លោក ង៉ោ ម៉េងជ្រួន៖ កម្ពុជាជាអ្នកបញ្ជាទិញក្តារមឈូសពីប្រទេសថៃ មិនមែនថៃផ្តល់ជូននោះទេ
អាជ្ញាធរខេត្តបន្ទាយមានជ័យ បានគូសបញ្ជាក់នៅថ្ងៃចន្ទនេះថា រដ្ឋាភិបាលកម្ពុជា ជាអ្នកបញ្ជាទិញក្តារមឈូសពីប្រទេសថៃ សម្រាប់អ្នកស្លាប់ដោយសារកូវីដ-១៩ ពោលមិនមែនប្រទេសថៃ ជាអ្នកផ្តល់ជូននោះឡើយ។ ការបញ្ជាក់របស់អាជ្ញាធរខ្មែរជាប់ព្រំដែនយ៉ាងដូច្នេះ គឺបន្ទាប់ពីមានការផ្សព្វផ្សាយថា ប្រទេសថៃប្រគល់ជូននូវក្តារមឈូសប្រមាណ ២០០ ដល់កម្ពុជា ខណៈកម្ពុជាមានអ្នកស្លាប់ដោយសារកូវីដ-១៩ ជាបន្តបន្ទាប់។
ចុះផ្សាយនៅថ្ងៃ៖
ស្តាប់ - ០១:៥២
ប្រាប់វិទ្យុបារាំងអន្តរជាតិRFI តាមទូរស័ព្ទ នៅថ្ងៃទី៥ ខែកក្កដានេះ លោក ង៉ោ ម៉េងជ្រួន អភិបាលរងខេត្តបន្ទាយមានជ័យ បានឲ្យដឹងថា តាមគម្រោង ប្រមុខរដ្ឋាភិបាលកម្ពុជាបានបញ្ជាទិញក្តារមឈូសពីប្រទេសថៃចំនួន ៣០០០ សម្រាប់ដាក់អ្នកស្លាប់ដោយសារជំងឺកូវីដ-១៩ នៅកម្ពុជា។ ប៉ុន្តែលោកបដិសេធមិនប្រាប់ពីចំនួនក្តារមឈូស ដែលបានដឹកមកដល់កម្ពុជាហើយនោះទេ។
កាលពីសប្តាហ៍មុន មានការផ្សព្វផ្សាយតាមបណ្តាញសង្គមថា ប្រទេសថៃផ្តល់ក្តារមឈូសចំនួន ២០០ ដល់អាជ្ញាធរខេត្តបន្ទាយមានជ័យ។ ប៉ុន្តែលោក ង៉ោ ម៉េងជ្រួន បានបដិសេធព័ត៌មាននេះ។
លោកនាយករដ្ឋមន្រ្តី ហ៊ុន សែន កាលពីថ្ងៃទី១ ខែកក្កដា បានបញ្ជាឲ្យទិញក្តារមឈូស មកទុកនៅតាមមន្ទីរពេទ្យ នៅរាជធានីភ្នំពេញ និងបណ្ដាខេត្ដសម្រាប់ជួយដល់សាច់ញាតិអ្នកជំងឺ ដែលបានស្លាប់ដោយសារកូវីដ-១៩ ដែលមិនមានលទ្ធភាព។ លោក ហ៊ុន សែន អះអាងថាធ្វើបែបនេះគឺ ដើម្បីគោរពចំពោះសាកសពនៃអ្នកជំងឺ មិនមែនជាការប្រមាថជីវិតរបស់មនុស្សទេ។
ក្រៅពីបញ្ជាឲ្យទិញក្តារមឈូស លោកប្រមុខរដ្ឋាភិបាល ក៏បានណែនាំ លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស ឲ្យបញ្ចេញឈើ ដែលបានចាប់រឹបអូសកន្លងមកសម្រាប់ធ្វើក្តារមឈូសផងដែរ។
បើតាមអាជ្ញាធរខេត្តបន្ទាយមានជ័យ មានពលករខ្មែរចន្លោះពី១៥០ ទៅ២០០នាក់ ក្នុងមួយថ្ងៃ បានវិលចូលប្រទេសកម្ពុជាវិញ នៅគ្រាដែលប្រទេសថៃកំពុងផ្ទុះឡើងកូវីដ-១៩ ជាពិសេសកូវីដបំប្លែងខ្លួនថ្មីប្រភេទ Delta ហើយថា ការគ្រប់គ្រងពលករឆ្លងដែនតាមខេត្តបន្ទាយមានជ័យ គឺឈានដល់កម្រិតថ្នាក់ជាតិហើយ។
បើតាមក្រសួងសុខាភិបាល យ៉ាងហោចណាស់មានពលករខ្មែរចំនួន ២៣នាក់ ត្រូវបានរកឃើញថា ឆ្លងកូវីដ-១៩ ប្រភេទថ្មី Delta ខណៈពួកគេភាគច្រើនវិលមកពីប្រទេសថៃតាមច្រកអូស្មាច់ខេត្តឧត្តរមានជ័យ និងមួយចំនួនចូលតាមច្រកអូបីជាន់ខេត្តបន្ទាយមានជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ