រដ្ឋសភាជាតិយល់ព្រមឱ្យរដ្ឋាភិបាលកម្ពុជាប្រើច្បាប់ដាក់ពន្ធនាគារលើអ្នកដែលបំពានវិធានការពារកូវីដ១៩
រដ្ឋសភាជាតិនៅព្រឹកថ្ងៃសុក្រនេះក្រោមវត្តមានលោកហេង សំរិន ដែលជាប្រធានបានសម្រេចអនុម័តសេចក្តីព្រាងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត។ ក្រោយអនុម័តរួចភ្លាម រដ្ឋសភាក៏បានបញ្ជូនសេចក្តីព្រាងច្បាប់ថ្មីនេះទៅព្រឹទ្ធសភា ដើម្បីត្រួតពិនិត្យបន្ត។ ជាច្បាប់បន្ទាន់ សេចក្តីព្រាងច្បាប់នេះមិនត្រូវបានបញ្ជូនទៅកាន់ក្រុមប្រឹក្សាធម្មនុញ្ញទេ ពោល គឺត្រឹមតែព្រឹទ្ធសភា និងបញ្ជូនត្រឡប់មករដ្ឋសភាវិញ ហើយរដ្ឋសភានឹងបញ្ជូនទៅរដ្ឋាភិបាល ដើម្បីស្នើសុំព្រះមហាក្សត្រឡាយព្រះហស្តលេខាប្រកាសឱ្យប្រើប្រាស់ជាផ្លូវការ។
ចុះផ្សាយនៅថ្ងៃ៖
ស្តាប់ - ០២:៤១
សេចក្តីព្រាងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតនេះ ត្រូវបានរដ្ឋសភាកម្ពុជាអះអាងថា នឹងក្លាយជាយន្តការមួយដ៏សំខាន់ក្នុងការកំណត់ពីវិធានការសុខាភិបាល វិធានការរដ្ឋបាល និង វិធានការផ្សេងទៀតដែលត្រូវអនុវត្ត ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺឆ្លងកាចសាហាវផ្សេងៗទៀតក្នុងពេលបច្ចុប្បន្ន និងអនាគត។ សម្រាប់រដ្ឋសភាជាតិ ច្បាប់ថ្មីនេះ គឺសំដៅការពារអាយុជីវិតពលរដ្ឋ លើកកម្ពស់សុខភាពសាធារណៈ និងសណ្តាប់ធ្នាប់សាធារណៈ ព្រមទាំងកាត់បន្ថយឲ្យបានជាអតិបរមានូវផលប៉ះពាល់នៃការឆ្លងជំងឺកូវីដ១៩ ចំពោះវិស័យសង្គម និងសេដ្ឋកិច្ចនៅក្នុងប្រទេសកម្ពុជា។
សេចក្តីព្រាងច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀតមាន៦ជំពូក និង១៨មាត្រា។ មួយផ្នែកនៃច្បាប់ថ្មីនេះ បានបើកផ្លូវឱ្យរដ្ឋាភិបាលកម្ពុជាអាចចាត់វិធានការបន្ទាន់ដូចជា ហាមឃាត់ការធ្វើដំណើរ ហាមឃាត់ការជួបជុំ ហាមឃាត់ការធ្វើពាណិជ្ជកម្ម និង ហាមឃាត់សកម្មភាពការងារនៅកន្លែងណាមួយ។ មិនតែប៉ុណ្ណោះ តាមអានុភាពច្បាប់នេះ គឺរដ្ឋាភិបាលកម្ពុជាអាចបិទតំបន់ណាមួយដែលមានការឆ្លងរាលដាលខ្លាំងនៃជំងឺកូវីដ១៩។
ចំពោះការដាក់ពិន័យ និងដាក់ទោសទណ្ឌវិញ គឺច្បាប់ថ្មីនេះតម្រូវឱ្យដែលអ្នកគេចវេះពីការធ្វើចត្តាឡីស័ក និងអ្នកដែលលួចរត់ចេញពីកន្លែងធ្វើចត្តាឡីស័ក ត្រូវពិន័យពី១លានរៀល ដល់៥លានរៀល។ ប៉ុន្តែ ក្នុងករណីជនល្មើសនាំជំងឺកូវីដ១៩ទៅចម្លងដល់អ្នកដទៃ គឺត្រូវពិន័យពី២លានរៀល ដល់១០លានរៀល និងត្រូវជាប់ពន្ធនាគារពី៦ខែ ទៅ៣ឆ្នាំ។ចំណែក អ្នកគេចវេះពីការព្យាបាល ឬលួចរត់ចេញពីកន្លែងព្យាបាល គឺត្រូវពិន័យពី៥លានរៀល ដល់២០លានរៀល និងប្រឈមជាប់ពន្ធនាគារពី១ឆ្នាំ ដល់៥ឆ្នាំថែមទៀត។ ក្នុងករណីនាំជំងឺនេះទៅឆ្លងដល់អ្នកដទៃ គឺជនល្មើសនឹងត្រូវរងទោសទណ្ឌជាប់ពន្ធនាគារពី៥ឆ្នាំ ដល់១០ឆ្នាំឯណោះ។ ដោយឡែក អ្នកដែលមានចេតនាចម្លងដល់អ្នកដទៃ គឺត្រូវដាក់ពន្ធនាគារពី៥ឆ្នាំ ទៅ១០ឆ្នាំ។
កាលពីថ្ងៃព្រហស្បតិ៍ លោកនាយករដ្ឋមន្រ្តីហ៊ុន សែន បានគូសបញ្ជាក់ច្បាស់ៗថា ការបង្កើតឱ្យមានច្បាប់នេះ គឺដើម្បីអាចអនុវត្តដាក់ទោសទណ្ឌបានទៅលើអ្នកដែលបំពានបម្រាមកូវីដ១៩។ លោកនាយករដ្ឋមន្រ្តីក៏បានអះអាងដែរថា ចំពោះមន្រ្តី និងអាជ្ញាធរមានសមត្ថកិច្ចដែលបំពានវិធានការពារកូវីឌ១៩ គឺលោកនឹងអនុវត្តវិធានការរដ្ឋបាលដោយបកស័ក្តិ និងដកដំណែង មុននឹងបញ្ជូនទៅតុលាការ ដើម្បីកាត់ទោសទៅតាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ