អាជីវកម្មចម្រាញ់រ៉ែមាសខ្នាតធំនៅកម្ពុជាចាប់ផ្តើមដំណើរការនៅថ្ងៃចន្ទនេះ
អាជីវកម្មចម្រាញ់រ៉ែមាសខ្នាតធំនៅកម្ពុជា បានចាប់ផ្តើមដំណើរការជាផ្លូវការពីថ្ងៃចន្ទ ទី២១ ខែមិថុនា នេះហើយ។ នេះបើតាមពេលវេលា ដែលលោកនាយករដ្ឋមន្រ្តី ហ៊ុន សែន ធ្លាប់បានបញ្ជាក់កាលពីពេលថ្មីៗនេះ។ បើតាមគម្រោង អាជីកម្មចម្រាញ់រ៉ែមាសខ្នាតធំនេះ នឹងអាចសម្រេចជាលទ្ធផលចម្រាញ់ដុំមាសបាន ៣តោន ក្នុងមួយឆ្នាំ។
ចុះផ្សាយនៅថ្ងៃ៖
ស្តាប់ - ០២:០៦
តាមកាលបរិច្ឆេទកំណត់ នៅថ្ងៃចន្ទនេះ អាជីវកម្មចម្រាញ់រ៉ែមាសខ្នាតធំនៅក្នុងតំបន់អូរខ្វាវ ខេត្តមណ្ឌលគិរី បានចាប់ផ្តើមដំណើរការអាជីវកម្មរបស់ខ្លួន ដែលការចាប់ផ្តើមដំបូងនេះ មានវត្តមានផ្ទាល់ពីលោក ស៊ុយ សែម រដ្ឋមន្រ្តីក្រសួងរ៉ែ និងថាមពល។ ពោលគឺលោករដ្ឋមន្ត្រី បានចាប់ផ្តើមដំណើរការជានិមិត្តរូប ស្លចម្រាញ់រ៉ែមាស ចាក់ដុំមាស និងបោះត្រាសំគាល់ លើដុំរ៉ែមាសរបស់កម្ពុជា។
លោក ស៊ុយ សែម បញ្ជាក់ថាអាជីវកម្មចម្រាញ់រ៉ែមាសដំបូងខ្នាតធំនៅកម្ពុជានេះ នឹងត្រូវចំណាយកម្លាំងកម្មករប្រមាណ៤៦២នាក់ ដោយមានជនជាតិខ្មែរ៤២៧នាក់ និងបរទេស៣៥នាក់។ បើតាមសេចក្តីប្រកាសព័ត៌មាននៅថ្ងៃចន្ទទី២១ ខែមិថុនានេះ ការវិនិយោគដោយក្រុមហ៊ុនរបស់អូស្រ្តាលីឈ្មោះថា Renaissance Minerals (Cambodia) Limited នេះបានប្រើប្រាស់ទុនវិនិយោគសរុបប្រមាណ ១២០លានដុល្លារ។
ក្រោយដំណើរការអាជីវកម្ម កម្ពុជានឹងជីកយករ៉ែឆៅប្រមាណជិត២តោន និងចម្រាញ់ចេញជាដុំមាសកម្រិត៩០% ចំនួន៣តោនក្នុងមួយឆ្នាំ នៅរយៈពេល៨ឆ្នាំដំបូង។ ឆ្លើយតបបានជាចំណូលដុល មធ្យម១៨៥លានដុល្លារ ដោយក្នុងនោះរដ្ឋាភិបាលនឹងទទួលបាន ៤០លានដុល្លារ ក្នុងមួយឆ្នាំពីតម្លៃសួយសារ និងសារពើពន្ធផ្សេងៗ។ នៅក្នុងសារលិខិតកាលពីថ្ងៃទី១០ ខែមិថុនា ប្រមុខរដ្ឋាភិបាលកម្ពុជា លោក ហ៊ុន សែន បានចាត់ទុកភាពជោគជ័យនេះជាមោទនភាពសម្រាប់កម្ពុជា ក្នុងការដាក់ឲ្យដំណើរការរោងចក្រចម្រាញ់រ៉ែមាសជាលើកដំបូងរបស់ខ្លួន។
នេះអាចនិយាយបានថា ជាគម្រោងខ្នាតធំទី២នៃការវិនិយោគលើវិស័យធនធានរ៉ែនៅកម្ពុជា។ ដោយកាលពីថ្ងៃ២៩ធ្នូឆ្នាំ២០២០ ក្រសួងរ៉ែនិងថាមពល ធ្លាប់បានប្រកាសពីការវិនិយោគនិងដំណក់រ៉ែប្រេងដំបូងរបស់កម្ពុជា ដែលជាការវិនិយោគដោយក្រុមហ៊ុនសិង្ហបុរី «KrisEnergy»។
ក៏ប៉ុន្តែ កាលពីពេលថ្មីៗនេះ ក្រុមហ៊ុនKrisEnergy បានប្រកាសពីការក្ស័យធុនរបស់ខ្លួន ដោយសារបញ្ហាបំណុល។ យ៉ាងណាមិញ លោក ជៀប សួរ អគ្គនាយកនៃអគ្គនាយកដ្ឋានប្រេងកាតបានបញ្ជាក់ប្រាប់វិទ្យុបារាំងនាពេលកន្លងមកថា ក្នុងករណី ដែលក្រុមហ៊ុនមិនមានផែនការអភិវឌ្ឍន៍បន្តទៅមុខទៀតបាន នោះនឹងឈានទៅដល់ការបញ្ចប់កិច្ចព្រមព្រៀងប្រេងកាត ហើយលោកជឿថា រដ្ឋាភិបាលនឹងរកដៃគូថ្មី ដែលមានសមត្ថភាពគ្រប់គ្រាន់ទាំងហិរញ្ញវត្ថុ និងបច្ចេកទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ