លោក អេង ហ៊ី៖ ជាបឋម មានឈើប្រមាណ ៤ពាន់ម៉ែត្រគូប កំពុងត្រៀមរៀបចំធ្វើមឈូសសម្រាប់សពអ្នកស្លាប់ដោយជំងឺកូវីដ ១៩នៅកម្ពុជា
ជាបឋម មានឈើដែលរឹបអូសបាន ពីបទល្មើសព្រៃឈើ ប្រមាណ ៤ ០០០ម៉ែត្រគូប កំពុងត្រូវបានគិតគូដើម្បីរៀបចំជាមឈូស សម្រាប់តម្កល់សព អ្នកដែលបានស្លាប់ដោយជំងឺកូវីដ ១៩។ នេះបើតាម លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស ប្រាប់វិទ្យុបារាំងអន្តរជាតិ RFI នៅល្ងាចថ្ងៃសុក្រនេះ។ តាមលោក អេង ហ៊ី ឈើទាំងនេះ គឺរឹបអូសបាន ពីបទល្មើសព្រៃឈើ ក្នុងឆ្នាំ ២០២០ និង២០២១។ ប៉ុន្តែលោក អេង ហ៊ី បានបញ្ជាក់ថា នេះគ្រាន់តែជាឈើដែលទើបបូកសរុកបឋមប៉ុណ្ណោះ ដោយគណៈកម្មាការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ កំពុងបន្តប្រមូលការបូកសរុបពីតាមខេត្តនានា និងពីខាងក្រសួងបរិស្ថានបន្ថែមទៀត។
ចុះផ្សាយនៅថ្ងៃ៖
សូមស្តាប់ការលើកឡើងរបស់លោក អេង ហ៊ី រៀបចំជូនដោយសួង សុខភារី៖ (សំឡេង)
សូមបញ្ជាក់ថា ការបូកសរុបឈើរបស់គណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិនេះ គឺបន្ទាប់ពីលោកនាយករដ្ឋមន្ត្រីហ៊ុន សែន ក្នុងការថ្លែងសារពិសេស នៅថ្ងៃព្រហស្បតិ៍ម្សលមិញ បានស្នើឳ្យលោក សៅ សុខា ប្រធានគណៈកម្មការនេះ យកឈើដែលរឹបអូសបានពីបទល្មើសព្រៃឈើ មករៀបចំធ្វើជាក្តារមឈូស តម្កល់សាកសពអ្នកស្លាប់ដោយជំងឺកូវីដ១៩ នៅកម្ពុជា។ តាមលោកប្រមុខដឹកនាំរដ្ឋាភិបាល ការរៀបចំឳ្យសព មានមឈូស ត្រឹមត្រូវ គឺជាការគោរពដល់សព។ ជាមួយគ្នា លោកនាយករដ្ឋមន្ត្រីកម្ពុជា ក៏បានណែនាំឱ្យមានការរៀបចំទិញកោដ្ឋិ សម្រាប់ដាក់ធាតុ ដល់ក្រុមគ្រួសារអ្នកស្លាប់ដោយជំងឺកូវីដ១៩ដែរ។ ហើយលោកក៏ប្រកាស ដាក់ចេញយុទ្ធសាស្ត្ររៀបចំកប់ ឬ បូជាសពអ្នកជំងឺកូវីដ១៩ ឱ្យបានល្អ តាមវិធានការ ៤យ៉ាង ដែលមានដូចជា រៀបចំបច្ឆានៅកន្លែងមិនទាន់មានបច្ឆា។ ប្រើបច្ឆាតាមវត្ត ជាមួយនឹងការធានាសុវត្ថិភាព។ រៀបចំដីសម្រាប់កប់សពតាមប្រពៃណីរបស់ជនជាតិភាគតិច និងខ្មែរ-ឥស្លាម និង រៀបចំផលិតក្តាមឈូសឱ្យបានត្រឹមត្រូវសម្រាប់យកទៅបូជា ឬកប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ