត្តាឡីស័កក្នុងខេត្តភ្លាម។
គិតត្រឹមថ្ងៃទី១៤ ខែកុម្ភៈម្សិលម៉ិញ ខេត្តតាកែវមានចំនួនអ្នកធ្វើចត្តាឡីស័កចំនួន ៧៧នាក់ហើយ ក្នុងនោះមានអ្នកធ្វើដំណើរមកពីប្រទេសថៃចំនួន ២៤នាក់ និងអ្នកធ្វើដំណើរមកពីប្រទេសវៀតណាមចំនួន ៥៣នាក់ ដោយមិនមានរកឃើញអ្នកឆ្លងកូវីដ១៩នោះទេ។
សូមរម្លឹកជូនថា ការចេញបទបញ្ជាក្តៅ របស់ប្រមុខរដ្ឋាភិបាលលោក ហ៊ុន សែន នៅពេលនេះទៀត ក៏ព្រោះតែមានពលករខ្មែរម្នាក់ បានជាន់មីនរងរបួសដាច់ជើង ដោយសារតែការលួចឆ្លងដែនពីប្រទេសថៃចូលមកកម្ពុជា និងគេចពីការធ្វើចត្តាឡីស័ក កាលពីយប់ថ្ងៃអាទិត្យទី១៤កុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ