ក្រសួងសុខាភិបាល៖ ជំងឺកូវីដបំប្លែងថ្មី Delta ត្រូវបានរកឃើញច្រើនលើពលករត្រលប់មកពីថៃ
ពលករចំណាកស្រុកខ្មែរ ដែលត្រលប់មកពីប្រទេសថៃ ត្រូវបានរកឃើញថា បាននាំចូលមកនូវជំងឺកូវីដ-១៩ បំប្លែងថ្មីប្រភេទ Delta ច្រើនករណី។ នេះបើតាមសេចក្តីប្រកាសព័ត៌មានរបស់ ក្រសួងសុខាភិបាលកម្ពុជានៅថ្ងៃចន្ទនេះ។ ការរកឃើញប្រភេទជំងឺកូវីដ-១៩ បំប្លែងថ្មីនេះ ស្របពេលដែលពលករចំណាកស្រុកខ្មែរ នាំគ្នាវិលត្រលប់មកប្រទេសកម្ពុជាវិញ និងចំនួនអ្នកឆ្លងកូវីដ-១៩ ប្រចាំថ្ងៃមានការកើនឡើងកាន់តែច្រើនរយៈពេលប៉ុន្មានថ្ងៃចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:២៧
ជាការពិតក្រសួងសុខាភិបាលកម្ពុជាទទួលស្គាល់ថាមានជំងឺកូវីដ-១៩ បំប្លែងថ្មីប្រភេទ Delta មកតាមរយៈពលករចំណាកស្រុកខ្មែរ ដែលនាំគ្នាត្រលប់ចូលប្រទេសកម្ពុជាវិញ ច្រើនក៏ប៉ុន្តែក្រសួងមិនបានបង្ហាញតួលេខថាបានរកឃើញប៉ុន្មានករណីនោះទេ។
តាមរយៈសេចក្តីជូនដំណឹង ក្រសួងសុខាភិបាលបានបញ្ជាក់ថា ការចម្លងនៃវីរុសកូវីដ-១៩ប្រភេទ Delta មកពីឥណ្ឌានេះ នៅប្រទេសមួយចំនួន មានភាពសាហាវខ្លាំងជាងវីរុសកូវីដ-១៩ បំប្លែងមុនៗប្រហែលដល់ទៅ១៥ដង ខ្លាំងជាងការចម្លងពីពេលកន្លងទៅ ខណៈដែលក្រសួងមិនទាន់ដឹងថាវីរុសកូវីដ-១៩ នេះ មានអត្តចរិកបែបណានៅឡើយ។
ទោះជាអាជ្ញាធរ មិនបានបញ្ជាក់ថាមានការឆ្លងពីវីរុសកូវីដ-១៩ បំប្លែងថ្មីប៉ុន្មានក៏ដោយ ក៏ស្របពេលជាមួយគ្នានេះ គេសង្កេតឃើញថា ប្រទេសកម្ពុជាបានរកឃើញអ្នកឆ្លងជំងឺកូវីដ-១៩ រយៈពេល២ថ្ងៃជាប់គ្នា ក្នុងអត្រាមួយខ្ពស់ គឺជាង៨០០នាក់ ក្នុងមួយថ្ងៃ។ ជាចំនួនមួយ ដែលមានការកើនឡើងរយៈពេលមួយសប្តាហ៍ចុងក្រោយដែរ គឺចាប់ពីជាង៥០០នាក់ រហូតដល់ជាង៨០០នាក់ ខណៈអ្នកស្លាប់ដោយសារជំងឺផ្លូវដង្ហើមដ៏កាចសាហាវនេះ ក៏មានការកើនឡើងស្រឺតៗផងដែរ។ កំណើននៃអ្នកឆ្លងជំងឺកូវីដ-១៩ នាដំណាក់កាលចុងក្រោយនេះ ត្រូវបានកត់សម្គាល់ថាភាគច្រើននៅតាមបណ្តាខេត្ត និងអ្នកដំណើរមកពីបរទេស។
ទោះយ៉ាងណា ក្រសួងសុខាភិបាលក៏ដូចជាអ្នកវិទ្យាសាស្ត្រ នៅតែផ្ញើសារដដែលៗ ឲ្យពលរដ្ឋគ្រប់គ្នា មានការប្រុងប្រយ័ត្ន អនុវត្តវិធានការពារខ្លួនឲ្យបានត្រឹមត្រូវ និងម៉ត់ចត់។ ទន្ទឹមនឹងប្រាប់ឲ្យមានការគោរពជាទូទៅនូវវិធានសុខាភិបាល ក្រសួងក៏បានកត់សម្គាល់ដែរថា បុគ្គលមានការភ្លេចខ្លួន ដែលបណ្តាលឲ្យការអនុវត្តន៍វិធានការការពារខ្លួនមានភាពធូរលុង ជាពិសេសនៅតាមទីប្រជុំជន។
សូមបញ្ជាក់ថា មកទល់ពេលនេះ ប្រទេសកម្ពុជាមានអ្នកឆ្លងជំងឺកូវីដ-១៩ សរុបចំនួន ៤៨ ៥៣២ នាក់ ជាសះស្បើយចំនួន ៤២ ៧៦៤នាក់ និងស្លាប់សរុប ៥៥៦នាក់ ខណៈការចាក់វ៉ាក់សាំងការពារកូវីដ-១៩ទូទាំងប្រទេសសរុបប្រមាណ៤លាននាក់ ស្មើនឹងប្រមាណ៤០% ក្នុងចំណោមគោលដៅ ដែលត្រូវចាក់សរុបចំនួន ១០លាននាក់ គិតត្រឹមយប់ថ្ងៃទី២៧ ខែមិថុនា ឆ្នាំ២០២១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ