ក្រសួងកិច្ចការនារី៖ ស្ត្រីរងផលប៉ះពាល់ដោយសារជំងឺកូវីដ១៩ធ្ងន់ធ្ងរជាងបុរស
ការអបអរសាទរខួបលើកទី១១០ ទិវាអន្តរជាតិសិទ្ធិនារី ៨មីនា ឆ្នាំ២០២១ នេះ នៅកម្ពុជា ប្រារព្ធឡើងក្រោមប្រធានបទ «ស្រ្តីនិងការអភិវឌ្ឍ ក្នុងបរិការណ៍កូវីដ-១៩»។ ការកំណត់យកប្រធានបទនេះ ត្រូវបានក្រសួងកិច្ចនារីពន្យល់ថា មកពីស្ត្រីរងផលប៉ះពាល់ធ្ងន់ធ្ងរជាងបុរសដោយសារតែជំងឺកូវីដ១៩។
ចុះផ្សាយនៅថ្ងៃ៖
ស្តាប់ - ០២:២០
ការសិក្សាជាច្រើនបង្ហាញថា ស្ត្រី និងក្មេងស្រី ទទួលរងផលប៉ះពាល់ខ្លាំងជាងបុរស និងក្មេងប្រុស ទាំងផ្នែកសេដ្ឋកិច្ច អំពើហិង្សាផ្នែកយែនឌ័រ ការអប់រំ ការទទួលបានសេវាថែទាំសុខភាព ហើយក្នុងនោះស្ត្រីជាមុខសញ្ញាចម្បង ដែលអាចទទួលផលប៉ះពាល់មុនគេ ជាពិសេសស្ត្រីជាបុគ្គលិកសុខាភិបាល។ នេះជាការលើកឡើងរបស់ក្រសួងកិច្ចការនារី នៅក្នុងការអបអរសាទរខួបលើកទី១១០ ទិវាអន្តរជាតិនារី ៨មីនា ឆ្នាំ២០២១។
ប្រសិនបើការអនុវត្តវិធានការបង្ខាំងនៅតែបន្តអូសបន្លាយរយៈពេល៦ខែទៀត ហើយការផ្តល់សេវាសុខាភិបាល មិនបានពេញលេញដោយសារតែកូវីដ១៩ នោះស្ត្រីជាង៤៧លាននាក់ក្នុងបណ្តាប្រទេសដែលមានចំណូលទាប និងមធ្យម នឹងមិនអាចទទួលបានសេវាពន្យាកំណើតបែបទំនើបឡើយ។ ជាលទ្ធផលស្ត្រី៧លាននាក់ នឹងមានផ្ទៃពោះមិនតាមប្រាថ្នា ហើយអំពើហិង្សាផ្នែកយែនឌ័រ នឹងកើតមាន១លានករណី បន្ថែមទៀត។ នេះបើតាមការស្រាវជ្រាវរបស់អង្គការមូលនិធិការសហប្រជាជាតិ ដើម្បីប្រជាជននៅឆ្នាំ២០២០។
វិបត្តិកូវីដ១៩នេះ នឹងរុញច្រានមនុស្សប្រមាណ៩៦លាននាក់លើពិភពលោក ឲ្យរអិលធ្លាក់ចូលភាពក្រីក្រនៅឆ្នាំ២០២១នេះ ក្នុងនោះ៤៧លាននាក់គឺជាស្ត្ រីនិងក្មេងស្រី។ ការណ៍នេះបានរុញច្រានឲ្យស្ត្រី និងក្មេងស្រី រស់ក្រោមចំណូលតែ ១,៩ដុល្លារ ក្នុង១ថ្ងៃ នឹងកើនឡើងដល់៤៣៥ លាននាក់ លើពិភពលោក។ នេះបើតាមការស្រាវជ្រាវដដែល។
ដូច្នេះបន្ទុកលើស្ត្រី ក្នុងការងារថែទាំមិនមានប្រាក់កម្រៃកើនឡើង ដោយសារតែការបិទសាលារៀន និងការកើនឡើងតម្រូវការរបស់មនុស្សវ័យចាស់។ ផលវិបាកនៃជំងឺកូវីដ១៩នេះ នឹងបង្កឲ្យមានវិសមភាពកាន់តែខ្លាំង និងរារាំងដល់កិច្ចខិតខំប្រឹងប្រែងក្នុងការសម្រេចគោលដៅអភិវឌ្ឍន៍ប្រកបដោយចីរភាព ក្រោមពាក្យថា «មិនទុកនរណាម្នាក់ឲ្យនៅឯកោ»។
ទោះជាបែបនេះក្តី ក្រសួងកិច្ចនារី បានគូសបញ្ជាក់ថា រដ្ឋាភិបាលកម្ពុជា បានដាក់ចេញវិធានការឆ្លើយតបដល់អ្នកដែលរងផលប៉ះពាល់ដោយសារតែកូវីដ១៩នេះ តាមរយៈគោលនយោបាយជាតិគាំពារសង្គម ការឧបត្ថម្ភប្រាក់សម្រាប់បុគ្គលិកវិស័យទេសចរណ៍ និងកាត់ដេរ ព្រមទាំងការរៀបចំហិរញ្ញប្បទាន ជួយស្តារលទ្ធភាព និងលើកកម្ពស់អាជីវកម្មសហគ្រាសធុនតូច និងមធ្យម ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ