ដោយសារកូវីដ កម្ពុជាប្រកាសផ្លូវការរៀបចំកិច្ចប្រជុំកំពូល អាស៊ី-អឺរ៉ុប តាមអនឡាញនៅខែវិច្ឆិកាឆ្នាំនេះ
ក្រសួងការបរទេសកម្ពុជានៅថ្ងៃទី១២ ខែកក្កដា ម្សិលមិញ បានប្រកាសជាផ្លូវការថា នឹងរៀបចំកិច្ចប្រជុំកំពូល អាស៊ី-អឺរ៉ុប លើកទី១៣ (ASEM 13) នៅថ្ងៃទី ២៥ និង២៦ ខែវិច្ឆិកា ឆ្នាំ២០២១នេះ តាមប្រព័ន្ធ Vidéo Conférence។ ការប្រកាសជាផ្លូវការនេះ ធ្វើឡើងក្រោយមានកិច្ចប្រជុំឧត្តមមន្ត្រី អាស៊ី-អឺរ៉ុប កាលពីថ្ងៃទី៧ និងថ្ងៃទី៩ ខែកក្កដា កន្លងទៅ តាមប្រព័ន្ធអនឡាញ។ ក្រសួងការបរទេសកម្ពុជា អះអាងថា ការសម្រេចរបស់កម្ពុជាដូច្នេះ ស្របតាមការណែនាំរបស់គណៈកម្មាធិការជាតិប្រយុទ្ធប្រឆាំងនឹងជំងឺកូវីដ-១៩ ដោយបញ្ជាក់ថាការរៀបចំកិច្ចប្រជុំកំពូល ជាលក្ខណៈរូបវ័ន្ត នឹងមិនមានសុវត្ថិភាពដល់ថ្នាក់ដឹកនាំនៃប្រទេសដៃគូ ASEM ដែលនឹងត្រូវមកចូលរួមកិច្ចប្រជុំនោះឡើយ។ វាក៏នឹងមិនអាចប្រព្រឹត្តទៅបានដែរ ព្រោះជំងឺរាតត្បាតនេះ បាន និងកំពុងបន្តរីករាលដាលខ្លាំង ស្របពេលដែលបណ្តាប្រទេសលើពិភពលោកបានដាក់ចេញនូវការរឹតត្បិតលើការធ្វើដំណើរជាថ្មី។ ជុំវិញបញ្ហានេះ លោកបណ្ឌិត គិន ភា នាយកវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាមើលឃើញថា កម្ពុជាមានបំណងចង់រៀបចំកិច្ចប្រជុំដ៏សំខាន់នេះដោយផ្ទាល់ ក៏ប៉ុន្តែហេតុផលជំងឺកូវីដ-១៩ គឺជាឧបសគ្គដ៏ធំ ដែលធ្វើឲ្យកិច្ចប្រជុំកំពូលអាស៊ី-អឺរ៉ុប នេះបង្វែរទៅជាកិច្ចប្រជុំតាមអនឡាញវិញ។ លោកបណ្ឌិតបញ្ជាក់ថា លទ្ធផលនៃកិច្ចប្រជុំនឹងមិនខុសគ្នាពីកិច្ចប្រជុំដោយផ្ទាល់នោះទេ។
ចុះផ្សាយនៅថ្ងៃ៖
សូមស្តាប់ប្រសាសន៍លោកបណ្ឌិត គិន ភា៖
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ