ក្រសួងការបរទេស៖ ករណីទី១ ពលករខ្មែរនៅប្រទេសថៃ ស្លាប់ដោយសារកូវីដ១៩
ពលករខ្មែរធ្វើការនៅប្រទេសថៃ បានស្លាប់ដោយសារជំងឺកូវីដ១៩ នៅក្នុងមន្ទីរពេទ្យទីក្រុងបាំងកក កាលពីថ្ងៃទី៣០មេសាឆ្នាំ២០២១កន្លងទៅ។ តាមរយៈវិទ្យុបារាំងអន្តរជាតិ rfi នៅថ្ងៃទី០៤ឧសភានេះ អ្នកនាំពាក្យក្រសួងការបរទេស លោក កុយ គួង បានឲ្យដឹងថា សពពលករខ្មែរដែលបានស្លាប់នោះ ត្រូវបានបូជានៅប្រទេសថៃតែម្តង។
ចុះផ្សាយនៅថ្ងៃ៖
ស្តាប់ - ០១:៤០
មានដើមកំណើតមកពីខេត្តត្បូងឃ្មុំ មកធ្វើការងារនៅទីក្រុងបាងកក ពលករខ្មែរម្នាក់ដែលជាករណីទីមួយត្រូវបានកូវីដ១៩ឆក់យកជីវិតនៅក្នុងទឹកដីនៃប្រទេសថៃ នាថ្ងៃទី៣០ ខែមេសា ឆ្នាំ២០២១។
បើតាមស្ថានទូតកម្ពុជាប្រចាំប្រទេសថៃ សពខាងលើ គឺជាពលករស្របច្បាប់ ភេទប្រុស មានវ័យ៣៤ឆ្នាំ និងដែលបានឆ្លងជំងឺកូវីដ១៩ កាលពីថ្ងៃទី១៨ ខែមេសា ឆ្នាំ២០២១ ក្រោយទទួលការព្យាបាលនៅមន្ទីរពេទ្យក្នុងទីក្រុងបាំងកក។ សពជាពលករនេះ ចាំបាច់ត្រូវបូជានៅប្រទេសថៃតែម្តង។
នៅថ្ងៃទី០៤ឧសភានេះ អ្នកនាំពាក្យក្រសួងការបរទេស លោក កុយ គួង បានលើកឡើងថា ប្រពន្ធរបស់សពខាងលើដែលជាពលករខ្មែរដូចគ្នានោះ បានឆ្លងកូវីដ១៩ទន្ទឹមនឹងស្វាមីខ្លួនដែរ។ បច្ចុប្បន្ននេះ នាងកំពុងតែបន្តព្យាបាលក្នុងមន្ទីរពេទ្យ ដោយមានការដាក់ឧបករណ៍ជំនួយដង្ហើម។
អ្នកនាំពាក្យក្រសួងការបរទេស បានគូសបញ្ជាក់ថា ស្ថានទូតកម្ពុជាប្រចាំប្រទេសថៃ បានទាក់ទងទៅមន្ទីរពេទ្យព្យាបាលប្រពន្ធសពជាប្រចាំ និងបានអះអាងដែរថា មន្ទីរពេទ្យក៏បានយកចិត្តទុកដាក់ព្យាបាលអ្នកជម្ងឺជាពលករខ្មែររូបនេះផងដែរ។
នាអំឡុងពេលផ្ទុះជំងឺកូវីដ១៩ខ្លាំងនៅប្រទេសថៃនេះ លោក កុយ គួង អ្នកនាំពាក្យក្រសួងការបរទេស បានឲ្យដឹងថា ស្ថានទូតកម្ពុជា កំពុងទាក់ទងសហការជាមួយក្រុមហ៊ុនបញ្ជូន និងទទួលពលករ ដើម្បីទាមទារអត្ថប្រយោជន៍នានា ជូនគ្រួសារជនរងគ្រោះដោយវិបត្តិកូវីដ១៩នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ