កម្ពុជាលោតមកលេខ៦ ជាប្រទេសដែលមានអ្នកឆ្លង និងស្លាប់ច្រើនដោយកូវីដ-១៩ នៅអាស៊ាន
ប្រទេសកម្ពុជាបានរំកិលមួយលេខទៀតហើយទៅលើប្រទេសសិង្ហបុរី ជាប្រទេសដែលមានអ្នកឆ្លង និងស្លាប់ដោយជំងឺកូវីដ-១៩ ច្រើននៅក្នុងតំបន់អាស៊ី-អាគ្នេយ៍(អាស៊ាន)។ ក្នុងចំណោមប្រទេសទាំង១០ នៃសមាគមអាស៊ាន កម្ពុជាមានចំនួនអ្នកឆ្លង និងស្លាប់ដោយជំងឺកូវីដ-១៩ លំដាប់ទី៦ នៅពីលើប្រទេសសិង្ហបុរីជាលើកដំបូង កាលពីថ្ងៃម្សិលមិញ ក្រោយសិង្ហបុរី នាំមុខចំនួនអ្នកឆ្លងចាប់តាំងពីមានការរាត្បាតនៃជំងឺកូវីដ-១៩ ជាសកលមក។
ចុះផ្សាយនៅថ្ងៃ៖
ស្តាប់ - ០២:០០
គិតត្រឹមព្រឹកថ្ងៃទី១៥ ខែកក្កដានេះ ប្រទេសកម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន ៦៤ ៦១១នាក់ និងស្លាប់សរុបឈានដល់លេខ៤ខ្ទង់ជាលើកដំបូងគឺ ១ ០២៥នាក់ ដោយមានអ្នកឆ្លងថ្មីនៅថ្ងៃនេះចំនួន ៩៩៦នាក់ និងស្លាប់ច្រើនបំផុតប្រចាំថ្ងៃមិនធ្លាប់មានចំនួន ៣៩នាក់។
តាមរយៈតួលេខចុងក្រោយនេះ កម្ពុជាបានឈរនៅលំដាប់ទី៦ ពីលើប្រទេសសិង្ហបុរី ដែលធ្លាប់តែមានអ្នកឆ្លងច្រើនជាងកម្ពុជា ចាប់តាំងពីមានការឆ្លងរាលដាលជំងឺកូវីដ-១៩ មក។ ប្រទេសសិង្ហបុរី គិតមកត្រឹមថ្ងៃម្សិលមិញ មានអ្នកឆ្លងសរុបចំនួន ៦២ ៨០៤ នាក់ និងស្លាប់សរុបតែ ៣៦នាក់ប៉ុណ្ណោះ។
សូមបញ្ជាក់ថា នៅក្នុងចំណោមប្រទេសអាស៊ានទាំង១០ កម្ពុជាបានឈរនៅលំដាប់ទី៦ ទាំងចំនួនអ្នកឆ្លង និងចំនួនអ្នកស្លាប់ ក្រោមប្រទេសភូមា ដែលមានអ្នកឆ្លងដល់ទៅជាង ២០ម៉ឺននាក់ និងស្លាប់ជាង៤ពាន់នាក់។ រីឯប្រទេសដែលមានអ្នកឆ្លង និងស្លាប់ច្រើនជាងគេនៅក្នុងចំណោមប្រទេសអាស៊ានវិញ គឺឥណ្ឌូនេស៊ី ដែលមានអ្នកឆ្លងសរុបជាង ២,៦លាននាក់ និងស្លាប់ជិត៧ម៉ឺននាក់ តាមពីក្រោយដោយហ្វីលីពីន ម៉ាឡេស៊ី ថៃ ភូមា និងកម្ពុជា។
ដោយឡែក ប្រទេសប៊្រុយណេ មានចំនួនអ្នកឆ្លងទាបជាងគេគឺ ២៨២នាក់ និងស្លាប់តែ៣នាក់ប៉ុណ្ណោះ ដូចប្រទេសឡាវដែរ តែឡាវមានអ្នកឆ្លងប្រមាណ ៣ពាន់នាក់ ខណៈវៀតណាមនៅពីក្រោមសិង្ហបុរី និងនៅលំដាប់ទី៨លើប្រទេសឡាវ កំពុងប្រឈមនឹងការឆ្លងធ្ងន់ធ្ងរចុងក្រោយនេះ ក្នុងមួយថ្ងៃរាប់ពាន់ករណី។
ជាសរុប ប្រទេសអាស៊ានទាំង១០ មកទល់ពេលនេះ មានអ្នកឆ្លងជំងឺកូវីដ-១៩ ចំនួនជិត ៦លាននាក់ និងស្លាប់សរុបជាង ១១ម៉ឺននាក់ និងមានអ្នកជាសះស្បើយច្រើនដែររហូតដល់ជាង ៤,៨លាននាក់ ខណៈពិភពលោកមានអ្នកឆ្លងសរុបជិត ២០០លាននាក់ និងស្លាប់សរុប ជាង ៤លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ