កម្ពុជារំពឹងទទួលបានចំណូលដុល១៨៥លានដុល្លារក្នុងមួយឆ្នាំពីអាជីវកម្មរ៉ែមាសជាលើកដំបូង
រដ្ឋាភិបាលកម្ពុជាបានប្រកាសដាក់ឲ្យដំណើរការរោងចក្រចម្រាញ់រ៉ែមាសជាលើកដំបូងនៅកម្ពុជាដោយរំពឹងថានឹងទទួលបានចំណូលដុលជាមធ្យម១៨៥លានដុល្លារ ក្នុងនោះរដ្ឋនឹងទទួលបានពន្ធជាថវិកា៤០លានដុល្លារក្នុងមួយឆ្នាំ។ ការដាក់ឲ្យដំណើរការរោងចក្រចម្រាញ់រ៉ែមាសនេះ គឺធ្វើឡើងក្រោយពីក្រុមហ៊ុនអូស្ត្រាលី ដែលជាម្ចាស់អាជ្ញាប័ណ្ណ បានធ្វើការស្រាវជ្រាវ និងរុករកដោយប្រើពេលអស់១៤ឆ្នាំ។
ចុះផ្សាយនៅថ្ងៃ៖
ស្តាប់ - ០១:៤២
នៅក្នុងសារខិលិត៣ទំព័រ ចុះថ្ងៃទី១០ ខែមិថុនា លោកនាយករដ្ឋមន្ត្រី ហ៊ុន សែន បានគូសបញ្ជាក់ថា នេះជាមោទនភាពសម្រាប់កម្ពុជាក្នុងការដាក់ឲ្យដំណើរការរោងចក្រចម្រាញ់រ៉ែមាសជាលើកដំបូងរបស់ខ្លួន។ រោងចក្រនេះ គឺស្ថិតនៅតំបន់ អូខ្វាវ ស្រុកកែវសីមា ខេត្តមណ្ឌលគិរី ត្រូវដាក់ឲ្យដំណើរការចម្រាញ់រ៉ែមាសចាប់ពីថ្ងៃទី២១ ខែមិថុនា ២០២១ តទៅ។
អាជីវកម្មរ៉ែមាសដ៏ធំ និងជាលើកដំបូងនេះ វិនិយោគដោយក្រុមហ៊ុនអូស្ត្រាលីឈ្មោះ Renaissance Minerals។ ជាក្រុមហ៊ុនធ្វើអាជីវកម្មរ៉ែមាសខ្នាតអន្តរជាតិ ដោយផលិតចេញជាមាសដុំពាក់កណ្តាលសម្រេច៩០% ហើយក្រុមហ៊ុននេះអះអាងថា អាចផលិតមាសសុទ្ធបាន ៣តោន ក្នុងមួយឆ្នាំ សម្រាប់រយៈពេល៨ឆ្នាំដំបូង។ ក្រុមហ៊ុននេះអះអាងទៀតថា នឹងពង្រីកអាជីវកម្មរបស់ខ្លួនឲ្យកាន់ធំថែមទៀតក្រោយរយៈពេល៨ឆ្នាំដំបូងនេះ។
លោកប្រមុខរដ្ឋាភិបាល កម្ពុជារំពឹងថា នឹងទទួលបានផលប្រយោជន៍ជាចំណូលដុលជាមធ្យម ១៨៥លានដុល្លារ ក្នុងមួយឆ្នាំ ដែលក្នុងនោះចំណូលថវិកាជាតិ ពីសួយសារ និងសារពើពន្ធផ្សេងៗប្រមាណ៤០លានដុល្លារក្នុងមួយឆ្នាំ។
បើតាម លោក ហ៊ុន សែន ការធ្វើអាជីវកម្មរ៉ែមាស គឺត្រូវការការវិនិយោគប្រកបដោយវិជ្ជាជីវៈ និងមានបច្ចេកទេសខ្ពស់។ លោកថា ការធ្វើអាជីវកម្មរ៉ែមាស ជាលក្ខណៈប្រពៃណីយ គឺមានហានិភ័យខ្ពស់ និងបង្កផលប៉ះពាល់ដល់បរិស្ថានថែមទៀតផង។ លោកអំពាវនាវឲ្យប្រជាពលរដ្ឋបោះបង់ចោលនូវបំណងធ្វើអាជីវកម្មរ៉ែជាលក្ខណៈគ្រួសារ ខណៈការធ្វើអាជីវកម្មរ៉ែមាសខ្នាតអន្តរជាតិ នៅតំបន់អូខ្វាវត្រូវបានលោកប្រមុខរដ្ឋាភិបាលគូសបញ្ជាក់ថាជាគំរូមួយសម្រាប់នាំមុខដល់ការធ្វើអាជីវកម្មរ៉ែដទៃទៀត តាមគោលការណ៍អភិវឌ្ឍន៍ប្រកបដោយចីរភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ