កូវីដ១៩៖ ចាប់តាំងពីចុងឆ្នាំ២០២០ រដ្ឋចំណាយប្រាក់ជិត៣ពាន់លានរៀលលើការធ្វើចត្តាឡីស័កនៅខេត្តជាប់ព្រំដែន
រាប់ចាប់តាំងពីការផ្ទុះឡើងជំងឺកូវីដ១៩ នៅខេត្តជាប់ព្រំដែនកម្ពុជា ថៃ និងព្រំដែនកម្ពុជាវៀតណាមចុងឆ្នាំ២០២០ រហូតដល់ពាក់កណ្តាលខែកុម្ភៈនេះ រដ្ឋាភិបាលកម្ពុជាបានចំណាយថវិកាជាតិជិត ៣ពាន់លានរៀល សម្រាប់ផ្គត់ផ្គង់និងជួយសម្រួលដល់ការចំណាយសម្រាប់ការធ្វើចត្តាឡីស័កនៅខេត្តជាប់ព្រំដែនទាំងនោះ។ ថវិកាជិត ៣ពាន់លានរៀលនេះ គឺជាកព្ចាប់ថវិកាជាតិដោយមិនរាប់បញ្ចូលថវិកាពីសប្បុរសជនឡើយ។
ចុះផ្សាយនៅថ្ងៃ៖
ស្តាប់ - ០២:៣៧
ថវិកាជិត៣ពាន់លានរៀល ត្រូវបានរដ្ឋាភិបាលកម្ពុជាទម្លាក់ជាបន្តបន្ទាប់ និងចែកចេញជាបួនដំណាក់កាល សម្រាប់ខេត្តជាប់ព្រំដែនខ្មែរ-ថៃ ចំនួន៧ រួមមាន៖ ខេត្តបាត់ដំបង បន្ទាយមានជ័យ ប៉ៃលិន ព្រះវិហារ ឧត្តរមានជ័យ ពោធិ៍សាត់ និងខេត្តនិងកោះកុង។ ក្នុងចំណោមនោះ ខេត្តដែលមានបន្ទុកទទួលពលករត្រឡប់មកពីប្រទេសថៃជាគំហុកមានខេត្តបាត់ដំបង ប៉ៃលិន បន្ទាយមានជ័យ និងខេត្តឧត្តរមានជ័យ។ ក្នុងចំណោមនោះ ខេត្តដែលទទួលបានថវិកាច្រើនជាងគេ ចំនួនជាង៦០០លានរៀល គឺខេត្តប៉ៃលិន បន្ទាប់មកទៀតគឺខេត្តឧត្តរមានជ័យទទួលបានថវិកាជិត៦០០លានរៀល។ ចំណែកខេត្ត២ទៀត ដែលមាន ខេត្តបាត់ដំបង និងបន្ទាយមានជ័យ ទទួលបានថវិកាចំនួនជាង៤០០លានរៀល រួមនឹងសម្ភារៈគ្រឿងឧបភោគបរិភោគ មានទឹកសុទ្ធនិងមីកញ្ចប់ជាច្រើនពាន់កេសផងដែរ។
ជាមួយគ្នានេះ ថវិកាចំនួន១៧០លានរៀល និងសម្ភារៈចំនួន៨០០កញ្ចប់ ត្រូវបានផ្តល់ទៅខេត្តចំនួន៦ទៀត ដែលជាប់ព្រំដែនកម្ពុជា វៀតណាម ក្នុងនោះខេត្តស្វាយរៀងទទួលបានថវិកាច្រើនជាងគេចំនួន៥០លានរៀល និងសម្ភារៈចំនួន៣០០កញ្ចប់។ បន្ទាប់មក ខេត្តតាកែវ និងព្រៃវែង ទទួលបានថវិកា៣០លានរៀល និងសម្ភារចំនួន១០០កញ្ចប់ ក្នុងពេលដែលខេត្តចំនួនបីទៀតមាន ខេត្តកណ្តាល ត្បូងឃ្មុំ និងខេត្តរតនគិរី ទទួលបានថវិកាចំនួន២០លានរៀល និងសម្ភារៈចំនួន១០០កញ្ចប់។
បន្ថែមពីលើការទម្លាក់កញ្ចប់ថវិកា លោកហ៊ុន សែន ក៏បានណែនាំទៅដល់ក្រសួងសុខាភិបាល ត្រូវផ្គត់ផ្គង់ទៅបណ្តាខេត្តនៅជាប់ព្រំដែនខ្មែរ-ថៃ និងព្រំដែនខ្មែរ-វៀតណាម។ នៅព្រំដែនថៃ បើតាមលោក ហ៊ុន សែន ធ្លាប់អះអាងនាពេលកន្លងមកថា ការគ្រប់គ្រងចលនាចេញចូលនៅទីនោះមិនទាន់បានល្អ ដូចការគ្រប់គ្រងនៅព្រំដែនខ្មែរ-វៀតណាមនៅឡើយទេ។
ជាមួយគ្នានេះ ខេត្តជាប់ព្រំដែនខ្មែរ-ថៃ ត្រូវពិនិត្យមើលចំនុចខ្វះខាតឡើងវិញ និងលើកសំណើមកក្រសួងសុខាភិបាល ដើម្បីជួយរៀបចំធ្វើចត្តាឡីស័កឱ្យបានគ្រប់ចំនួន១៤ថ្ងៃត្រឹមត្រូវ និងអនុវត្តវិធានការក្តៅដោយផាកពិន័យលើជនណាដែលមិនព្រមធ្វើចត្តាឡីស័ក។
សូមរម្លឹកជូនថា ការបទបញ្ជាក្តៅរបស់ប្រមុខរដ្ឋាភិបាលលោក ហ៊ុន សែន នៅពេលនេះ ដាក់ចេញព្រោះតែមានពលករខ្មែរម្នាក់បានជាន់មីនរងរបួសដាច់ជើង ដោយសារតែការលួចឆ្លងដែនពីប្រទេសថៃចូលមកកម្ពុជា និងគេចពីការធ្វើចត្តាឡីស័ក កាលពីយប់ថ្ងៃអាទិត្យទី១៤កុម្ភៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ