កម្ពុជា រកឃើញវីរុសកូវីដ-១៩ បំប្លែងថ្មី (Delta) ៣៧ករណីថ្មីទៀត!
កម្ពុជា បានរកឃើញវីរុសកូវីដ-១៩ បំប្លែងថ្មី (Delta) ចំនួន ៣៧ករណីទៀត តាមរយៈលទ្ធផលវិភាគដោយវិទ្យាស្ថានប៉ាស្ទ័រកម្ពុជា ពីថ្ងៃទី ៧ ដល់ ១៤កក្កដា។ នេះបើតាមសេចក្តីជូនដំណឹងរបស់ក្រសួងសុខាភិបាល នៅល្ងាចថ្ងៃសុក្រ ទី ១៦ខែកក្កដានេះ។ ចំនួន ៣៧ករណីថ្មីនេះ បានធ្វើឱ្យវត្តមានវីរុស Delta នៅកម្ពុជា កើនដល់សរុប ៧៥ករណី គិតតាំងពីចុងខែមីនាមក។
ចុះផ្សាយនៅថ្ងៃ៖
ស្តាប់ - ០២:១៦
៣៧ករណីថ្មីនៃវីរុសបំប្លែងខ្លួន Delta ដែលក្រសួងសុខាភិបាល បានប្រកាសពីការរកឃើញនៅពេលនេះ មាន ១៣នាក់ ជាពលករខ្មែរ ដែលធ្វើដំណើរមកពីប្រទេសថៃ ចូលមកកម្ពុជា តាមច្រកអូរបីជាន់ និងអូស្មាច់។ ២១នាក់ទៀត គឺជាពលរដ្ឋខ្មែរ ដែលត្រលប់មកពីប្រទេសថៃដែរ ដោយមានខ្លះចូលមកតាមច្រកប៉ោយប៉ែត ខ្លះតាមច្រកអូរស្មាច់ និងច្រកម៉ាឡៃ។ ចំណែក ៣នាក់ទៀត គឺជាជនជាតិឥណ្ឌូនេស៊ី ដែលមកដល់កម្ពុជា តាមអាកាសយានដ្ឋាន។
តាមរយៈការរកឃើញនេះ កម្ពុជាមានអ្នកមានវិជ្ជមានវីរុសកូវីដ ១៩បំប្លែងថ្មី ប្រភេទ B.1.617.2 (Delta) ជាសរុបចំនួន ៧៥នាក់ ដែលសុទ្ធតែជាករណីនាំចូល គិតតាំងពីថ្ងៃទី ៣១ខែមីនា ឆ្នាំ ២០២១ រហូតដល់ថ្ងៃទី ១៤ខែកក្កដា ឆ្នាំ ២០២១។
ប្រឈមនឹងកំណើនកូវីដ ១៩ ប្រភេទ Delta ដែលត្រូវបានចាត់ទុកដោយពិភពលោកទាំងមូល ថាមានការឆ្លងលឿនខ្លាំង និងកាចសាហាវបំផុតនេះ ក្រសួងសុខាភិបាលកម្ពុជា បានក្រើនរម្លឹកជាថ្មីឱ្យប្រជាពលរដ្ឋទាំងអស់ ត្រូវតែប្រុងប្រយ័ត្នខ្លួនឱ្យបានខ្ពស់បំផុត ដោយត្រូវចេះផ្លាស់ប្តូរទម្លាប់រស់នៅឱ្យស្របតាមពាក្យស្លោក «រៀនរស់នៅធម្មតាជាមួយវីរុសកូវីដ-១៩ តាមបែបគន្លងថ្មី ក្នុងបរិបទប្រយុទ្ធនឹងជំងឺកូវីដ-១៩» ។ ចំណែកបុគ្គដែលតម្រូវឱ្យធ្វើចត្តាឡីស័ក ក៏ត្រូវតែគោរពតាមគោលការណ៍ធ្វើចត្តាឡីស័កឱ្យបានត្រឹមត្រូវ តាមការណែនាំរបស់គណៈកម្មការគ្រប់គ្រងនៅទីតាំងនោះ ដើម្បីទប់ស្កាត់ការចម្លងបន្តគ្នា ក្នុងសហគមន៍ ក្នុងទ្រង់ទ្រាយធំ។ ជាពិសេស គឺសូមកុំទៅទីតាំង ៣ «ជ» ដែលមានដូចជា កន្លែងជួបជុំមនុស្សអ៊ូរអរច្រើន កន្លែងមនុស្សនៅជិតៗគ្នា និងកន្លែងបិទជិត។
ជាមួយគ្នា ក្រសួងសុខាភិបាល ក៏បានទាញហានិភ័យចំពោះក្រុមយុវវ័យផងដែរ ដោយសារមានការសង្កេតឃើញថា ការចម្លងនាពេលបច្ចុប្បន្ន មានសន្ទុះកើនឡើងលើយុវវ័យ ដែលបានដើរចេញក្រៅផ្ទះច្រើន ឬ មានការជួបជុំមិត្តភក្តិ។
គួររម្លឹកជូនថា ក្រោយមានការរកឃើញវីរុសកូវីដ ១៩ប្រភេទបំប្លែងខ្លួន (Delta) រដ្ឋាភិបាល កម្ពុជា បានចេញវិធានាការ រឹតបណ្តឹងនៅតាមព្រំដែនគោកកម្ពុជា ជាពិសេស ព្រំដែនរវាងប្រទេសថៃ និងវៀតណាម។ កាលពីថ្ងៃទី ១៤ខែកក្កដា រដ្ឋាភិបាលកម្ពុជា បានសម្រេចបិទការឆ្លងដែនរវាងព្រំដែន កម្ពុជា-វៀតណាម ចាប់ពីថ្ងៃទី ១៨ខែកក្កដាខាងមុខតទៅ។ ប៉ុន្តែ ព្រំដែន កម្ពុជា-ថៃ នៅមិនទាន់មានការប្រកាសបិទការចេញចូលនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ