អ្នកនាំពាក្យក្រសួងបរិស្ថានស្នើឲ្យសហគមន៍ព្រៃឡង់ស្វែងរកភាពស្របច្បាប់ មុននឹងអះអាងពីការបាត់បង់ព្រៃឈើក្នុងតំបន់ព្រៃឡង់
ជាថ្មីម្តងទៀត អ្នកនាំពាក្យក្រសួងបរិស្ថាន លោកនេត ភក្រ្តា ស្នើឲ្យសហគមន៍ព្រៃឡង់ចុះបញ្ជីស្របច្បាប់ មុននឹងអះអាងពីការបាត់បង់ព្រៃឈើនៅក្នុងតំបន់ព្រៃឡង់។ ការលើកឡើងរបស់អ្នកនាំពាក្យដូច្នេះ គឺបន្ទាប់ពីសហគមន៍ព្រៃឡង់ បានអះអាងថា ខ្លួនរកឃើញការកាប់ព្រៃជាបន្តបន្ទាប់នៅព្រៃឡង់ និងទទូចឲ្យអាជ្ញាធរអន្តរាគមន៍លើបញ្ហានេះ។
ចុះផ្សាយនៅថ្ងៃ៖
ស្តាប់ - ០១:៣៩
ថ្លែងប្រាប់វិទ្យុបារាំងអន្តរជាតិ RFI នៅព្រឹកថ្ងៃសុក្រនេះ លោក នេត ភក្រ្តា រដ្ឋលេខាធិការ និងជាអ្នកនាំពាក្យក្រសួងបរិស្ថាន ថាក្រុមសហគមន៍ព្រៃឡង់ត្រូវស្វែងរកការចុះបញ្ជីស្របច្បាប់ជាមុនសិន ដើម្បីឲ្យការលើកឡើងរបស់ខ្លួនប្រកបដោយការទទួលខុសត្រូវ និងឈានដល់ការរកដោះស្រាយបញ្ហាដែលខ្លួនបានលើកឡើងជាមួយនឹងភាគីរដ្ឋាភិបាល។
ប្រសិនបើមានការរកឃើញការកាប់ទន្ទ្រានព្រៃឈើ ឬការបាត់បង់ព្រៃឈើក្នុងតំបន់ណាមួយនោះ សហគមន៍ត្រូវកំណត់ទីតាំងឲ្យបានច្បាស់លាស់ មុននឹងធ្វើការអះអាងពីការកាប់ព្រៃ និងបាត់បង់ព្រៃឈើ។ នេះបើតាមការបញ្ជាក់បន្ថែមរបស់លោក នេត ភក្រ្តា។
បើតាមអ្នកនាំពាក្យរូបនេះ កន្លងមកក្រសួងបរិស្ថានបានការពារនិងអភិរក្សធនធានធម្មជាតិក្នុងតំបន់ព្រៃឡង់ ដោយឈរលើគោលការណ៍ច្បាប់ជាធំ និងអប់រំផ្សព្វផ្សាយដល់ប្រជាសហគមន៍ដែលរស់នៅក្នុងតំបន់នោះជាបន្តបន្ទាប់មកហើយ។ យ៉ាងណាមិញកាលពីថ្ងៃទី៨មីនាឆ្នាំ២០២១ សហរដ្ឋអាមេរិក តាមររយៈទីភ្នាក់ងារផ្តល់ជំនួយ USAID បានលើកឡើងថា ការបាត់បង់ព្រៃឈើនៅព្រៃឡង់ មកពីការពង្រឹងការអនុវត្តច្បាប់នៅខ្សោយ និងប្រព័ន្ធអភិបាលកិច្ចគ្មានភាពច្បាស់លាស់។
សហគមន៍ព្រៃឡង់ កាលពីថ្ងៃទី១៧កន្លងទៅនេះបានអះអាងនៅលើបណ្តាញសង្គមហ្វេសប៊ុកផេកផ្ទាល់ខ្លួនថា ពួកគេរកឃើញការកាប់ទន្ទ្រានព្រៃឈើនៅក្នុងឃុំចំនួន៣ក្នុងតំបន់ព្រៃឡង់នៅត្រឹមរយៈពេលបីថ្ងៃពីថ្ងៃទី១៥ដល់ថ្ងៃទី១៧ ក្រោយការសកម្មភាពល្បាតព្រៃ។ ដោយពួកគេបញ្ជាក់ថា មានការបាត់បង់ព្រៃឈើជាច្រើនហិកតានៅក្នុងឃុំដងកាំបិត ឃុំមានរិទ្ធិ និងឃុំសណ្តាន់ ក្នុងស្រុកសណ្តាន់ នៃខេត្តកំពង់ធំ។
សូមបញ្ជាក់ថា ព្រៃឡង់លាតសន្ធឹងជុំវិញខេត្តចំនួន៤ មានកំពង់ធំ ព្រះវិហារ ក្រចេះ និងស្ទឹងត្រែង ក្នុងបរិវេណផ្ទៃដីប្រមាណ៤៣ម៉ឺនហិកតា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ