របាយការណ៍៖ ស្រ្តីនិងយុវជនមានចំនួនតិចតួចនៅក្នុងវិស័យសាធារណៈនិងតួនាទីដឹកនាំនៅកម្ពុជា
ស្រ្តីនិងយុវជនកម្ពុជាតិចតួចដែលបានចូលរួមក្នុងវិស័យសាធារណៈ និងតួនាទីដឹកនាំនៅថ្នាក់មូលដ្ឋាន និងថ្នាក់ជាតិ។ នេះបើតាមរបាយការណ៍របស់អង្គការតម្លាភាពកម្ពុជា ចេញផ្សាយនៅថ្ងៃសុក្រទី១៩មីនា ក្រោមចំណងជើងថា «ភាពជាអ្នកដឹកនាំរបស់ស្ដ្រីនិងយុវជននៅក្នុងប្រទេសកម្ពុជា»។ មូលហេតុដែលស្រ្តីនិងយុវជននៅមានចំនួនតិចតួចក្នុងវិស័យសាធារណៈ គឺដោយសារវិសមភាពយេនឌ័រ និងភាពគ្មានទំនុកចិត្តលើសមត្ថភាពយុវជន។
ចុះផ្សាយនៅថ្ងៃ៖
អង្គការតម្លាភាពកម្ពុជា នៅថ្ងៃសុក្រទី១៩មីនា បានបង្ហាញនូវរបាយការណ៍ស្រាវជ្រាវមួយពីស្ថានភាពបច្ចុប្បន្ន និងបញ្ហាប្រឈមរបស់ស្រ្តី និងយុវជន ក្នុងការចូលរួមវិស័យសាធារណៈ និងតួនាទីសម្រេចចិត្តរបស់ពួកគេ។ របាយការណ៍កម្រាស់១៥ទំព័រ បានបញ្ជាក់ថា ស្រ្តីនិងយុវជនជាង៦០០នាក់ ដែលបានផ្តល់បទសម្ភាស សុទ្ធសឹងតែជួបបញ្ហាប្រឈមច្រើនចំណុច ដែលបង្អាក់ពួកគេមិនអាចចូលរួមក្នុងវិស័យសាធារណៈបាន។
បើតាមរបាយការណ៍ដដែល ស្ដ្រីត្រូវបានរើសអើងដោយសមភាពយេនឌ័រក្នុងសង្គម ដោយអំណាចនិងការគ្រប់គ្រងមួយចំនួនធំ ដែលមានបុរសជាអ្នកគ្រប់គ្រង។ បន្ថែមពីនេះ ការដាក់បន្ទុកឲ្យធ្វើការងារផ្ទះ ការទទួលបានការអប់រំទាប កង្វះឱកាសចូលរួមផ្នែកនយោបាយ កង្វះហិរញ្ញវត្ថុ ឧបសគ្គស្ថាប័ន បញ្ហាសុខភាព ជាកត្តាដែលធ្វើឲ្យស្រ្តីមានចំនួនតិចតួចបានចូលរួមក្នុងវិស័យសាធារណៈ និងតួនាទីជាអ្នកសម្រេចចិត្តនៅក្នុងសង្គម។
ចំណែកឯឧបសគ្គសម្រាប់យុវជន របាយការណ៍ស្រាវជ្រាវបានបង្ហាញឲ្យដឹងថា ទំនុកចិត្តលើសមត្ថភាពយុវជននៅតែជាឧបសគ្គចម្បងសម្រាប់ពួកគេ។ ដោយផ្អែកលើប្រវត្តិសាស្រ្ត សាធារណជនទូទៅនៅតែមានចម្ងល់សង្ស័យពីសមត្ថភាពក្នុងការដឹកនាំរបស់យុវជន។ អ្វីដែលជាកត្តាប្រឈមផ្សេងទៀតសម្រាប់យុវជនក្នុងសង្គមនោះរួមមាន៖ ការរារាំងពីឪពុកម្តាយដោយខ្លាចកូនពួកគេមានបញ្ហាពេលចូលរួមកិច្ចការសង្គមឬនយោបាយ ការរើសអើងអាយុ ការចូលរួមក្នុងវិស័យនយោបាយនៅមានកម្រិត ការធ្វើចំណាកស្រុកដើម្បីស្វែងរកការងារ បញ្ហាបក្ខពួកនិយម កង្វះជំនាញទន់ និងសិទ្ធិសេរីភាពក្នុងការបញ្ចេញមតិ។ នេះបើតាមរបាយការណ៍របស់អង្គការតម្លាភាពកម្ពុជា។
អង្គការតម្លាភាពកម្ពុជា បានផ្ដល់អនុសាសន៍សម្រាប់ដោះស្រាយបញ្ហាដែលស្រ្តីនិងយុវជនកំពុងប្រឈមថា ទាំងរដ្ឋាភិបាលនិងសង្គមស៊ីវិល គួរណាចូលរួមលើកកម្ពស់ការឲ្យតម្លៃស្រ្តីដោយមានសមភាពនឹងបុរស និងលើកកម្ពស់សេរីភាពក្នុងការបញ្ចេញមតិដើម្បីឲ្យយុវជនអាចបញ្ចេញទស្សនៈរបស់ពួកគេលើបញ្ហាសង្គមនិងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ