ព្រះចៅអធិការវត្តថៃបញ្ជាក់ថាការសង់ប្រាសាទថ្ម មិនបានលួចចម្លងប្លង់ ឬស្ថាបត្យកម្ម ដូចគ្នាទៅនឹងប្រាសាទអង្គរខ្មែរទេ
ក្រសួងវប្បធម៌ និងវិចិត្រសិល្បៈ នៅថ្ងៃទី០៧ ខែកក្កដានេះ បានប្រកាសព័ត៌មានបឋមថា សំណង់ប្រសាទថ្ម ដែលបានសាងសង់នៅក្នុងវត្តមួយនៃខេត្តបុរីរម្យរបស់ថៃ មិនត្រូវបានធ្វើឡើងដោយចម្លងតាមរចនាបថ ស្ថាបត្យកម្មដូចប្រាសាទអង្គរវត្តនោះទេ។ ការចេញផ្សាយរបស់ក្រសួងវប្បធម៌ដូច្នេះ ធ្វើឡើងបន្ទាប់ពីស្ថានទូតកម្ពុជាប្រចាំប្រទេសថៃ បានចុះទៅស្រាវជ្រាវដោយផ្ទាល់នៅទីតាំងសំណង់ ដែលសង្ស័យថាជាការសាងសង់ប្រាសាទថ្មីមួយ ដោយចម្លងតាមរចនាបថប្រាសាទអង្គរវត្តរបស់កម្ពុជា។
ចុះផ្សាយនៅថ្ងៃ៖
ស្តាប់ - ០២:១៤
ក្រោយពីក្រសួងវប្បធម៌បានបញ្ជាឲ្យមានការស្រាវជ្រាវជាបន្ទាន់ បន្ទាប់ពីមានការផ្សព្វផ្សារតាមបណ្តាញសង្គមនានា ជុំវិញការសាងសង់ប្រាសាទថ្មមួយ នៅខេត្តបុរីរម្យ របស់ថៃ ស្ថានទូតកម្ពុជាប្រចាំប្រទេសថៃ ក៏បានរកឃើញបឋមចំនួន៣ចំណុច ក្នុងនោះមានសំណង់ប្រាសាទរបស់ថៃ ដែលកំពុងសាងសង់នេះ គឺជាសំណង់មួយ ក្នុងចំណោមសំណង់ប្រាសាទថ្មីដទៃទៀត មានភាពចម្រុះ ជាទីប្រតិស្ថាននៃព្រះពុទ្ធរូបសម្រាប់បូជា។ សំណង់នេះធ្វើអំពីថ្មភក់នៅផ្នែកខាងក្រៅ និងចាក់បេតុងបង្កប់ដែកពីខាងក្នុង។ នេះបើតាមក្រសួងវប្បធម៌។
សេចក្តីប្រកាសព័ត៌មានឲ្យដឹងទៀតថា តាមរយៈការបំភ្លឺ និងបង្ហាញឯកសារ ប្លង់ សំណង់នានា ព្រះចៅអធិការវត្តបានបញ្ជាក់ថា ការសាងសង់ប្រាសាទនេះ គឺមិនបានលួចចម្លងប្លង់ ឬសាងសង់តាមរចនាបថស្ថាបត្យកម្មដូចគ្នាទៅនឹងប្រាសាទអង្គរវត្ត ឬប្រាសាទបុរាណណាមួយនៅក្នុងប្រទេសកម្ពុជាឡើយ ពោលគឺសាងសង់តាមគំនូសប្លង់ដោយខ្លួនឯង និងរចនាទៅតាមស្ថាបត្យកម្មប្រាសាទមួយចំនួន ដែលមាននៅក្នុងតំបន់នោះ។
ទន្ទឹមគ្នានឹងការអះអាងដូចនេះ តំណាងអ្នកសម្របសម្រួល នៃគម្រោងសា្ថបនាប្រាសាទក៏សា្វគមន៍ក្នុងការទទួលស្នើឲ្យមន្ត្រីជំនាញផ្នែកស្ថាបត្យកម្មកម្ពុជាចុះពិនិត្យដោយផ្ទាល់បានក្នុងករណីមានការមន្ទិលសង្ស័យ។ នេះបើតាមព័ត៌មានដែលក្រសួងវប្បធម៌ទទួលបានពីស្ថានទូតកម្ពុជាប្រចាំប្រទេសថៃ។
សូមបញ្ជាក់ថា រយៈពេលប៉ុន្មានថ្ងៃចុងក្រោយនេះ ដំណឹងនៃការសាងសង់ប្រាសាទថ្មរបស់ថៃ ដោយសង្ស័យថាជាការចម្លងតាមប្រាសាទអង្គរវត្តកម្ពុជា ឬប្រាសាទអង្គរវត្តចម្លងដ៏ធំជាងគេនៅលើពិភពលោក ត្រូវបានបណ្តាញសង្គម ជាពិសេសហ្វេសប៊ុកនៅក្នុងប្រទេសកម្ពុជាបង្ហោះ ចែករំលែកតៗគ្នាយ៉ាងព្រោងព្រាធ។ មហាជនខ្មែរ បានសម្តែងនូវការព្រួយបារម្ភប្រសិនបើមានការសង់ប្រាសាទចម្លងតាមអង្គរវត្តមែន និងស្នើឲ្យអាជ្ញាធរខ្មែរ ធ្វើការទប់ស្កាត់ និងត្រៀមលក្ខណៈការពារសិទ្ធិប្រាសាទអង្គរវត្តតាមច្បាប់អន្តរជាតិ។
ទោះយ៉ាងណាក្រសួងវប្បធម៌កម្ពុជា ក៏បានបញ្ជាក់ដែរថា ក្រសួងបានធ្វើការ ហើយនឹងបន្តតាមដានការងារនេះដោយយកចិត្តទុកដាក់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ