ករណីសត្វស្លាបងាប់នៅព្រៃវែង៖ ក្រសួងថាមានសត្វស្លាបយ៉ាងហោចណាស់៥ប្រភេទ
នៅតំបន់បឹងស្នេហ៍ ខេត្តព្រៃវែង សត្វស្លាបជាង១ពាន់ក្បាលដែលងាប់ដោយសារជំងឺផ្ដាសាយបក្សី ត្រូវក្រសួងបរិស្ថានកំណត់ប្រភេទបានថា មានយ៉ាងហោចណាស់៥ប្រភេទ។ នេះបើតាមការបញ្ជាក់របស់លោក នេត្រ ភក្ត្រា អ្នកនាំពាក្យក្រសួងបរិស្ថាន ដែលបានថ្លែងប្រាប់វិទ្យុបារាំងអន្ដរជាតិ RFI នៅថ្ងៃសៅរ៍ ទី២៧មីនានេះ។
ចុះផ្សាយនៅថ្ងៃ៖
សត្វចង្កៀលខ្យង គឺជាសត្វស្លាបកម្រដែលងាប់ច្រើនជាងគេដោយសារជំងឺផ្ដាសាយបក្សី។ ជំងឺផ្ដាសាយបក្សី A/H5N1 ដែលផ្ទុះឡើងនៅតំបន់ប្រើប្រាស់ច្រើនយ៉ាងទួលព័ន្ធតាឡីបឹងស្នេហ៍ ស្ថិតនៅក្នុងឃុំធាយ ស្រុកបាភ្នំ ខេត្តព្រៃវែង ចាប់តាំងពីថ្ងៃទី១៧ខែមីនាមក។ ក្រៅពីសត្វចង្កៀលខ្យង ក៏មានដែរ សត្វត្រយ៉ងខ្លួនរលោង សត្វខ្វែក សត្វកុកគ្រោង សត្វក្អែក និងសត្វស្លាបមួយចំនួនទៀត។ នេះបើតាមការឲ្យដឹងពីលោក នេត្រ ភក្ត្រា អ្នកនាំពាក្យក្រសួងបរិស្ថាន ដែលបានបញ្ជាក់បន្ថែមថា ចាប់តាំងពីថ្ងៃទី១៧មីនាមក សត្វស្លាបនៅតំបន់បឹងស្នេហ៍បានងាប់ជាបន្តបន្ទាប់ ចំនួនជាង១០០ក្បាលជារៀងរាល់ថ្ងៃ។
មូលហេតុនៃការងាប់នេះ ត្រូវបានក្រសួងកសិកម្ម រុក្ខាប្រមាញ់ និងនេសាទ គូសបញ្ជាក់នៅក្នុងលិខិតចុះថ្ងៃទី២៤មីនាថា គឺដោយសារតែជំងឺផ្ដាសាយបក្សី ប្រភេទ A/H1N5។ ក្រសួងកសិកម្មបានសម្រេចឲ្យបំផ្លាញចោលបក្សីដែលមានជំងឺ សាកសពបក្សី និងផលិតផលបក្សីក្នុងតំបន់ផ្ទុះជំងឺតាមវិធានបច្ចេកទេសបសុពេទ្យ។
ចំណែកតំបន់ផ្ទុះជំងឺ និងតំបន់ជុំវិញក្នុងរង្វង់កាំប្រវែង៣គីឡូម៉ែត្រ ត្រូវផ្អាកការចេញចូលជាបណ្ដោះអាសន្នរយៈពេល៣០ថ្ងៃដើម្បីទប់ស្កាត់ការឆ្លងរាលដាលនៃជំងឺនេះ។ ក្រសួងកសិកម្មក៏បានបង្គាប់ឲ្យមន្ដ្រីពាក់ព័ន្ធសិក្សាស្រាវជ្រាវពីប្រភពជំងឺផ្ដាសាយបក្សីរយៈពេល៣០ថ្ងៃ និងត្រូវត្រួតពិនិត្យឃ្លាំមើលចលនាបក្សីជាប្រចាំ ក្នុងរង្វង់ដែលមានកាំប្រវែង១០គីឡូម៉ែត្រ ពីចំណុចផ្ចិតនៃតំបន់ផ្ទុះជំងឺ។
ដោយឡែក អាជ្ញាធរខេត្តព្រៃវែងឯណោះវិញ បានចេញសេចក្ដីជូនដំណឹងដល់ប្រជាពលរដ្ឋទាំងអស់ មិនត្រូវប៉ះពាល់និងបរិភោគ សត្វស្លាបងាប់។ មិនត្រឹមតែប៉ុណ្ណោះ អាជ្ញាធរខេត្តព្រៃវែងតម្រូវឲ្យពលរដ្ឋដុតបំផ្លាញចោល ក្នុងករណីឃើញសត្វស្លាបងាប់ ដែលរួមមានសត្វចង្កៀលខ្យង សត្វត្រយ៉ងខ្លួនរលោង សត្វខ្វែក សត្វកុកគ្រោង និងសត្វស្លាបមួយចំនួនទៀត។ វិធានការរបស់អាជ្ញាធរខេត្តដូច្នេះ គឺដើម្បីបង្ការការឆ្លងជំងឺផ្សេងៗដែលអាចកើតមានជាយថាហេតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ