ទិវាព្រៃឈើអន្តរជាតិ៖ បណ្តាញសហគមន៍ព្រៃឡង់ស្នើសុំក្រសួងចូលល្បាតព្រៃឡើងវិញ
នៅក្នុងឱកាសទិវាព្រៃឈើអន្តរជាតិ ២១ មីនា នេះ បណ្តាញសហគមន៍ព្រៃឡង់បានស្នើសុំឲ្យក្រសួងបរិស្ថាន ដកបំរាមហាមឃាត់ ការងារល្បាតព្រៃឡង់របស់បណ្តាញសហគមន៍ព្រៃឡង់ ដើម្បីឲ្យសមាជិករបស់បណ្តាញសហគមន៍ព្រៃឡង់អាចចេញល្បាតឡើងវិញ។ តែអ្នកនាំពាក្យក្រសួងបរិស្ថានបានលើកឡើងថា បណ្តាញសហគមន៍ព្រៃឡង់ត្រូវបំពេញកាតព្វកិច្ចផ្លូវច្បាប់ជាមុនសិន។
ចុះផ្សាយនៅថ្ងៃ៖
ស្តាប់ - ០២:៤០
ចាប់តាំងពីដើមឆ្នាំ២០២០ បណ្តាញសហគមន៍ព្រៃឡង់ ត្រូវបានរារាំងដោយក្រសួងបរិស្ថាន និងអាជ្ញាធរមូលដ្ឋាន ក្រោមហេតុផលសហគមន៍មិនបានចុះបញ្ជីនៅក្រសួងមហាផ្ទៃ ខណៈសកម្មភាពល្មើសច្បាប់នៅក្នុងតំបន់ព្រៃឡង់មានការកើនឡើងយ៉ាងខ្លាំងក្លា ដែលទាមទារឱ្យមានវិធានការរួមទាំងរាជរដ្ឋាភិបាល ក្រសួងពាក់ព័ន្ធ អង្គការដៃគូ និងសហគមន៍មូលដ្ឋានដើម្បីទប់ស្កាត់សកម្មភាពទាំងនោះ។ នេះបើតាមរយៈសេចក្តីថ្លែងការណ៍របស់ សមាជិកបណ្តាញសហគមន៍ព្រៃឡង់ទាំង ៤ខេត្ត នៅក្នុងឱកាស ទិវាព្រៃឈើអន្តរជាតិ ២១ មីនា ឆ្នាំ២០២១។
តាមរយៈសេចក្តីថ្លែងការណ៍របស់ខ្លួន បណ្តាញសហគមន៍ព្រៃឡង់ បានស្នើស្នើសុំឱ្យក្រសួងបរិស្ថាន ដកបំរាមហាមឃាត់ ការងារល្បាតព្រៃរបស់បណ្តាញសហគមន៍ព្រៃឡង់ និង តាមដានត្រួតពិនិត្យ និងដកចេញពីតូនាទីជាមន្រ្តីឧទ្យានុរក្ស ចំពោះមន្ត្រីរូបណាដែលពាក់ព័ន្ធជាមួយបទល្មើស និងអសកម្មក្នុងការបំពេញតួនាទីរបស់ខ្លួន។
ក្រៅពីនេះ ក៏មានចំណុចមួយចំនួនទៀត ដូចជាស្នើសុំឲ្យបញ្ឈប់ការអនុញ្ញាតឱ្យមានការដឹកជញ្ជូនឈើ ម៉ាស៊ីនរណាយន្ត និងសំភារៈផ្សេងទៀតសម្រាប់បម្រើឱ្យការកាប់បំផ្លាញព្រៃឈើកាត់មុខប៉ុស្តិ៍យាមរបស់មន្រ្តីឧទ្យានុរក្សនីមួយៗ។ បណ្តាញសហគមន៍ព្រៃឡង់ បានស្នើសុំឱ្យក្រសួងបរិស្ថាន រៀបចំផែនការយុទ្ឋសាស្រ្តជាក់លាក់ក្នុងការប្រយុទ្ឋប្រឆាំងការកាប់បំផ្លាញព្រៃឈើ និងការកាប់រានដីព្រៃសម្រាប់កសិកម្មថ្មីៗ កាំភ្លើងកែឆ្នៃ ការបរបាញ់ នឹងសំភារៈសម្រាប់បម្រើឱ្យការប្រព្រឹត្តិបទល្មើសផ្សេងៗទៀត និងចំណុចសំខាន់មួយចំនួនទៀត។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានប្រាប់វិទ្យុបារាំងអន្តរជាតិនៅថ្ងៃទី២១ ខែមីនាថា ក្រសួងបរិស្ថានរីករាយនិងស្វាគមន៍ជានិច្ចនូវរាល់ការចូលរួមការពារ និងអភិរក្សធនធានធម្មជាតិ និងជីវៈចម្រុះនានាក្នុងតំបន់ការពារធម្មជាតិសម្រាប់ដៃគូទាំងឡាយណា ដែលបានគោរពរតាមគោលការណ៍ណែនាំនីតិវិធីច្បាប់ និងលិខិតបទដ្ឋានគតិយុត្តត្រឹមត្រូវ។
អ្នកនាំពាក្យក្រសួងបរិស្ថានបន្តថា យោងតាមសេចក្តីជូនដំណឹងរបស់ទីស្តីការគណៈរដ្ឋមន្ត្រីចុះខែសីហា ឆ្នាំ២០២០ បញ្ជាក់ថាបណ្តាញនេះក៏ត្រូវបានតម្រូវឱ្យចុះបញ្ជីត្រឹមត្រូវតាមនីតិវិធីច្បាប់ ដើម្បី មាននីតិសម្បទាគ្រប់គ្រាន់ក្នុងការសហការ និងអនុវត្តសកម្មភាព ការងាររបស់ខ្លួន ជាមួយក្រសួង ស្ថាប័ន មានសមត្ថកិច្ចរបសរាជរដ្ឋាភិបាល។ ដូច្នេះបណ្តាញសហគមន៍ព្រៃឡង់ត្រូវបំពេញកាតព្វកិច្ចផ្លូវច្បាប់ជាមុនសិន។
អ្នកនាំពាក្យរូបនេះ សង្កត់ធ្ងន់ថា បញ្ហាព្រៃឡង់ត្រូវបានសមាគម និងអង្គការក្រៅរដ្ឋាភិបាលមួយចំនួនយកទៅធ្វើនយោបាយតូបនីយកម្ម និងព្យាយាមចិញ្ចឹមទំនាស់ ដើម្បីបង្កើតជាលេសវាយប្រហារលើការគ្រប់គ្រង និងអភិរក្សធនធានធម្មជាតិរបសរាជរដ្ឋាភិបាល ក៏ដូចជាក្រសួងបរិស្ថាន ដែលជាស្ថាប័នមានសមត្ថកិច្ចគ្រប់គ្រងអភិរក្សតំបន់ការពារធម្មជាតិ។
សូមជម្រាបជូនថាតំបន់ព្រៃឡង់ ដែលស្ថិតក្នុងភូមិសាស្រ្តខេត្តចំនួន៤គឺ កំពង់ធំ ស្ទឹងត្រែង ព្រះវិហារ និងក្រចេះ មានផ្ទៃដីសរុប ៤សែនហិកតា ត្រូវបានរដ្ឋាភិបាលកម្ពុជាចេញអនុក្រឹត្យបង្កើតជាដែនជម្រកសត្វ ព្រៃ “ព្រៃឡង់” កាលពីខែឧសភា ឆ្នាំ២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ