World Bank ផ្តល់ឥណទាន២០០លានដុល្លារ ដល់កម្ពុជាដើម្បីស្តារសេដ្ឋកិច្ចឡើងវិញ
ក្រុមប្រឹក្សានាយកប្រតិបត្តិនៃធនាគារពិភពលោក(World Bank) កាលពីថ្ងៃទី២៤ ខែមិថុនា ម្សិលមិញ បានអនុម័តកញ្ចប់ឥណទាន ដែលមានទឹកប្រាក់ចំនួន ២០០លានដុល្លារ របស់សមាគមអភិវឌ្ឍន៍អន្តរជាតិ ដល់ប្រទេសកម្ពុជា។ ការសម្រេចរបស់ ធនាគារពិភពលោកដូច្នេះ គឺសម្រាប់គម្រោងរៀបចំគោលនយោបាយហិរញ្ញប្បទាន ដើម្បីជួយសង្គ្រោះ ការរើបឡើងវិញ និងការកសាងភាពធន់របស់កម្ពុជា ខណៈដែលប្រទេសនេះ កំពុងប្រឹងប្រែងប្រយុទ្ធជាមួយជំងឺកូវីដ-១៩ និងកំពុងចាប់ផ្តើមស្តារសេដ្ឋកិច្ចឡើងវិញ។
ចុះផ្សាយនៅថ្ងៃ៖
ស្តាប់ - ០២:១០
ទឹកប្រាក់ឥណទានចំនួន ២០០លានដុល្លារ របស់ធនាគារពិភាពលោក(World Bank) ត្រូវបានបញ្ជាក់ថា គម្រោងឥណទាននេះនឹងជួយកម្ពុជាក្នុងការដោះស្រាយវិបត្តិកូវីដ-១៩ តាមរយៈកិច្ចអន្តរាគមន៍សង្គ្រោះទាន់ពេលវេលា និងចំគោលដៅសម្រាប់ពលរដ្ឋងាយរងគ្រោះ ការសម្រួលឲ្យសេដ្ឋកិច្ចរើបឡើងវិញដោយស្វាហាប់តាមរយៈការកែទម្រង់ជារចនាសម្ព័ន្ធ និងការកសាងភាពធន់សម្រាប់ទប់ទល់ទៅនឹងស្ថានភាពអង្រួនផ្នែកសេដ្ឋកិច្ចនាពេលអនាគត។ នេះបើតាមសេចក្តីប្រកាសព័ត៌មានរបស់ធនាគារពិភពលោក។
ប្រទេសកម្ពុជាកំពុងតែប្រឈមមុខនឹងវិបត្តិសេដ្ឋកិច្ច និងសង្គម ដែលមិនធ្លាប់មានចាប់តាំងពី៣០ឆ្នាំ ខណៈកំណើនសេដ្ឋកិច្ចប្រទេសនេះ កាលពីឆ្នាំ២០២០ បានរួញទំហំអស់ ៣,១% ហើយពេលនេះ កម្ពុជាកំពុងស្ថិតនៅកណ្តាលស្ថានភាពដ៏អាក្រក់នៃការឆ្លងវីរុសកូវីដ-១៩។
វិស័យដែលរងផលប៉ះពាល់ខ្លាំងបំផុត និងជាវិស័យ ដែលផ្តល់ការងារច្រើនជាងគេនោះរួមមាន កាត់ដេរ ទេសចរណ៍ និងសំណង់។ ខណៈដែលវិធានទប់ស្កាត់បញ្ហាប្រឈមសំខាន់ៗ នៅមិនទាន់មាន ការរាតត្បាតជំងឺនេះ អាចនឹងបណ្តាលឲ្យភាពអត់ការងារធ្វើ និងភាពក្រីក្រកាន់តែកើនឡើងថែមទៀត ដែលក្នុងនោះ ពលរដ្ឋជិត ១លាននាក់ ត្រូវគេរំពឹងថានឹងធ្លាក់ចុះទៅក្នុងភាពក្រីក្រវិញ។ នេះបើតាម World Bank។
លោកស្រី អ៊ីនហ្គូណា ដូប្រាចា ប្រធានគ្រប់គ្រងធនាគារពិភពលោកប្រចាំកម្ពុជា បានថ្លែងថា ប្រទេសកម្ពុជាពិតជាត្រូវការធនធាន ដែលអាចយកទៅបញ្ចេញឱ្យបានរហ័សសម្រាប់ទ្រទ្រង់ដល់កម្មវិធីគ្រប់ជ្រុងជ្រោយមួយរបស់រដ្ឋាភិបាល ដើម្បីការពារជនក្រីក្របំផុតពីផលប៉ះទង្គិចនៃវិបត្តិនេះ និងដើម្បីជួយដល់កិច្ចប្រឹងប្រែងស្តារសេដ្ឋកិច្ច និងសង្គមរបស់ប្រទេសឲ្យងើបឡើងវិញ។
សូមរំលឹកថា កាលពីថ្ងៃទី១៧ ខែមិថុនាកន្លងទៅ ធនាគារពិភពលោក បានឲ្យដឹងថាសេដ្ឋកិច្ចកម្ពុជាកំពុងរើបឡើងវិញបន្តិចម្តងៗ ដោយមានការព្យាករណ៍ទុកថា នឹងទទួលបានកំណើនជិត ៤% ក្នុងឆ្នាំ២០២១ ក៏ប៉ុន្តែកំណើននេះ នៅមានភាពមិនប្រាកដប្រជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ